« ស្វែងរកកម្លាំងរបស់អ្នកនៅក្នុងព្រះយេស៊ូវគ្រីស្ទ » ដើម្បីកម្លាំងនៃយុវជន ខែ មករា ឆ្នាំ ២០២៤ ។
ស្វែងរកកម្លាំងរបស់ទ្រង់
ស្វែងរក កម្លាំង របស់អ្នកនៅក្នុងព្រះយេស៊ូវគ្រីស្ទ
ព្រះយេស៊ូវគ្រីស្ទ គឺជា កម្លាំងនៃយុវជន—យុវវ័យគ្រប់រូបនៅលើផែនដី—ហើយប្រាកដណាស់រួមទាំងអ្នកផងដែរ !
ស្តាប់ទ្រង់ ហាលី មីលលើរ
ខ្ញុំរីករាយនឹងណែនាំនូវច្បាប់ពិសេសនៃទស្សនាវដ្ដី ដើម្បីកម្លាំងនៃយុវជន ។ អត្ថបទ សកម្មភាព និងដំណើររឿងមកពីយុវវ័យទូទាំងពិភពលោកនឹងជួយពង្រឹងទីបន្ទាល់របស់អ្នកអំពីសេចក្ដីពិតមួយដ៏មានសារៈសំខាន់ដែលស៊ីជម្រៅ និងអស់កល្បជានិច្ច ដែលបានលើកឡើងដោយគណៈប្រធានទីមួយ ។ ពួកលោកបានប្រកាសដោយសុទិដ្ឋិនិយមអំពីព្រះយេស៊ូវគ្រីស្ទថា « ទ្រង់គឺជា‹ កម្លាំងនៃយុវជន › » ។១ វាមានន័យថាព្រះយេស៊ូវគ្រីស្ទគឺជាកម្លាំងរបស់អ្នក ។ ខ្ញុំសូមអធិស្ឋានថា អ្នកនឹងឱបក្រសោបសេចក្ដីពិតនេះប្រកបដោយអំណរនៅគ្រាដ៏សំខាន់ក្នុងជីវិតរបស់អ្នក ទាំងនៅពេលនេះ និងជារៀងរហូត ។
មនុស្សគ្រប់គ្នាត្រូវការកម្លាំងនៅក្នុងព្រះគ្រីស្ទ
អ្នកពុំមែនស្ថិតនៅលើផែនដីនេះដោយភាពចៃដន្យ ឬដោយកំហុសណាមួយឡើយ ។ អ្នកបានជ្រើសរើសមកកាន់ផែនដីនេះដើម្បីរៀនសូត្រ រីកចម្រើន ធ្វើរឿងដ៏អស្ចារ្យ និងក្លាយកាន់តែដូចជាព្រះវរបិតាសួគ៌របស់អ្នក ។ នៅក្នុងដំណើរនេះ អ្នកនឹងជួបនូវគ្រាលំបាក ការសាកល្បងផ្ទាល់ខ្លួន ការបាក់ទឹកចិត្ត និងការខកចិត្តដែលអាចនឹងធ្វើឲ្យមានការថប់បារម្ភ ។ ឥឡូវនេះប្រហែលជាអ្នកមានអារម្មណ៍ថា ជាប់ផុងនៅក្នុងគ្រាមួយបែបនេះ ។
នៅក្នុងគ្រាទាំងនេះ សូមចងចាំថា ព្រះវរបិតាសួគ៌របស់អ្នកស្រឡាញ់អ្នក ។ ទ្រង់តែងតែធ្វើដូច្នោះ ហើយទ្រង់នឹងធ្វើដូច្នោះជានិច្ច ។ ដោយសារតែសេចក្ដីស្រឡាញ់ដ៏គ្មានព្រំដែន និងដ៏ល្អឥតខ្ចោះរបស់ទ្រង់ នោះទ្រង់បានបញ្ជូនព្រះរាជបុត្រារបស់ទ្រង់គឺព្រះយេស៊ូវគ្រីស្ទដើម្បីពង្រឹងអ្នក ហើយជួយអ្នកឲ្យដើរឆ្ពោះទៅមុខ ។ ហើយព្រះយេស៊ូវបានយាងមកដោយសារទ្រង់ស្រឡាញ់អ្នកយ៉ាងជ្រាលជ្រៅផងដែរ ។
ជាអកុសល មនុស្សមួយចំនួនពុំដឹងថា ពួកគេត្រូវការព្រះអង្គសង្គ្រោះនោះទេ ។ ដូចជាមនុស្សទូទៅដែលធ្វើកំហុសដែលពួកគេពុំអាចជួសជុលបានដែរ ពួកគេពុំយល់ថា ពួកគេដកពិសោធន៍នូវការបាត់បង់ដែលពួកគេពុំអាចស្ដារឡើងវិញបាន ហើយជួបប្រទះនឹងឧបសគ្គ និងសោកនាដកម្មដែលពួកគេពុំអាចស៊ូទ្រាំដោយខ្លួនឯងបាន ។ ឬក៏អាចយកឈ្នះលើអំពើបាប និងសេចក្ដីស្លាប់ដោយខ្លួនឯងបានឡើយ ។ វាមានន័យថា ពួកគេ—និងមនុស្សទាំងអស់—ត្រូវការដង្វាយធួនរបស់ព្រះយេស៊ូវគ្រីស្ទ ជាមួយនឹងកម្លាំងដែលដង្វាយធួនអាចមាន ។
អ្នកប្រហែលជាគិតថា « ល្អខ្លាំងណាស់ អែលឌើរ ហូឡិន តើខ្ញុំអាចធ្វើឲ្យព្រះយេស៊ូវគ្រីស្ទក្លាយជាកម្លាំងរបស់ខ្ញុំយ៉ាងដូចម្ដេច ? » ដើម្បីជួយឆ្លើយសំណួរនេះ សូមអនុញ្ញាតឲ្យខ្ញុំចែកចាយវិធីមួយចំនួនដែលព្រះយេស៊ូវគ្រីស្ទពង្រឹងអ្នកជារៀងរាល់ថ្ងៃ ។
សេចក្ដីសង្គ្រោះខិតជិតដល់ហើយ ដោយ ដាវីឌ ម៉ាក់ក្លេឡេន
ទ្រង់មានព្រះចេស្ដាដើម្បីពង្រឹងអ្នក
នៅយប់ចុងក្រោយក្នុងជីវិតរមែងស្លាប់របស់ទ្រង់ នោះព្រះយេស៊ូវបានយាងចូលទៅក្នុងសួនច្បារគែតសាម៉ានី ។ នៅទីនោះ ទ្រង់បានលុតជង្គង់នៅកន្លែងដែលមានសុទ្ធតែដើមអូលីវ ហើយបានចាប់ផ្ដើមលើកដាក់លើអង្គទ្រង់នូវអំពើបាបនៃពិភពលោក ។ ការរងទុក្ខដ៏មហិមា និងដ៏និរន្ដរនេះ« បានបណ្ដាលឲ្យ[ ទ្រង់ ]…ហូរព្រះលោហិតចេញពីគ្រប់រន្ធញើសទាំងអស់ » ( គោលលទ្ធិ និងសេចក្តីសញ្ញា ១៩:១៨ ) ។
បន្ទាប់មកគេយកព្រះយេស៊ូវទៅឆ្កាងនៅកាលវ៉ារី ។ នៅទីនោះទ្រង់បានបំពេញការពលិកម្មដ៏ធួនរបស់ទ្រង់ ។ ទ្រង់បានស្ម័គ្រព្រះទ័យប្រគល់ជីវិតរបស់ទ្រង់ ហើយបន្ទាប់មកទ្រង់បានមានព្រះជន្មរស់ឡើងវិញដោយជោគជ័យ ។ នៅរដូវកាលបុណ្យអ៊ីស្ទើរនេះ ខ្ញុំរីករាយនៅក្នុងការប្រកាសថា ព្រះយេស៊ូវគ្រីស្ទមានព្រះជន្មរស់ ! ខ្ញុំសូមប្រកាសថា ដើម្បីធ្វើបែបនោះបាន ទ្រង់មិនត្រឹមតែលើកបន្ទុកនៃអំពើបាបឲ្យបានធូរស្រាលនោះទេ ប៉ុន្តែក៏ « [ បាន ] រងការឈឺចាប់ និងទុក្ខវេទនា និងការល្បួង គ្រប់បែបយ៉ាង » ( អាលម៉ា ៧:១១ បានបន្ថែមការបញ្ជាក់ន័យ ) ។
ព្រះអង្គសង្រ្គោះមានព្រះទ័យយល់ពីការឈឺចាប់ និងទុក្ខព្រួយ ហើយស៊ូទ្រាំតាមរបៀបរបស់ព្រះអង្គផ្ទាល់ នូវរាល់ទុក្ខព្រួយ និងការរងទុក្ខដែលអ្នក ខ្ញុំ និងព្រលឹង ទាំងអស់ ដែលធ្លាប់រស់នៅ ឬនឹងធ្លាប់រស់នៅ ។ ដោយសារអ្វីដែលទ្រង់បានឆ្លងកាត់ទាំងផ្លូវកាយ ផ្លូវចិត្ត និងខាងវិញ្ញាណសម្រាប់អ្នក ទ្រង់ជ្រាបដឹងពីរបៀបដើម្បីពង្រឹងអ្នក ។
ប្រហែលជាវាពិបាកសម្រាប់អ្នកដើម្បីជឿថា ព្រះយេស៊ូវនឹងចាប់ព្រះទ័យជួយអ្នកតែម្នាក់ក្នុងចំណោមមនុស្សរាប់លាននាក់ដែលមានអាយុដូចគ្នា ។ ប្រសិនបើអ្នកធ្លាប់គិតថា ទ្រង់មានកិច្ចការសំខាន់ជាងដែលត្រូវធ្វើ ជាជាងមកពង្រឹងអ្នកក្នុងគ្រាដែលត្រូវការ នោះសូមគិតអំពីទ្រង់នៅក្នុងសួនច្បារ សូមគិតអំពីទ្រង់នៅលើឈើឆ្កាងនោះ ។ « ទ្រង់បានរងទុក្ខហូរលោហិត និងសុគត »២ សម្រាប់អ្នក ដោយសារទ្រង់បានជ្រាបដឹងថា អ្នកមានតម្លៃដើម្បីឲ្យទ្រង់ធ្វើបែបនេះ ។ ទ្រង់នៅតែជ្រាបដឹងអំពីការណ៍នោះ ។ ទ្រង់គឺ ពិតជា ចាប់ព្រះទ័យ ស្ម័គ្រព្រះទ័យ និងអាចជួយ អ្នក—ឥឡូវនេះ និងជារៀងរហូត ។ ទ្រង់ប្រទានព្រះជន្ម របស់ទ្រង់ ដើម្បីទ្រង់អាចពង្រឹងអ្នក នៅពេលអ្នកទទួលយកការអញ្ជើញរបស់ទ្រង់ឲ្យផ្លាស់ប្តូរជីវិត ៖ ចូរមកឯខ្ញុំ » ( ម៉ាថាយ ១១:២៨ ) ។
សូមជ្រើសរើសដើរជាមួយទ្រង់
វាជាជម្រើសរបស់អ្នកក្នុងការដើរតាមព្រះយេស៊ូវគ្រីស្ទ ហើយធ្វើឲ្យទ្រង់ជាកម្លាំងរបស់អ្នក ។ ទ្រង់ « បានគូសដាន ហើយដឹកនាំផ្លូវ »៣ ត្រឡប់ទៅកាន់ព្រះវរបិតាសួគ៌វិញ ។ តាមពិតទៅ ទ្រង់ គឺជា « ផ្លូវ ជាសេចក្តីពិត ហើយជាជីវិត » ( យ៉ូហាន ១៤:៦ ) ។
អ្នកស្វែងរកផ្លូវដោយការឱបក្រសោបយកដំណឹងល្អនៃព្រះយេស៊ូវគ្រីស្ទ នៅពេលអ្នកអនុវត្តសេចក្តីជំនឿលើទ្រង់ ហើយប្រែចិត្តពីអំពើបាបរបស់អ្នក ។ អ្នកធ្វើឲ្យទំនាក់ទំនងរបស់អ្នកជាមួយទ្រង់កាន់តែស៊ីជម្រៅ នៅពេលអ្នកជ្រើសរើសទទួលបុណ្យជ្រមុជទឹកក្នុងព្រះនាមទ្រង់ ហើយទទួលអំណោយទាននៃព្រះវិញ្ញាណបរិសុទ្ធ ។ បន្ទាប់មក អ្នកបន្តនៅលើផ្លូវនៃដំណឹងល្អរបស់ទ្រង់ ដោយការរក្សាបទបញ្ញត្តិ ទទួលពិធីបរិសុទ្ធ គោរពសេចក្តីសញ្ញា និងរស់នៅក្នុងនាមជាសិស្សរបស់ទ្រង់ ។
សកម្មភាពទាំងនេះបង្កើតទំនាក់ទំនងដ៏មានឥទ្ធិពល—ជាទំនាក់ទំនងនៃសេចក្ដីសញ្ញា—ដែលចងអ្នកយ៉ាងមានសុវត្ថិភាពជាមួយព្រះគ្រីស្ទ—និងទ្រង់ចំពោះអ្នក ។ នៅពេលអ្នកដើរជាមួយទ្រង់ ទ្រង់និងព្រះវរបិតាក្លាយជាប្រភពចុងក្រោយនៃការដឹកនាំ និងកម្លាំងខាងវិញ្ញាណរបស់អ្នក ។ បន្ទាប់មក អ្នកអាចឆ្ពោះទៅមុខដោយសុវត្ថិភាព និងសប្បាយរីករាយជារៀងរាល់ថ្ងៃ ប្រែក្លាយកាន់តែដូចជាទ្រង់ទាំងទ្វេ ហើយនៅថ្ងៃណាមួយត្រឡប់ទៅរស់នៅជាមួយទ្រង់ ទាំងទ្វេវិញ ហើយមានជីវិតបែបដែលទ្រង់ទាំងទ្វេរស់នៅ ។
Look unto Me [ មើលមកឯខ្ញុំ ] ដោយអេវ៉ា ខូលេវ៉ា ធីម៉ូធី
ឆ្ពោះទៅមុខក្នុងកម្លាំងរបស់ទ្រង់
អស់ពីចិត្តរបស់ខ្ញុំ ខ្ញុំសូមថ្លែងទីបន្ទាល់ថា ព្រះយេស៊ូវគឺជាព្រះគ្រីស្ទ ។ នៅពេលអ្នកឈានជើងទៅរកទ្រង់ ឈោងទៅរកទ្រង់ ហើយអញ្ជើញទ្រង់ធ្វើជាកម្លាំងរបស់អ្នក នោះទ្រង់នឹងមករកអ្នក ហើយអ្នកនឹងរកឃើញទ្រង់ ។៤ គ្មានជម្រើសណាដែលអ្នកអាចធ្វើបាន ដែលដាក់អ្នកនៅកន្លែងដែលហួសពីសមត្ថភាពរបស់ទ្រង់ឈោងទៅនោះទេ ។ ខ្ញុំជឿអស់ពីចិត្តពីអ្វីដែលខ្ញុំបាននិយាយពីមុន ៖ « វាមិនអាចទៅរួចសម្រាប់អ្នក [ ឬនរណាម្នាក់ ] ដើម្បីលិចទៅជ្រៅជាងពន្លឺនៃដង្វាយធួនរបស់ព្រះគ្រីស្ទដ៏និរន្ដន៍ ដែលអាចចែងចាំងដល់បានទេ » ។៥
ប្រសិនបើអ្នកមករកព្រះគ្រីស្ទជាមុន និងរក្សាព្រះបញ្ញត្តិទាំងឡាយរបស់ទ្រង់ជានិច្ចដោយ « អស់ពីដួងចិត្ត » ( នីហ្វៃទី ៣ ១៨:៣២ ) ទ្រង់នឹងធ្វើដំណើរជីវិតជាមួយអ្នក ។ ទ្រង់នឹងចាប់ដៃអ្នក ហើយធ្វើជាសេចក្ដីសង្ឃឹមរបស់អ្នក ។ ទ្រង់នឹងធ្វើជាកម្លាំងរបស់អ្នក ។ ហើយទ្រង់នឹងនាំមកនូវសុភមង្គលដ៏យូរអង្វែង សេចក្តីសុខសាន្តពិតប្រាកដ និងអំណរដ៏មហិមាដល់អ្នក ។
ក្នុងនាមជាសាក្សីពិសេសម្នាក់របស់ទ្រង់ ខ្ញុំសូមថ្លែងទីបន្ទាល់ និងសន្យាថា នេះគឺជាការពិត ។