« Nāhea ’oe i te fa’aineine nō te ’āmuira’a rahi », Nō te pūai o te feiā ’āpī, Tetepa 2023.
Fa’aineinera’a nō te ’āmuira’a rahi
Nāhea ’oe i te fa’aineine nō te ’āmuira’a rahi
E rave rahi tā teie feiā ’āpī i ha’api’i mai roto mai i te ’āmuira’a rahi. Nāhea ’oe e nehenehe ai e fa’aineine nō te fāri’i i te hō’ē ’itera’a faufa’a roa ?
Tē hina’aro nei au e pe’e i te peropheta
’Ua fa’aineine au iā’u iho nō te ’āmuira’a rahi nō ’Ātopa 2022, nā roto i te tai’ora’a nō ni’a i te Tāra’ehara a Iesu Mesia i roto i te Buka a Moromona ’e i roto i te Faufa’a Tahito.
I roto i te ’āmuira’a, ’ua paraparau mai te peresideni Russell M. Nelson ia tātou ’e ’ua fa’a’ite pāpū mai nō ni’a i te faufa’a rahi o te hiero.1 I roto i te hiero, ’ua fafauhia mai te mau ha’amaita’ira’a mure ’ore, ’e e ’itehia te hō’ē vārua nehenehe ’ia haere ana’e ’outou i reira.
’Aita ā e hiero i Nicaragua, ’ua fa’aarahia rā te hō’ē. Tē ti’aturi nei au ē, e nehenehe tā’u e fa’aro’o i te mau parau a te peresideni Nelson ’e e haere i te hiero ’ia oti ana’e te reira.
I tō’u māta’ita’ira’a i te ’āmuira’a, ’ua putapū vau i te Vārua i te fa’a’ite-pāpū-ra’a ē, tei te vāhi ti’a vau. Mai te huru ē, ’ua ’ī tō’u ’ā’au i te here o te Atua.
Carlos M., Nicaragua
E roa’a te fa’aorara’a i te mau ta’ata ato’a
Hou te ’āmuira’a rahi nō ’Ātopa 2022, ’ua feruri au i te mau mea i tupu i roto i tō’u orara’a ’aita i maoro a’enei. E rave rahi mea tei ha’ape’ape’a i tō’u ferurira’a hou te ’āmuira’a, ’e ’ua hina’aro vau ’ia fāri’i i te tāmāhanahanara’a, te hau ’e te pūai.
I roto i te ’āmuira’a, ’ua parau Elder Quentin L. Cook nō te Tino ’Ahuru ma Piti ’āpōsetolo ē, « maoti te tāra’ehara a te Fa’aora, e roa’a te fa’aorara’a i te mau ta’ata ato’a ».2
Nā taua mau parau ra i hōro’a mai i te hau ’e te ti’aturira’a iā’u. Nā roto i te tāra’ehara a Iesu Mesia, ’ia rave ana’e au i te mau hape ’e te mau mā’itira’a hape, e nehenehe tā’u mau hara e fa’a’orehia ’e e ’ite i te hau. ’E noa atu te huru o te māuiui i roto iā’u, e nehenehe au e fa’aorahia. E nehenehe tātou pā’āto’a e ’ite i taua hau ra ’e taua fa’aorara’a ra mai te mea, e tātarahapa tātou i tā tātou mau hara ’e e tūtava tātou ’ia riro ’ei ta’ata maita’i a’e i te mahana tāta’itahi.
Kaye D., Firipino
Tā ’oe fa’aineinera’a nō te ’āmuira’a
’A rave hō’ē noa minuti nō te fa’aineine nō te ’āmuira’a, ’e e fāri’i ’oe i te hō’ē rāve’a maita’i a’e. Nō reira, nāhea ’oe i te fa’aineine ? ’A ha’amata nā roto i te pāpa’ira’a i tā ’oe mau uira’a ! ’A feruri i tā ’oe mau uira’a ’a māta’ita’i ai ’oe, ’e e māere ’oe i te pinepinera’a o te ta’ata a’o i te paraparau ’āfaro ia ’oe.