Mau uiraʼa ’e Mau pāhonoraʼa

« E aha tā’u e nehenehe e rave mai te mea tē mana’o nei au, e ’aita vau e fāri’i nei i te mau ’itera’a pae vārua ? »

« E pure nā roto i te i’oa o Iesu Mesia nō ni’a i tō ’outou mau māna’ona’ora’a, mau mata’u ’e mau paruparu—’oia mau, te hia’ai mau o tō ’outou ’ā’au. ’Ei reira e fa’aro’o ai ! … ’A fa’ahiti fa’ahou ai ’outou i teie ’ohipa …, e ‘tupu ’outou i te rahi i roto i te parau tumu o te heheura’a’ ».

Peresideni Russell M. Nelson, « Heheura’a nō te ’Ēkālesia, heheura’a nō tō tātou orara’a », ’Āmuira’a rahi nō ’Ēperēra 2018 (Ensign ’aore rā Liahona, Mē 2018, 95).

’A feruri hōhonu, ’a pāpa’i ’e ’a fa’aau

« I te hope’a o te mahana, e rave au i te taime nō te feruri hōhonu ’e nō te pāpa’i i roto i tā’u buka ’ā’amu, nō ni’a i te mau ’itera’a pae vārua tā’u i fāri’i i te reira mahana ’e ’ia fa’aau i te reira. I te mau taime ato’a e rave au i te reira, e ’ite au i te hau. E fa’aha’amana’o ato’a te reira iā’u ’ia ’imi i te mau ’itera’a pae vārua i te mau mahana ato’a ».

Kianna G., 16 matahiti, Zamboanga del Norte, Firipino

Ani i te Atua

« ’Ua riro te tai’ora’a tāmau i tā ’outou mau pāpa’ira’a mo’a ’e te purera’a i te mahana tāta’itahi ’ei rāve’a rahi nō te fa’a’ite i te Atua ē, tē hina’aro nei ’outou e fāri’i i te mau ’itera’a pae vārua. Mai te mea tē mana’o ra ’outou ē, ’aita ’outou e fāri’i nei i te mau ’itera’a pae vārua, ’a ani i te Atua ma te ’ā’au tae mau nō te tauturu ia ’outou ’ia ’ite i te reira. ’Ua here ’oia ia ’outou ’e e pāhono ’oia i tā ’outou mau pure ’a ’imi ai ’outou i te rave i tā ’outou tuha’a ».

Elijah C., 15, Utah, Marite

ʼA faʼaʼoromaʼi

« ʼA faʼaʼoromaʼi. E’ita tō ’outou mau ’itera’a e riro i te mau taime ato’a mai te tahi ».

Isabella F., 16 matahiti, São Paulo, Peretīria

’A ora i te ’evanelia.

« E roa’a ia tātou te mau ’itera’a pae vārua nā roto i te tai’ora’a i te mau pāpa’ira’a mo’a, te fa’aro’ora’a i te mau parau a te peropheta, te ha’apaera’a i te mā’a, te purera’a, te haerera’a i te hiero ’e te tāvinira’a ia vetahi ’ē. E tauturu teie mau mea ia tātou ’ia ha’afātata atu ā i te Mesia ’e ’ia fāri’i rahi atu ā i te mau muhumuhu nō ’ō mai i te Vārua Maita’i ’o tē hōro’a mai ia tātou te hau ».

Nellie R., 16, Hidalgo, Mēhiko

’A ha’apa’o maita’i.

« E ti’a ia tātou ’ia ha’amana’o noa i te ha’apa’o maita’i i te mau muhumuhu a te Vārua Maita’i. E nehenehe te reira e roa’a ia tātou nā roto i te mau mea ha’iha’i roa a’e. Noa atu e mea na’ina’i te reira, e nehenehe ’oia e tāmau noa i roto te ora mure ’ore. »

Melissa A., 14, Paraíba, Beresiria

’Ua hōro’ahia atu te mau pāhonoraʼa ’ei tauturu ’e ’ei hi’oraʼa, e ʼere rā i te fa’a’iteraʼa mana nō te haʼapiʼiraʼa tumu a te ʼĒkālesia.

E aha tō ’outou manaʼo ?

« Nāhea e ti’a ai iā’u ’ia ‘vaiiho i tō’u māramarama ’ia ’ana’ana’, mai te mea e ’ere au i te ta’ata māramarama roa a’e ? »

’A hāpono mai i tā ’outou pāhonora’a ’e te hōho’a nā mua a’e i te 15 nō ’Ātopa 2023.

’A rata uira mai ia mātou i te [e-mail]. ’Aore rā ’a haere i ni’a ftsoy.ChurchofJesusChrist.org ’e ’a tāumi « Hāpono i tā ’outou ’ohipa » ’A fa’a’ohipa i tā ’outou tomora’a nō te ’Ēkālesia ’e ’a mā’iti i muri iho « Nō te pūai o te feiā ’āpī] » i raro a’e « Mā’iti i te ve’a ». ’A tāumi i ni’a « mau putu’ite » nō te mā’iti i tā ’outou mau putu’ite ’e te mau hōho’a, ’e i muri iho, ’a tāumi « Hāpono » nō te fa’auta uira atu ’e nō te hāpono atu i tā ’outou putu’ite ia mātou.

E riro te mau pāhonoraʼa i te taui-ri’i-hia nō te roa ’aore rā nō te māramarama ’ore.