Fakataha ʻo e Hoʻatā Tokonakí
Fakataha kia Kalaisi
Ngaahi Konga Fakamatalá
Haʻu Kia Kalaisi, tā ʻe Casey Childs
ʻE lava ke maʻu ʻa e uouangataha mo Kalaisi mo ʻetau Tamai Hēvaní, ʻo fakafou ʻi he Fakalelei ʻa e Fakamoʻuí. …
Neongo ʻoku mafatukituki moʻoni ʻa e ngaahi fiemaʻu ki he papitaisó, ka ʻoku faingofua moʻoni ia. ʻOku kau ai ʻa e loto-fakatōkilalo ʻi he ʻao ʻo e ʻOtuá, ko ha loto-mafesifesi mo ha laumālie fakatomala, fakatomala mei he ngaahi angahala kotoa pē, toʻo kiate kitautolu ʻa e huafa ʻo Sīsū Kalaisí, kātaki ki he ngataʻangá, mo fakahaaʻi ʻi heʻetau ngaahi ngāué kuo tau maʻu ʻa e Laumālie ʻo Kalaisí.
ʻOku mahuʻinga ke fakalaumālie ʻa e meʻa kotoa pē ʻoku fiemaʻu kae toki lava ʻo papitaisó. … ʻOku ʻi ai ʻa e tuʻutuʻuni fakalaumālie tatau pē ki he masivá mo e koloaʻiá.
ʻOku ʻikai ha tuʻutuʻuni ki he matakalí, tuʻunga tangata pe fefiné, pe faʻahinga ʻo e kakaí. …
Koeʻuhí ʻoku tau “tatau” ʻi he ʻao ʻo e ʻOtuá, ʻoku ʻikai ke fuʻu mahuʻinga ke fakamamafaʻi hotau ngaahi faikehekehé. …
… Ke maʻu ʻa e ngaahi tāpuaki ʻo e Fakalelei ʻa e Fakamoʻuí, kuo pau ke tau ngāue ʻaki ʻetau tauʻatāina ke filí ke fili ʻa Kalaisi mo talangofua ki Heʻene ngaahi fekaú. …
ʻE lava ʻe he meimei tokotaha kotoa pē ʻo fai ʻa e ngaahi fili mahuʻinga tahá ʻo tatau ai pē pe ko e hā honau talēnití, ivi malavá, ngaahi faingamālié, pe tūkunga fakaʻekonōmiká. …
ʻI heʻetau fehangahangai mo e ngaahi feliliuaki ʻo e moʻuí, ʻoku lahi e hoko ha ngaahi meʻa ʻoku ʻikai ke tau lava ʻo mapuleʻi. … ʻOku tau lava ʻo puleʻi ʻa e ngaahi fili ʻoku mahuʻinga tahá. …
ʻOku tau mapuleʻi ʻa e ngaahi meʻa ki he tefitoʻi moʻoní, ʻulungāngá, tauhi ʻo e tui fakalotú, mo e moʻui angatonú. Ko ʻetau tui mo e lotu ki he ʻOtua ko e Tamaí mo Hono ʻAlo ko Sīsū Kalaisí ko ha fili ia ʻoku tau fakahoko. …
ʻOku totonu ke tau fāifeinga ke fakakau mai ʻa e niʻihi kehé ʻi hotau haʻofanga uouangataha mo Kalaisí. …
ʻOku fakatahatahaʻi kitautolu ʻe heʻetau ʻofa mo e tui kia Sīsū Kalaisí mo ʻetau hoko ko e fānau ʻa ha Tamai Hēvani ʻofá. Ko e uho ʻo e kau moʻoní, ko e fakataha mai kia Kalaisi.