« អព្ភូតហេតុដែលយើងត្រូវការរាល់ថ្ងៃ » ដើម្បីកម្លាំងនៃយុវជន ខែ មីនា ឆ្នាំ ២០២៤ ។
កម្លាំងដើម្បីយកឈ្នះអំពើបាប
អព្ភូតហេតុដែលយើងត្រូវការរាល់ថ្ងៃ
ប្រសិនបើព្រះស្រឡាញ់យើង ហេតុអ្វីបានជាទ្រង់បង្គាប់យើងឲ្យផ្លាស់ប្តូរ ហើយប្រែចិត្ត ? នេះគឺជាសេចក្ដីពិតមួយចំនួនអំពីអំពើបាប និងការពលិកម្មដ៏ធួនរបស់ព្រះយេស៊ូវគ្រីស្ទ ។
រចនារូបភាពដោយ អ័ដាម ហៅលីង
ចុះប្រសិនបើអ្នកអាចឃើញអព្ភូតហេតុដែលព្រះយេស៊ូវគ្រីស្ទបានធ្វើក្នុងកំឡុងពេលទ្រង់មានព្រះជន្មនៅលើផែនដីវិញ ? មើលទ្រង់ប្រោសអ្នកឈឺ និងអ្នកស្លាប់ឲ្យរស់ឡើងវិញ ? ទោះបីជាយើងមិនអាចត្រឡប់ទៅពេលវេលាទាំងនោះវិញ ដើម្បីបានឃើញអព្ភូតហេតុទាំងនោះក៏ដោយ ក៏មានភាពអស្ចារ្យមួយរបស់ព្រះយេស៊ូវគ្រីស្ទ ដែលយើងអាចមើលឃើញជារៀងរាល់ថ្ងៃដែរ ។ ហើយវាជារឿងសំខាន់បំផុតមួយនៃការណ៍ទាំងអស់ ៖ ទ្រង់បានយកឈ្នះអំពើបាប ។
ការពិតអំពីអំពើបាប
អ្នកខ្លះប្រហែលជាឆ្ងល់ថាហេតុអ្វីវាសំខាន់យ៉ាងនេះ ។ បន្ទាប់ពីអ្វីៗទាំងអស់ ទោះបីជាយើងធ្វើខុសបន្តិចបន្តួចក៏ដោយ ក៏ព្រះនៅតែស្រឡាញ់យើងមែនទេ ? ពិតប្រាកដហើយ ទាំងព្រះវរបិតាសួគ៌ និងព្រះយេស៊ូវគ្រីស្ទស្រឡាញ់យើងយ៉ាងជ្រាលជ្រៅ ។ ប៉ុន្តែដោយសារទ្រង់ទាំងទ្វេស្រឡាញ់យើងយ៉ាងខ្លាំង ទើបមានកិច្ចការជាច្រើនដែលត្រូវពិភាក្សាតទៅទៀត ។
នៅពេលទ្រង់យាងទៅជួបសាសន៍នីហ្វៃ ព្រះអង្គសង្រ្គោះបានបង្រៀនយើងពីមូលហេតុការយកឈ្នះអំពើបាបសំខាន់ខ្លាំងយ៉ាងនេះថា ៖ « គ្មានអ្វីដែលពុំស្អាតណាអាចចូលទៅក្នុងនគររបស់ [ ព្រះ ] បានឡើយ » ( នីហ្វៃទី ៣ ២៧:១៩ ) ។
ទ្រង់ពុំបានមានព្រះបន្ទូលថា « គ្មានអ្វីដែលពុំស្អាតណា លើកលែងតែកំហុសតិចតួចឡើយ » ។ ទ្រង់បានបង្រៀនថា រាល់អំពើបាប ( គឺជាការមិនគោរពតាមព្រះបញ្ញត្តិរបស់ព្រះដោយចេតនា ) រារាំងយើងពីការរស់នៅជាមួយទ្រង់ម្តងទៀត ។
នោះហើយជាបញ្ហា ។ យើងមិនអាចធ្វើតាមព្រះបញ្ញត្តិរបស់ព្រះបានល្អឥតខ្ចោះនៅឡើយទេ ។ នេះជាការពិតសម្រាប់មនុស្សទាំងអស់—ព្យាការីដ៏សុចរិតបំផុត អ្នកមានបាបដ៏អាក្រក់បំផុត និងមនុស្សគ្រប់គ្នាដែលនៅចន្លោះនោះ ។ ដោយសារយើងមិនអាចលុបកំហុសរបស់យើងដោយខ្លួនឯង នោះអំពើបាបនឹងរារាំងយើងមិនឲ្យចូលទៅក្នុងនគររបស់ព្រះឡើយ ។
អព្ភូតហេតុនៃដង្វាយធួនរបស់ព្រះគ្រីស្ទ
ដោយមានអំណរគុណ ព្រះវរបិតាសួគ៌ និងព្រះយេស៊ូវគ្រីស្ទបានជ្រាបដឹងថាយើងត្រូវការជំនួយ ។ នៅក្នុងសួនច្បារគែតសេម៉ានី និងនៅលើឈើឆ្កាង ព្រះយេស៊ូវគ្រីស្ទបានលើកដាក់លើអង្គទ្រង់ផ្ទាល់នូវរាល់ការឈឺចាប់ ជំងឺ ទុក្ខលំបាក ពិការភាព និងអំពើបាបរបស់យើង ( សូមមើល អាលម៉ា ៧:១១–១៣ ) ។ ដោយសារទ្រង់ជាព្រះរាជបុត្រាដ៏ល្អឥតខ្ចោះរបស់ព្រះ និងជាកូនដែលមានជីវិតរមែងស្លាប់របស់ម៉ារា ទ្រង់អាចបង់ថ្លៃបាបដែលគ្មាននរណាម្នាក់អាចបង់បានឡើយ ។
ហេតុនោះហើយដែលទ្រង់អាចមានព្រះបន្ទូលទៅកាន់សាសន៍នីហ្វៃថា « ដូច្នេះគ្មានអ្នកណាអាចចូលទៅក្នុងទីម្រាករបស់ [ ព្រះ ] បានទេលើកលែងតែ អ្នកនោះបានលាងសម្លៀកបំពាក់របស់ខ្លួនដោយនូវលោហិតរបស់យើងពីព្រោះមកពីសេចក្តីជំនឿរបស់គេ និងការប្រែចិត្តពីគ្រប់ទាំងអំពើបាបរបស់គេ និងការស្មោះត្រង់របស់គេរហូតដល់ទីបំផុត » ( នីហ្វៃទី ៣ ២៧:១៩ ) ។
ឱ អព្ភូតហេតុដ៏អស្ចារ្យដោយព្រោះតែព្រះយេស៊ូវគ្រីស្ទ យើងអាចត្រូវបានសម្អាតពីអំពើបាបរបស់យើង ! នៅពេលដែលយើងដឹងថាការពលិកម្មដ៏ធួនរបស់ព្រះអង្គសង្គ្រោះគឺចាំបាច់សម្រាប់យើង នោះយើងអាចពឹងផ្អែកលើកម្លាំងរបស់ទ្រង់ នៅពេលយើងមានជំនឿលើទ្រង់ ប្រែចិត្តពីអំពើបាបរបស់យើង ហើយបន្តដើរតាមទ្រង់ដោយស្មោះត្រង់រហូតដល់ទីបញ្ចប់ ។ វាជាអព្ភូតហេតុមួយដែលអាចកើតឡើងជារៀងរាល់ថ្ងៃ នៅពេលអ្នកទុកចិត្តលើព្រះចេស្ដារបស់ទ្រង់ ហើយធ្វើសកម្មភាពដោយសេចក្តីជំនឿ !