“Kapag ang Isang Mahal sa Buhay ay May Problema sa Mental na Kalusugan,” Para sa Lakas ng mga Kabataan, Set. 2023.
Tulong sa Buhay
Kapag ang Isang Mahal sa Buhay ay May Problema sa Mental na Kalusugan
Narito ang limang ideya na dapat tandaan kapag gusto mong tulungan ang isang taong dumaranas ng depresyon, pagkabalisa, o iba pang mga hamon sa emosyon o damdamin.
Mga larawang-guhit ni Toby Newsome
Maaaring mahirap panoorin ang isang kaibigan o kapamilya na dumaranas ng depresyon, pagkabalisa, o iba pang problema sa kalusugan ng pag-iisip. Maaaring gusto mong gumawa ng isang bagay na makakatulong pero hindi ka sigurado kung ano.
Narito ang ilang ideya na dapat isaisip habang pinag-iisipan mo kung paano tutulungan ang isang tao na nahihirapan sa kalusugan ng kanilang isipan:
1. Tumulong.
Kung iniisip mo kung pinakamainam bang tumulong o lumayo, ang sagot ay: tumulong ka talaga. Ang malalapit na ugnayan ay talagang tumutulong sa mga taong nahihirapan sa mental na kalusugan. Kausapin sila. Samahan sila sa ginagawa nila. Maaaring isang simple at normal na bagay ito, pero tumulong ka talaga.
2. Huwag magbigay ng payo maliban kung hihingi sila nito.
Kung hindi naman humingi ng tulong sa iyo ang isang tao, huwag mo silang payuhan. Maliban kung hinilingan ka, magtuon lamang sa pagiging mabait, mapagmalasakit, at tunay na nag-aalala.
3. Maging magiliw, positibo, at mahabagin.
Kapag humihingi sa iyo ng tulong ang isang tao, tularan ang halimbawa ng Tagapagligtas. Manalangin sa Ama sa Langit na mabigyan ng inspirasyon. Pasiglahin ang kapwa. Magsalita sa kanila nang malumanay. Magsabi ng mga positibong bagay. Magpakita ng pag-unawa at pagkahabag. Ipaalam sa kanila na sinusuportahan mo sila at nariyan ka para sa kanila. Magiliw na hikayatin sila na humingi ng tulong sa isang propesyonal.
4. Maging matiyaga at masugid.
Kung minsan ang mga taong nahihirapan ay maaaring hindi tumutugon o hindi mapagpasalamat. Pero maging mapagpasensya. Huwag silang iwanan. Ang pag-iisa ay hindi mabuti para sa kanilang kalusugan. Huwag lubusang lumayo kung hindi sila tumutugon sa paraang gusto mo.
5. Pangalagaan din ang sarili mo.
Tiyaking nakasusumpong ka ng kagalakan sa iyong buhay. Ipagpatuloy ang personal na panalangin at pag-aaral ng mga banal na kasulatan. Dumalo sa templo. Gumawa ng iba pang mga bagay na ikinasisiya mo. Huwag hayaang mangibabaw sa buhay mo ang stress o pag-aalala sa sitwasyon ng mahal mo sa buhay. Tumulong sa iba para sa suporta kung kailangan mo ito.