Fakataha ʻo e Pongipongi Sāpaté
Ko e Founga Mālohi mo Maʻa ʻo e Tokāteline ʻa Kalaisí
Ngaahi Konga Fakamatalá
Let Him In (Tuku Ke Ne Hū Mai), tā ʻa Malory Fiso
ʻOku fakatupulaki ʻa e ivi fakalaumālié “ʻi he moʻuí kotoa ʻi heʻetau toutou pukenimā e tokāteline ʻa Kalaisí.” Naʻe akonaki ʻa Palesiteni Lāsolo M. Nalesoni ʻo pehē, ʻi hono fai iá, ʻokú ne fakatupu ha “siakale mālohi ʻo e angamaʻá” [Ikuʻi ʻa Māmani mo Maʻu ha Fiemālie,” Liahona, Nōvema 2022, 97]. Ko hono moʻoní, ko e ngaahi ʻelemēniti ʻo e tokāteline ʻa Kalaisí—hangē ko e tui ki he ʻEiki ko Sīsū Kalaisí, fakatomalá, fokotuʻu ha vā fetuʻutaki ʻi he fuakava mo e ʻEikí ʻi he papitaisó, maʻu ʻa e meʻa-foaki ʻo e Laumālie Māʻoniʻoní, mo e kātaki ki he ngataʻangá—ʻoku ʻikai ʻuhinga ia ke aʻusia tuʻo taha pē, pea ʻikai toe fakakaukau ki ai. …
ʻOku fiemaʻu ke tanumaki fakaʻaho ʻetau tui kia Sīsū Kalaisí. ʻOku tanumaki ia ʻi heʻetau lotu fakaʻahó, ako fakaʻaho ʻa e folofolá, fakakaukauloto fakaʻaho ki he lelei ʻa e ʻOtuá, fakatomala fakaʻaho, pea muimui fakaʻaho ʻi he ngaahi ueʻi ʻa e Laumālie Māʻoniʻoní. …
… ʻOku tupulaki foki ʻa e mālohí ʻi heʻetau feinga ke talangofua ki he ngaahi fono ʻa e ʻOtuá mo fakatomalá. …
Ko e konga hoko ʻo e tokāteline ʻa Kalaisí ko e papitaisó, ʻa ia ʻoku kau ai ʻa e papitaiso ʻi he vai mo e papitaiso ʻi he Laumālie Māʻoniʻoní ʻo fakafou ʻi he hilifakinimá. Neongo ʻoku hoko tuʻo taha ʻa e papitaisó, ka ʻoku tau toutou fakafoʻou ʻetau fuakava ʻo e papitaisó ʻi heʻetau maʻu ʻa e sākalamēnití. …
ʻI hono tākiekina lahi ange ʻe he Laumālie Māʻoniʻoní ʻetau moʻuí, ʻoku tau fakalakalaka mo toutou fakatupulaki ai ʻa e ngaahi ʻulungaanga faka-Kalaisí. … Pea ʻoku tau maʻu ai ʻa e mālohi fakalangi ʻoku fiemaʻu ke kātaki ki he ngataʻangá. …
ʻOku ou fakaafeʻi kimoutolu ke toutou moʻui ʻaki ʻa e tokāteline ʻa Kalaisí mo tupulaki hokohoko ʻi he ʻiloʻilo pau pea tokoniʻi ʻa e niʻihi kehé ʻi heʻenau fonongá.