Fakataha ʻo e Hoʻatā Sāpaté
Fiefia ʻi he Meʻaʻofa ʻo e Ngaahi Kī ʻo e Lakanga Fakataulaʻeikí
Ngaahi Konga Fakamatala
Ka ne taʻe-ʻoua ʻa e ngaahi kī ʻo e lakanga fakataulaʻeikí, he ʻikai ha taha ʻiate kitautolu te ne maʻu ʻa e ngaahi ouau mo e ngaahi fuakava mahuʻinga ʻoku nau haʻi kitautolu ki hotau ngaahi ʻofaʻangá ʻo taʻengatá mo fakaʻatā ke tau iku ʻo nofo mo e ʻOtuá. …
ʻOku ʻomi ʻe he ngaahi kī ʻo e lakanga fakataulaʻeikí kiate kitautolu ʻa e mafai ke fakaaʻu ʻa e ngaahi tāpuaki kotoa pē naʻe palōmesi kia ʻĒpalahamé, ki he tangata mo e fefine tauhi fuakava kotoa pē. ʻOku hanga ʻe he ngāue fakatemipalé ʻo fakaʻatā ʻa e ngaahi tāpuaki fakaʻofoʻofa ko ʻení ki he fānau kotoa ʻa e ʻOtuá, neongo pe ko e fē ʻa e feituʻu pe taimi naʻa nau moʻui aí pe ʻoku nau moʻui aí. …
ʻOku hanga ʻe he ngaahi kī ʻo e lakanga fakataulaʻeikí kuo fakafoki mai ʻi he Palōfita ko Siosefa Sāmitá ʻo ʻai ke lava ʻa e tangata mo e fefine tauhi fuakava kotoa pē ʻo fiefia ʻi he ngaahi faingamālie fakalaumālie fakafoʻituitui ʻoku fakaofó. …
Siʻoku ngaahi tokoua mo e tuofāfine ʻofeina, ko ʻeku palōmesí ʻeni. He ʻikai ha meʻa ʻe tokoni lahi ange kiate koe ke ke pīkitai ai ki he vaʻa ukameá ka ko e faʻa moihū ʻi he temipalé ʻo fakatatau mo ho tūkungá. He ʻikai ha meʻa te ne maluʻi lahi ange koe ʻi hoʻo fepaki mo e ngaahi ʻao fakapoʻuli ʻo e māmaní. He ʻikai ha meʻa te ne fakaivia hoʻo fakamoʻoni ki he ʻEiki ko Sīsū Kalaisí mo ʻEne Fakaleleí pe tokoni ke mahino lahi ange kiate koe ʻa e palani fisifisimuʻa ʻa e ʻOtuá. He ʻikai ha meʻa te ne fakanonga lahi ange ho laumālié ʻi he lolotonga ʻa e taimi ʻo e mamahí. He ʻikai ha meʻa te ne fakaava lahi ange ʻa e ngaahi langí. He ʻikai pē ha meʻa!
Ko e temipalé ko e matapā ia ki he ngaahi tāpuaki maʻongoʻonga taha ʻa e ʻOtuá maʻatautolú, he ko e temipalé ko e potu pē ia ʻe taha ʻi māmani te tau lava ai ʻo maʻu kotoa ʻa e ngaahi tāpuaki naʻe talaʻofa kia ʻĒpalahamé. …
Tuku muʻa ke tau fiefia ʻi hono fakafoki mai ʻo e ngaahi kī ʻo e lakanga fakataulaʻeikí, ʻa ia ʻokú ta lava ai ʻo fiefia ʻi he tāpuaki fakalaumālie kotoa ʻoku tau loto-fiemālie mo taau ke maʻú.