Fakataha ʻo e Pongipongi Tokonakí
Ke ʻAi ʻe Kimoutolu ʻa e ʻEiki ko Sīsū Kalaisí
Ngaahi Konga Fakamatalá
ʻOku fiemaʻu ʻe heʻetau Tamaí ha vā fetuʻutaki ʻoku loloto ange mo Hono ngaahi fohá mo e ʻofefiné kotoa, ka ko e fili ia ʻatautolu. ʻI heʻetau fili ke ʻunuʻunu ofi ange kiate Ia ʻo fakafou ʻi ha vā fetuʻutaki ʻi he fuakavá, ʻokú Ne lava ai ke ʻunuʻunu ofi mai ange kiate kitautolu mo tāpuekina lahi ange kitautolu.
… Ko Sīsū Kalaisi ʻa e uho ʻo e ngaahi fuakava kotoa pē ʻoku tau faí, pea ʻoku malava ke maʻu ʻa e ngaahi tāpuaki ʻo e fuakavá koeʻuhí ko ʻEne feilaulau fakaleleí.
Ko e papitaiso ʻi he fakaukú ko e fakataipe ia ʻo e matapā ʻoku tau hū ai ki ha vā fetuʻutaki ʻi he fuakava mo e ʻOtuá. Ko e fakauku ko ia ʻi he vaí pea toe tuʻu haké ko ha fakataipe ia ʻo e pekia mo e Toetuʻu ʻa e Fakamoʻuí ki ha moʻui foʻoú. … ʻOku tau lau ʻi he Fuakava Foʻoú ʻo pehē: “He ko kimoutolu kotoa pē kuo papitaiso kia Kalaisí, kuo mou ʻai ʻa Kalaisi” [Kalētia 3:27]. …
ʻOku fakataumuʻa foki ʻa e ouau ʻo e sākalamēnití ki he Fakamoʻuí. ʻOku fakataipe ʻe he maá mo e vaí ʻa e sino ʻo Kalaisí mo Hono taʻataʻá naʻe lilingi maʻatautolú. … ʻI heʻetau kai mo inu ʻa e ngaahi fakaʻilonga ʻo Hono sinó ʻa e kakanó mo e taʻataʻá, ʻoku fakataipe leva ʻa e hoko ʻa Kalaisi ko hotau konga [vakai, Sione 6:56]. …
ʻI heʻetau fai ha ngaahi fuakava mo e ʻOtuá ʻi he fale ʻo e ʻEikí, ʻoku tau toe fakaloloto ange ai hotau vā fetuʻutaki mo Iá. ʻOku fakataumuʻa ʻa e meʻa kotoa pē ʻoku tau fai ʻi he temipalé ki he palani ʻa ʻetau Tamaí maʻatautolú, ʻa ia ko hono uhó ʻa e Fakamoʻuí mo ʻEne feilaulau fakaleleí. …
… ʻOku fakamanatu mai ʻe hotau kāmeni temipalé ʻoku ʻufiʻufi kitautolu ʻe he Fakamoʻuí mo e ngaahi tāpuaki ʻo ʻEne Fakaleleí ʻi hono kotoa ʻo ʻetau moʻuí. ʻI heʻetau tui fakaʻaho ʻa e kāmeni ʻo e lakanga fakataulaʻeiki māʻoniʻoní, ʻoku hoko leva ʻa e fakataipe fakaʻofoʻofa ko iá ko hatau konga. …
… ʻOku ou fakamoʻoni ʻoku mahuʻinga fau ʻa e ngaahi tāpuaki maʻongoʻonga ʻo e vā fetuʻutaki ʻi he fuakava ko iá.