Fakataha ʻo e Pongipongi Sāpaté
Ngaahi Fuakavá mo e Ngaahi Fatongiá
Ngaahi Konga Fakamatalá
Ko e fuakavá ko ha tukupā ia ke fakahoko ha ngaahi fatongia pau. ʻOku mahuʻinga ʻa e ngaahi tukupā fakatāutahá ki hono puleʻi ʻetau moʻui fakafoʻituituí pea mo e ngāue ʻa e sōsaietí. …
ʻI he hokosia ʻa e taimi ki hono Fakafoki Mai ʻa e kakato ʻo e ongoongolelei ʻo Sīsū Kalaisí, naʻe ui ʻe he ʻOtuá ha palōfita, ko Siosefa Sāmita. … [Ko e Tohi ʻa Molomoná] ʻa e tefitoʻi maʻuʻanga tokoni lahi ki hono Fakafoki Mai ʻa e kakato ʻo e ongoongoleleí, kau ai ʻa e palani ʻa e ʻOtuá maʻa ʻEne fānaú, pea ʻoku fonu ʻa e Tohi ʻa Molomoná ʻi he ngaahi fakamatala ki he ngaahi fuakavá. …
Naʻe mahuʻinga ʻa e ngaahi fuakavá ʻi hono Fakafoki Mai ʻo e ongoongoleleí. ʻOku hā mahino ʻeni ʻi he ngaahi meʻa naʻe fakahinohino ʻe he ʻEikí ke fai ʻe he Palōfitá ʻi hono fokotuʻu Hono Siasí. …
ʻOku langa ʻe he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní ha ngaahi temipale ʻi he funga ʻo e māmaní. Ko honau taumuʻá pē ke faitāpuekina ʻa e fānau fuakava ʻo e ʻOtuá ʻaki ʻa e moihū ʻi he temipalé pea mo e ngaahi fatongia toputapu mo e mālohi pea mo e ngaahi tāpuaki taʻengata ʻo e haʻi kia Kalaisi ʻoku nau maʻu ʻi he fuakavá.
ʻOku ʻiloa ʻa e Siasi ʻo Sīsū Kalaisí ko ha siasi ʻokú ne fakamamafaʻi ʻa e fakahoko ha ngaahi fuakava mo e ʻOtuá. Ko e ngaahi fuakavá ko ha meʻa pau ia ʻi he ouau takitaha ʻo e fakamoʻuí mo e hakeakiʻí ʻoku fakahoko ʻi he Siasi ko ʻeni kuo fakafoki maí. Ko e ouau ʻo e papitaisó mo hono ngaahi fuakava fekauʻakí ko ha ngaahi fiemaʻu ia ke hū ki he puleʻanga fakasilesitialé. Ko e ngaahi ouau mo e ngaahi fuakava ʻoku fekauʻaki mo e temipalé ko ha ngaahi fiemaʻu ia ki he hakeakiʻi ʻi he puleʻanga fakasilesitialé, ʻa ia ko e moʻui taʻengatá, ko e “meʻaʻofa ʻoku mahuʻinga taha ʻi he ngaahi meʻaʻofa kotoa pē ʻa e ʻOtuá” [Tokāteline mo e Ngaahi Fuakava 14:7]. Ko e tefitoʻi taumuʻa ia ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní.