Fakataha ʻo e Pongipongi Tokonakí
Ngaahi Ivi ʻo ha Mālohi Fūfūnaki
Ngaahi Konga Fakamatalá
ʻE kāinga, ʻoku ou fakamoʻoni ʻoku fanongo ʻa e ʻOtuá ki he lotu kotoa pē ʻoku tau faí, pea ʻokú Ne tali takitaha kinautolu ʻo fakatatau mo e founga kuó Ne fokotuʻutuʻu maʻa hotau fakahaohaoaʻí. … ʻOku ʻi ai ha ngaahi ʻuhinga ia ko e ʻOtuá pē taha ʻokú Ne ʻafioʻi ʻa e ʻuhinga ʻoku kehe ai hono tali ʻo e ngaahi lotú mei heʻetau ʻamanakí—ka ʻoku ou palōmesi atu ʻoku ongona kinautolu, pea ʻoku tali kinautolu ʻo fakatatau ki Heʻene ʻofa taʻe-tūkuá mo e taimi-tēpile fakalangí.
Kapau “ʻe ʻikai te [tau] kole taʻetotonu,” [2 Nīfai 4:35], ʻoku ʻikai ha fakangatangata ia ki he taimi, feituʻu, pe ko e meʻa ʻoku totonu ke tau lotuá. …
… ʻOku totonu ke tau lotu fakafoʻituitui, ʻi hotau ngaahi fāmilí, pea ʻi ha faʻahinga haʻofanga pē. ʻOku fiemaʻu ke tau fakaʻaongaʻi ʻa e lotú ko ha pā maluʻi mei he filí, pea kapau ʻe ʻi ai ha taimi ʻoku ʻikai ke tau ongoʻi ai ke lotu, ʻe lava ke tau fakapapauʻi ko e momou ke lotú ʻoku ʻikai mei he ʻOtuá ia, ʻa ia ʻokú Ne hōifua ke fetuʻutaki mo ʻEne fānaú ʻi ha faʻahinga taimi pē pea ʻi he taimi kotoa pē. … Pea ʻi he taimi ʻoku ʻikai ke tau ʻilo ai ʻa e founga pe ko e meʻa ke tau lotuá, ʻoku totonu ke tau kamata, pea hokohoko atu, kae ʻoua kuo tataki kitautolu ʻe he Laumālie Māʻoniʻoní ki he lotu ʻoku totonu ke tau fakahokó. …
Ko hono aofangatukú, te tau lava ʻo vakai ki he sīpinga ʻa e Fakamoʻuí, ʻa ia naʻe lotu maʻu peé. …
ʻI he puipuituʻa ko ia ʻo hono ikunaʻi ʻe Kalaisi ʻa e maté mo ʻEne meʻaʻofa naʻe toki foaki mai kiate au ʻo ha ngaahi uike pe māhina siʻi ʻi he moʻui fakamatelié, ʻoku ou fai ai ha fakamoʻoni molumalu ki hono moʻoni ʻo e moʻui taʻengatá pea mo e mahuʻinga ke tau fakamātoato ʻi heʻetau palani ki aí.