Fakataha ʻo e Hoʻatā Sāpaté
Ko e Ngaahi Temipalé, Ngaahi Fale ʻo e ʻEikí ʻOku ʻi he Ngaahi Feituʻu Lahi ʻi he Māmaní
Ngaahi Konga Fakamatalá
Kuó ke fifili nai pe ko e hā kuo fakahinohino ai ʻe he ʻEikí ʻa ʻEne palōfitá ke fakafonu ʻa māmani ʻi he taimí ni ʻaki Hono ngaahi temipale māʻoniʻoní? …
… Koe ʻuhinga ʻe tahá he kuó Ne talaʻofa te Ne fakamālohia mo tāpuekina ʻa Hono Kāingalotu ʻo e fuakavá ʻi he lotolotonga ʻa e moveuveu mo e ngaahi ʻahiʻahi ʻo e māmaní, pea ʻoku fakahoko ʻEne ngaahi talaʻofá! …
ʻI Hono falé, ʻoku fakakoloaʻi moʻoni kitautolu ʻaki ha mālohi fakalangi. ʻOku fakapapauʻi mo fakamālohia ʻa ʻetau tui kia Sīsū Kalaisí mo ʻetau ʻofa kiate Iá. ʻOku tau ako ke ʻofa lahi ange ʻiate Ia. ʻOku fakapapauʻi fakalaumālie mai hotau tuʻunga moʻoní pea mo e ngaahi taumuʻa ʻo e moʻuí. ʻI heʻetau faivelengá, ʻoku tāpuekina kitautolu ʻaki ha maluʻi mei he ngaahi ʻahiʻahí mo e ngaahi fakahohaʻá. ʻOku tau ongoʻi ʻa e ʻofa ʻa hotau Fakamoʻuí ʻi Heʻene hiki hake kitautolu mei hotau ngaahi faingataʻaʻiá mo e mamahí. ʻOku fakateunga kitautolu ʻaki ʻa e mālohi ʻo e ʻOtuá. …
ʻE hoku ngaahi kaumeʻa ʻofeina, kapau ʻoku tau malava pea kuo teʻeki ai ke tau fakalahi ʻetau ō ki he temipalé, tau kumi maʻu pē muʻa ha taimi ke moihū ai ʻi he fale ʻo e ʻEikí. …
Ko e temipalé ko e fale moʻoni ia ʻo e ʻEikí. ʻOku ou palōmesi atu kapau te mou omi ʻi he tuʻunga taau mo faʻa lotu ki Hono fale māʻoniʻoní, ʻe fakateunga kimoutolu ʻaki Hono mālohí, ʻe ʻiate kimoutolu ʻa Hono huafá, ʻe tokangaʻi kimoutolu ʻe Heʻene kau ʻāngeló, pea te mou tupulaki ʻi he tāpuaki ʻo e Laumālie Māʻoniʻoní. …
ʻI he ʻaho ko ʻeni ʻo e puputuʻú mo e moveuveú, ʻoku ou fakamoʻoni ko e temipalé ko Hono fale māʻoniʻoní ia pea ʻe tokoni ia ke tauhi kitautolu, maluʻi kitautolu, mo teuteuʻi kitautolu ki he ʻaho nāunauʻia ʻe toe hāʻele mai ai hotau Fakamoʻuí mo ʻEne kau ʻāngelo māʻoniʻoní, ʻi he fakaʻeiʻeiki, mālohi, mo e nāunauʻia lahi.