« 4 rāve’a nō te ha’apūai i tō ’oe ’utuāfare », Nō te pūai o te feiā ’āpī, ’Ātopa 2023.

4 rāve’a nō te ha’apūai i tō ’oe ’utuāfare

Nā Eric B. Murdock

Mau ve’a a te ’Ēkālesia

E nehenehe ’oe e ha’apūai i tō ’oe ’utuāfare ’ia riro ’ei mea maita’i roa a’e e ti’a ai, ma te ora i te ’evanelia a Iesu Mesia.

Noa atu te pūai o tō ’oe ’utuāfare, ’aita e fifi mai te mea e fa’arahi atu ā tōna pūai. I teie mau mahana nei, e au ra ra tē tupu noa mai ra te mau ha’aparuparura’a i te ’utuāfare. Nō te mea ïa ’ua ’ite Sātane ē, e mea faufa’a te mau ’utuāfare nō te fa’anahora’a a te Metua i te ao ra. Mai te mea noa atu tē vai ra te ’ohipa tā te ’enemi e nehenehe e rave nō te ha’afifi i te orara’a ’utuāfare, mea pāpū e tāmata ’oia i te reira.

Noa atu ’aita hō’ē ’utuāfare i te mea maita’i hope roa, tē vai ra hō’ē mea i roto i tō ’oe ’utuāfare ’aita tō roto i te tahi atu : ’O ’oe ! ’E tei tō ’oe pae te ’evanelia a Iesu Mesia. ’Ua ha’api’i mai te mau peropheta ’e te mau ’āpōsetolo ē, « E mea pāpū a’e te ’oa’oa i roto i te orara’a ’utuāfare ’ia fa’atumuhia te reira i ni’a i te mau ha’api’ira’a a te Fatu ra o Iesu Mesia ».¹

Teie te tahi mau rāve’a e nehenehe ai i te ’evanelia a te Fatu e ha’apūai ’e e hōpoi mai i te ’oa’oa i tō ’oe ’utuāfare :

E nehenehe te mau ’utuāfare e tā’atihia ē a muri noa atu.
E nehenehe te mau ’utuāfare e ’oa’oa ’ia putuputu ana’e rātou, ’ia tāvini i te tahi ’e te tahi ’e ’ia riro ana’e rātou ’ ei melo nō te hō’ē pupu ’e ’ia ’ite i ihota’ata hanahana.
E nehenehe te mau ’utuāfare e tūru’i i ni’a i te mana o Iesu Mesia nō te fa’atītī’aifaro i te mau ta’a-’ore-ra’a, te mau mārōra’a ’e te mau fifi, nā roto i te tātarahapara’a, te fa’a’orera’a hara ’e te fa’aro’o.

Teie e maha rāve’a e nehenehe ai ’oe e ha’apūai i tō ’oe ’utuāfare nā roto i te orara’a i te ’evanelia :

1 Fa’aitoito i te pure

E pūai mai te mau ’utuāfare ’ia pure ’āmui ana’e rātou. E nehenehe te pure e ha’amaita’i i tō ’oe ’utuāfare i te hau, te here ’e te au māite. Mai te mea e ’ere te pure i te peu matauhia i roto i tō ’oe ’utuāfare, ’a pure nō te ’ite e nāhea ’oe e nehenehe ai e tauturu i tō ’oe ’utuāfare ’ia pure ’āmui. ’Ia vai ineine ’oe nō te fa’a’ohipa i te mau pāhonora’a tā ’oe e fāri’i.

2 Haere ’āmui i te fare purera’a

I te fare purera’a e ha’api’i mai tātou nō ni’a i te ’evanelia a Iesu Mesia. Tē rave ato’a nei tātou i te ’ōro’a mo’a ’e te fafaura’a i mua i te Atua ē, ’ua hina’aro tātou e rave i ni’a iho ia tātou i te i’oa o Iesu Mesia ’e e ha’amana’o tāmau noa iāna (hi’o Mosia 18:8–10 ; Te Ha’api’ira’a Tumu ’e te mau Fafaura’a 20:77, 79).

E tauturu te haerera’a i te purera’a ’ei ’utuāfare i te ha’afātatara’a i te mau ta’ata ato’a i te Atua ’e i te tahi ’e te tahi. E tītau te haerera’a i te purera’a i te hepetoma tāta’itahi i te parau fafau ia ’oe iho, e ha’amaita’i mai rā te Atua i tā ’oe mau tauto’ora’a. Mai te mea ’ua mā’iti tō ’oe ’utuāfare ’eiaha e haere i te purera’a nā muri iho ia ’oe, ’ia ’ite mai ’oe ē, nā tō ’oe haerera’a e ha’apūai ia ’oe ’e e tauturu ia ’oe ’ia ’ite mai i te tahi atu mau rāve’a nō te ha’apūai i tō ’oe ’utuāfare.

3 Here ’e tāvini

’Ua ha’api’i te Fa’aora « ’Ia aroha ’outou ia ’outou iho, mai iā’u e aroha atu ia ’outou na » (Ioane 15:12). ’A fa’a’ite i tō ’oe ’utuāfare i tō ’oe here rahi nō rātou—noa atu ’ua pāpū ia ’oe ē ’ua ’ite a’ena rātou. E tītau manihini te fa’a’itera’a i tō ’oe here i tō ’oe ’utuāfare nā roto i te parau ’e te ’ohipa i te Vārua i roto i tō ’oe ’utuāfare.

Te tāvinira’a i te mau melo o te ’utuāfare, e rāve’a faufa’a roa ïa nō te fa’a’ite i tō ’oe here. ’E e ha’afātata ato’a te tāvini-’āmui-ra’a ia vetahi ’ē i tō ’oe ’utuāfare, i te tahi ’e te tahi ’e i te Metua i te ao ra. ’Aita e tītauhia ’ia fa’anaho i te ’ohipa tāvinira’a rahi. E nehenehe te tāvinira’a e riro ’ei ’ohipa ’ōhie, mai te fa’aineinera’a i te hō’ē mā’a au-roa-hia nō te hō’ē ta’ata tupu. E hōpoi mai te tāvinira’a i roto i te ’utuāfare i te ’oa’oa nō te mea, mai tā tātou e tai’o i roto i te mau pāpa’ira’a mo’a « ’a tāvini ai ’outou i tō ’outou mau ta’ata tupu, tē tāvini ra ïa ’outou i tō ’outou Atua » (Mosia 2:17).

4 Ora i te ’Evanelia

E rave rahi ’utuāfare e ta’ata tō rātou e ’ere i te melo nō te ’Ēkālesia ’aore rā, tei mā’iti e fa’aea i te haere i te purera’a. ’Ia ’ore te ’utuāfare e pāturu, e mea fifi roa ’ia ’āmui mai i te fare purera’a. Mai te mea ē, mai te reira tō ’oe ’utuāfare, ’a ha’amana’o e nehenehe noa ’oe e riro ’ei pūai nō te maita’i nā roto i te orara’a i te ’evanelia.

’Ia ’ite mai i tō ’oe ’utuāfare ē, tē ora ’oe i te mea tā ’oe e ti’aturi nei. ’Aita ’oe i ’ite i te taime rātou e māta’ita’i ai i te mea tā ’oe e parau ’e e rave. Nā te reira e ’āfa’i mai i te māramarama o te ’evanelia i tō ’oe ’utuāfare. Noa atu te huru orara’a o tō ’oe ’utuāfare, e nehenehe tā ’oe mau tauto’ora’a tāmau nō te ora i te ’evanelia, e ’īriti i te ’ūputa i te Vārua nō te arata’i, nō te fa’auru, nō te fa’aitoito ’e nō te tauturu i tō ’oe ’utuāfare ’ia ha’afātata atu ā i te Fa’aora, ia Iesu Mesia.