« ’A fa’aru’e atu, ’e ’a fa’aro’o », Nō te pūai o te feiā ’āpī, Tetepa 2023.
’A fa’aru’e atu, ’e ’a fa’aro’o
E fa’anahora’a tā’u nō te fa’aoti i tā’u mau moemoeā. I tō’u rā fa’aru’era’a atu ’e te fa’ati’ara’a i te Fatu ’ia arata’i i tō’u ’ē’a, ’ua ha’amaita’ihia vau nā roto i te mau rāve’a nehenehe.
Fa’ahōho’ara’a nā Michael Mullan
I te 17ra’a o tō’u matahiti, ’ua haere atu vau i San Francisco, California, i Marite, nō te haere i te fare ha’api’ira’a anoihi. ’Ua moemoeā vau ’ia riro ’ei ta’ata fa’ahōho’a nō Disney.
I te fare ha’api’ira’a tuatoru, ’ua ha’api’i rahi mai a’e au i te anoihi noa. ’Ua ha’api’i mai au ’o vai au nō tō’u Metua i te ao ra. ’Aita fa’ahou vau i te fare. ’Aita tō’u nā metua i fa’aara mai iā’u, nō te ’āfa’i iā’u i te fare purera’a i te mau sābati ato’a. ’Aita e ta’ata e ’ite ē, tē ora ra ānei au ’aore rā ’aita i te ’evanelia. ’Ua ’ite rā vau tē hina’aro nei au iāna. ’Ua ’imi au i Te ’Ēkālesia a Iesu Mesia i te Feiā Mo’a i te mau Mahana Hōpe’a nei, i roto i te buka arata’i niuniu. I tō’u tomora’a atu i roto i te fare purera’a a te ’Ēkālesia ’e ’a fa’aro’o ai au « ’Ua ’ite au tē ora nei tō’u Fa’aora » (Te mau Hīmene, N 58) i te ha’utira’ahia, ’ua ’ite au tei te fare au. ’Ua ha’amata vau i te ’ite e aha te aura’a o te ’evanelia nō’u ’e te mea tā’u i hina’aro mau.
’A fa’ariro i te Fatu ’ei nūmera hō’ē i roto i tō ’outou orara’a
I taua taime ra, ’ua hina’aro vau e fa’aō mai i tō’u Metua i te ao ra i roto i te mau mea ato’a tā’u e rave. ’Ei hi’ora’a, ’ua ha’amata vau i te ui iāna e aha tōna ferurira’a nō tā’u mau fa’anahora’a tōro’a ’ohipa, ’e i hea vau e ti’a ai. ’A pure ai au ’e ’a ui ai i teie mau uira’a, ’ua ha’amata a’e ra vau i te ’ite ē e ti’a iā’u ’ia haere i te tahi atu vāhi.
’Ua ’oto ri’i au. ’Ua fa’ata’a atu vau i tā’u mau moemoeā ato’a ’e tē rōtahi nei au i ni’a i tā’u ’ōpuara’a. ’Ua mana’o vau, ’ua ’ite pāpū vau i hea vau e haere ai ’e e aha tā’u e rave. I teienei rā, ’ua ’ite au ē tē hina’aro nei au ’ia riro te Fatu ’ei nūmera hō’ē i roto i tō’u orara’a, ’e te aura’a o te reira hau atu nō’u i te tahi atu mea. Noa atu ē ’ua ’ite au e mea ta’a ’ē tō’u ’ē’a i te mau mea tā’u i feruri, ’ua ’ite au i tōna here iā’u ’e ’ua ti’aturi au i tōna pa’ari.
’Ua arata’ihia vau i te fare ha’api’ira’a tuatoru nō Brigham Young–Idaho ’e te fare ha’api’ira’a tuatoru nō Brigham Young i Provo, Utaha, nō te fa’aoti i tā’u mau parau tū’ite nō te fa’ahōho’ara’a. Nā mua noa a’e i te noa’ara’a tā’u parau tū’ite, ’ua rave au i te hō’ē ha’api’ipi’ira’a i roto i te hō’ē fare ha’utira’a o te fenua iho. Fātata hō’ē matahiti i muri mai, i muri a’e i tō’u tihepura’ahia nō te mahana tā’āto’a, ’ua ho’ohia mai te fare ma te mana’o ’ore e Disney, ’o tei ’āfa’i mai i te mau rāve’a ’e te tupura’a rahi ’āpī.
’Ia fa’aru’e atu ana’e ’outou i te mea tā ’outou e mana’o ra e hina’arohia, e ha’amaita’i te Fatu ia ’outou i te taime tano ’e te mea ’o te fa’a’oa’oa mau ia ’outou. ’Aita roa ’outou i ’ite i hea te Fatu e ’āfa’i ai ia ’outou. ’A vaiiho noa ia ’outou e hāhaere ’e ’a fa’aro’o noa.
’A tu’u i te mau ’ohipa mātāmua i te mātāmua
I roto i te ha’api’ira’a, ’ua tītauhia iā’u ’ia ’apo’apo i te mau ha’api’ira’a ’e te mau ’ohipa ha’api’ira’a ’e te mau hōpoi’a a te ’Ēkālesia. ’Ua ti’a iā’u ’ia fa’ata’a e aha tā’u mau ’ohipa mātāmua roa. E haere ānei au e fārerei i te mau ta’ata nō te aupuru ia rātou, ’aore rā e tuatāpapa ānei au nō teie hi’opo’ara’a ? E tai’o ānei au i tā’u mau pāpa’ira’a mo’a i teienei, ’aore rā, e fa’aoti ānei au i teie ’ohipa ha’api’ira’a ?
I te mau taime ato’a e tu’u vau i te Fatu nā mua roa ’e ’ia rave au i te ’ohipa tāna i pi’i iā’u ’ia rave, e tere maita’i te mau mea i te mau taime ato’a ’e te tahi atu ato’a. E tāpe’a noa ’oia i tāna parau fafau. ’Ia tu’u ana’e tātou i te Fatu nā mua roa, e vai te mau mea ato’a i te vāhi mau.
I tō’u haerera’a i te ha’api’ira’a tuatoru, ’ua fa’aruru ato’a vau i te reira mau huru mā’itira’a. ’O vau te peresideni nō te Feiā ’Āpī Tamāhine o te pāroita i taua taime ra. I te hō’ē mahana, ’ua tītauhia iā’u ’ia mā’iti i te tuatāpapa nō te hō’ē hi’opo’ara’a ’e te tauturura’a i te feiā ’āpī tamāhine ’ia fa’anaho i te hō’ē ’ātivite. ’Ua haere au nā muri i te feiā ’āpī tamāhine. I te taime vata e toe ra iā’u, ’ua pure au ’e ’ua tuatāpapa mai tei mara’a iā’u. Noa atu ā rā, ’ua manuïa vau i te hi’opo’ara’a ’e e mea maita’i a’e tā’u mau nota i tā’u i mana’o.
’A vaiiho iāna ’ia arata’i ia ’outou.
E arata’i te Metua i te ao ra ia ’outou. ’Ua here oia ia ’outou ’e ’ua ’ite pāpū ’oia tō ’outou vaira’a. ’Ua ’ite pāpū maita’i ’oia e aha tē ha’amaita’i rahi a’e ia ’outou ’e e aha te taime.
I roto i tō’u orara’a, ’ua taui rahi te mau mea ’e ’ua hā’uti’uti rahi. Tei roto rā ’oia i te mau taime ato’a. ’A pe’e ai au i tāna arata’ira’a nō’u, ’ua oti maita’i te mau mea ato’a. ’Eiaha mai tā’u i mana’o, e mea nehenehe rā.
Tē hina’aro nei ’oia ’ia riro ’ei tuha’a nō tō tātou orara’a. Mai te mea e nehenehe noa tātou e vaiiho iāna ’ia tomo mai i roto i tō tātou orara’a, tē vai ra te mau ’ohipa māere mau e tīa’i nei ia tātou tāta’itahi. E aha atu ā tāna e fa’aherehere nei nō ’outou ’o tā ’outou e ’ore nei e nehenehe e ’ite ?