« Te pe’era’a te mau peropheta i te mau peropheta », Nō te pūai o te feiā ’āpī, Tetepa 2023.
Fa’aineinera’a nō te ’āmuira’a rahi
Te pe’era’a te mau peropheta i te mau peropheta
E nehenehe te mau ta’ata ato’a e ’ite mai i te mau ha’amaita’ira’a ma te pe’era’a i te peropheta—tae noa atu i te mau ’āpōsetolo.
Tē ani-tāmau-hia nei ia tātou ’ia pe’e i te peropheta. Tē uiui nei rā paha te tahi pae ē, nō te aha e mea faufa’a roa ’ia pe’e i te reo o te peropheta.
I roto i te ’āmuira’a rahi nō ’Ēperēra 2017, ’ua ani te peresideni Thomas S. Monson, te peropheta i taua taime ra, i te mau melo o te ’Ēkālesia ’ia tuatāpapa, ’eiaha e tai’o noa, i te Buka a Moromona i te mau mahana ato’a. ’Ua pe’e te peresideni Russell M. Nelson ’e te peresideni Henry B. Eyring i te a’o a te peropheta ’e ’ua paraparau nō ni’a i te ’ohipa i tupu.
Te hō’ē ’āpōsetolo ha’apa’o
’Ua parau te peresideni Nelson : « ’Ua tāmata vau i te pe’e i te a’o a te peresideni Monson. I rotopū i te tahi atu mau mea, ’ua ha’amau vau i te tahi mau tāpura, ’oia ho’i, e aha te Buka a Moromona, e aha tāna e ha’apāpū nei, e aha tāna e pāto’i nei, e aha tāna e fa’atupu nei, e aha tāna e ha’amāramarama nei, ’e e aha tāna e heheu nei. ’Ua riro te hi’ora’a i te Buka a Moromona nā roto i teie mau tīti’a hi’ora’a ’ei ’ohipa ha’amāramarama rahi ’e te fa’auru ! »1
’Ua fa’ata’a fa’ahou te peresideni Nelson ē, ’ua ui atu ’oia ia vetahi i te reira mau uira’a, ’e ’ua ’ite mai ’oia ē, e rave rahi orara’a tei ha’aputapūhia nā roto i te pe’era’a i te a’o a te peresideni Monson. Tē arata’i nei te Fatu ia tātou pā’āto’a nā roto i tō tātou peropheta, te mau pāpa’ira’a mo’a ’e te heheura’a nō tātou iho.
Hō’ē ’āpōsetolo ha’apa’o maita’i
’Ua parau te peresideni Eyring : « ʼUa taiʼo vau i te Buka a Moromona i te mau mahana atoʼa hau atu i te 50 matahiti. Nō reira penei a’e ʼua nehenehe iāʼu ’ia manaʼo ē, te mau parau a te peresideni Monson nō te tahi atu ïa taʼata. ’Āre’a rā, mai ia ʼoutou e rave rahi, ʼua ʼite au te faʼaitoitoraʼa a te peropheta ʼe tāna fafauraʼa, tē ani mai nei iā’u ’ia tūtava rahi atu ā ».
ʼUa parau fa’ahou te peresideni Eyring : ’Ua tupu mai i niʼa iho iāʼu e piti ʼohipa faʼahiahia nā roto i te faʼaroʼoraʼa i te aʼo a te peresideni Monson : ’A tahi, te Vārua tāna i fafau mai, ʼua faʼatupu i te manaʼo ʼanaʼanatae nō te mau mea e tupu mai i te mau mahana i mua nei, noa atu ē tē mara’a rahi noa atu ra te ʼāhuehue i te ao nei. ʼE te piti, ʼua hōroʼa mai te Fatu iāʼu—ʼe ia ʼoutou—i te hōʼē manaʼo rahi aʼe nō tōna aroha i te mau taʼata i roto i te hepohepo ».2
Te mau ta’ata ato’a
E nehenehe ’e e ti’a i te mau ta’ata ato’a ’ia pe’e i te parau a’o a te peropheta i roto i te ’āmuira’a rahi. Noa atu te vāhi tei reira ’outou i roto i tō ’outou tere pae vārua, e nehenehe noa ’outou e ha’amaita’i ia ’outou, noa atu e ’āpōsetolo ’outou, e ta’ata fa’afāriu-’āpī-hia ’aore rā i rōpū i na mea e piti. E’ita te reira e fa’aiti i tō tātou hina’aro i te heheura’a a te ta’ata iho ; ’o te tahi atu rāve’a nō te Atua i te ha’amaita’i ia tātou. Mai te mea e nehenehe ato’a i te mau ’āpōsetolo e ’ite mai i te tahi atu mau ha’amaita’ira’a mai teie te huru, e nehenehe ato’a te toe’a o tātou e fāri’i i te reira.