Fakataha ʻo e Hoʻatā Tokonakí
Ko ha Fiefia Māʻolunga Ange
Ngaahi Konga Fakamatalá
Ko e pangó, ʻoku hangē ʻoku faingataʻa ki ha kakai tokolahi ke nau maʻu ʻa e fiefiá. …
… Ko e ongoʻi loto-mamahí ʻoku ʻikai ko ha fakaʻilonga ia ʻo e ʻikai ke lavameʻá. ʻI he moʻui ko ʻení, ʻoku takaua maʻu pē ʻa e fiefiá mo e mamahí. …
Neongo ia, kuó u ʻosi aʻusia foki ʻa e kamataʻanga foʻou ʻokú ne fakafonu ʻa e laumālié ʻaki ʻa e fiefia ʻoku maʻongoʻonga, ʻo ʻikai kei lava ʻo mapukepuké. Kuó u ʻilo ʻiate au pē ʻoku maʻu ʻa e loto-falala moʻoni mo e nonga ko ʻení ʻi he muimui ki he Fakamoʻuí mo ʻaʻeva ʻi Hono Halá.
Ko e nonga ʻokú Ne ʻomí ʻoku ʻikai tatau ia mo e meʻa ʻoku ʻomi ʻe he māmaní. ʻOku lelei ange ia. ʻOku ʻuhingamālie mo māʻoniʻoni ange ia. …
Kuo teʻeki fufuuʻi heʻetau Tamai ʻi Hēvaní ʻa e hala ki he fiefiá. ʻOku ʻikai ko ha fakapulipuli ia. ʻOku lava ke maʻu ia ʻe he taha kotoa pē!
ʻOku talaʻofa ia maʻanautolu ʻoku ʻaʻeva ʻi he hala ʻo e tuʻunga fakaākongá, muimui ʻi he ngaahi akonaki mo e sīpinga ʻo e Fakamoʻuí, tauhi ʻEne ngaahi fekaú, pea fakaʻapaʻapaʻi ʻa e ngaahi fuakava kuo nau fai mo e ʻOtuá. …
… Ko e natula ia ʻo e ngaahi meʻa fakamatelie kotoa pē ke fakaʻau ʻo motuʻa, popo, maumau pe ʻosi hono ʻaongá. Ka ko e fiefia faka-ʻOtuá ʻoku taʻengata ia, he ʻoku taʻengata ʻa e ʻOtuá. …
… Tuku muʻa ke u fokotuʻu atu ha fanga kiʻi sitepu ke ke kamata ʻaki ʻa e fononga mahuʻinga ko ʻeni ke ʻiloʻi ʻa e fiefia haohaoá. …
Lolotonga ʻa e ngaahi ʻaho, uike mo e māhina ka hoko maí, ʻoku ou fakaafeʻi koe ke ke:
-
Fakaʻaongaʻi ho taimí ʻi ha ngāue fakamātoato ʻaki ʻa e kotoa ho lotó ke ke ʻunuʻunu ke ofi ki he ʻOtuá.
-
Fekumi faivelenga ki he fanga kiʻi momeniti fakaʻaho ʻo e ʻamanaki leleí, nongá mo e fiefiá.
-
ʻOatu ʻa e fiefiá ki he niʻihi ʻoku mou feohí. …
Fakatauange te tau fekumi kotoa ki he fiefia māʻolunga ange ʻoku maʻu mei he līʻoa ʻetau moʻuí ki heʻetau Tamai Hēvaní mo Hono ʻAlo ʻOfaʻangá.