« Mā’itira’a ’ia tāvini » Nō te pūai o te feiā ’āpī, Tetepa 2023.
E ti’a iā’u te mau mea ato’a nei i te Mesia
Tē fa’a’ite nei te feiā ’āpī nāhea te Mesia i te ha’apūaira’a ia rātou, ’ia rave i te mau ’ohipa teimaha (hi’o Philipi 4:13).
Mā’itira’a ’ia tāvini
’Ua hina’aro noa na vau e tāvini i te hō’ē misiōni, terā rā, i te 18ra’a o tō’u matahiti, ’ua ha’amata te ma’i pe’e. ’Aita vau i ineine nō te tāvini, nō reira ’ua ha’amata vau i te ha’api’ira’a tuatoru, ’e ’ua fāri’i au i te hō’ē moni ha’api’ira’a rahi. E rave rahi ta’ata tei parau mai ē, ’eiaha vau e haere i te misiōni. Mai te huru ē, tē mo’e ra iā’u tō’u hina’aro ’ia tāvini.
I muri iho rā, i te ’āmuira’a rahi, ’ua parau te peresideni M. Russell Ballard ē « mai te mea ’ua ti’a tō ’outou matahiti nō te tāvinira’a misiōnare ’e ’aita ā ’outou i tāvini nō te pararera’a ma’i pe’e ’aore rā nō te tahi atu tumu, tē ani nei au ia ’outou ’ia tāvini i teienei ».1 I tōna paraura’a i te ta’o ra « i teienei », mai te huru ra ē, tē parau mai ra ’oia iā’u—e ti’a iā’u ’ia tāvini i te hō’ē misiōni i teienei. Mai taua mahana ra, ’ua pure au nō ni’a i te reira ’e ’ua fāri’i au i te ha’apāpūra’a ē, ’ua tae te taime nō’u nō te tāvini i te Fatu.
E rave rahi fa’ahapara’a tā’u i fāri’i nō ni’a i tā’u fa’aotira’a. ’Ua fa’a’ore-ato’a-hia tā’u moni ha’api’ira’a. Terā rā, ’ua pūai tō’u hina’aro ’ia haere ’e ’aita hō’ē a’e o te reira mau mea i te mea faufa’a. ’Ua pi’ihia vau ’ia tāvini i roto i te misiōni nō Quetzaltenango Guatemala. E mea ta’a ’ē roa nō te mea, ’ua tā’atihia tō’u nā metua ē a muri noa atu i Guatemala.
Mai te mea tē uiui ra ’outou ē, e ti’a ānei ia ’outou ’ia tāvini i te hō’ē misiōni, ’aita i tāere roa ! ’A ti’aturi tāmau i te Metua i te ao ra ’e ia Iesu Mesia. E arata’i ’e e ha’amaita’i mai rātou ia tātou i te mau mea e’ita e nehenehe ia tātou ’ia feruri.
Enoc M., Rēpupirita Tominita