« ’Ia ro’o-ana’e-hia te hō’ē ta’ata tei herehia i te ma’i i te pae ferurira’a », Nō te pūai o te feiā ’āpī, Tetepa 2023.
’Ora Tauturu
’Ia ro’o-ana’e-hia te hō’ē ta’ata tei herehia i te ma’i i te pae ferurira’a
Teie e pae mana’o e tāpe’a noa i roto i te ferurira’a, ’ia hina’aro ana’e ’outou e tauturu i te hō’ē ta’ata e māuiui nei i te fa’aturumara’a, te hepohepo ’e te tahi atu mau fifi i te pae manava.
Fa’ahōho’ara’a nā Toby Newsome
E mea fifi roa ’ia māta’ita’i i te hō’ē hoa ’aore rā te hō’ē melo o te ’utuāfare e ora ra i roto i te fa’aturumara’a, te hepohepo, ’aore rā, te tahi atu mau fifi i te pae ferurira’a. E hina’aro paha ’outou e rave i te hō’ē ’ohipa nō te tauturu, ’aita rā ’outou i ’ite e aha ra.
Teie te tahi mau mana’o e tāpe’a noa i roto i te ferurira’a, ’a feruri ai ’outou nāhea i te tauturu i te hō’ē ta’ata e tāfifi nei ’e tōna ea i te pae ferurira’a :
1. ’A toro i te rima.
Mai te mea tē mana’o ra ’outou e mea maita’i a’e ’ia fa’atoro i te rima ’aore rā ’ia fa’aātea ’ē, teie te pāhonora’a : ’A toro i te rima. E tauturu mau te mau aura’a fātata i te mau ta’ata e fifi nei i te pae ferurira’a. ’A paraparau ’e o rātou. ’A ’ohipa ’e o rātou. E nehenehe te reira e riro ’ei ’ohipa ’ōhie ’e te au maita’i, ’a fa’atoro rā i te rima.
2. ’Eiaha e hōro’a i te a’o maori rā ’ia ani mai rātou ia ’outou.
Mai te mea ’aita te hō’ē ta’ata i ani ia ’outou i te tauturu, ’eiaha e ha’amata i te hōro’a i te parau a’o ia rātou. Ē tae roa ’ia anihia mai ia ’outou, ’a fa’atumu noa i ni’a i te fa’ahoara’a, te ’atu’atura’a ’e te māna’ona’ora’a mau.
3. ’Ia riro ’ei ta’ata hāmani maita’i, te mana’o pāpū ’e te aroha.
’Ia ani ana’e mai te hō’ē ta’ata i tā ’outou tauturu, ’a pe’e i te hi’ora’a o te Fa’aora. Pure i te Metua i te ao ra ’ia fa’auruhia mai. ’A fa’aitoito. ’A paraparau ia rātou ma te hāmani maita’i. Parau pāpū i te mau mea. Fa’a’ite i te hāro’aro’ara’a ’e te aroha. ’A fa’a’ite ia rātou tē pāturu nei ’outou ia rātou ’e tei reira ’outou nō rātou. ’A fa’aitoito ia rātou ma te mārū, ’ia ’imi i te tauturu a te ta’ata tōro’a.
4. ’A fa’a’oroma’i ’e ’a tāmau noa
I te tahi taime, e’ita te mau ta’ata i roto i te fifi i te mea tau’a mai ’aore rā e māuruuru mai. ’A fa’a’oroma’i rā. ’A fa’aea noa i pīha’i iho ia rātou. E mea au ’ore roa nō rātou te vai ’ōtahira’a. ’Eiaha ’outou e vaiiho roa ia rātou mai te mea ’aita rātou e pāhono mai, mai tā ’outou e hina’aro.
5. ’A ha’apa’o maita’i ato’a ia ’outou iho.
’Ia pāpū ia ’outou ē, tē ’ite nei ’outou i te ’oa’oa i roto i tō ’outou orara’a. ’A tāmau noa i tā ’outou iho pure ’e tā ’outou tuatāpapara’a i te pāpa’ira’a mo’a. ’A haere i te hiero. ’A rave i te tahi atu mau ’ohipa ’o tā ’outou e au ra. ’Eiaha e vaiiho i te hepohepo ’aore rā i te mau pe’ape’a nō ni’a i te huru o te ta’ata tei herehia, ’ia fa’ateimaha i tō ’outou orara’a. ’A ani i te tauturu ia vetahi ’ē mai te mea e hina’aro ’outou i te reira.