Fakataha ʻo e Hoʻatā Tokonakí
Ngaahi Meʻa Kotoa Pē Ki Heʻetau Leleí
Ngaahi Konga Fakamatalá
ʻI he māmani fonu faingataʻaʻia ko ʻení, “ʻoku tau ʻilo ʻoku fengāueʻaki fakataha ʻa e ngaahi meʻa kotoa pē ke lelei ai ʻa kinautolu ʻoku ʻofa ki he ʻOtuá” [Loma 8:28]. …
Ko ha talaʻofa fisifisimuʻa! Fakapapau fakafiemālie mei he ʻOtuá Tonu! …
… ʻE lava ke tāpuekina kitautolu mo e niʻihi kehé ʻi ha ngaahi founga ʻoku ʻikai mafakakaukaua ʻi heʻetau moʻui ʻaki ʻa e tuí, ngaahi ʻahiʻahí mo e ngaahi feilaulau ne ʻikai ʻaupito ke tau mei filí.
ʻOku tau fakalahi ʻetau tui mo e falala ki he ʻEikí, ʻe lava ke fengāueʻaki fakataha ʻa e ngaahi meʻa kotoa pē ki heʻetau leleí ʻi heʻetau maʻu ha fakakaukau ʻoku taʻengatá; maʻu ha mahino ko hotau ngaahi faingataʻaʻiá ʻoku malava ke “fuofuoloa siʻi pē”; ʻiloʻi ko e ngaahi mamahí ʻe lava ke fakatapui ia ke hoko ko ha lelei kiate kitautolu; ʻiloʻi ko e ngaahi fakatuʻutāmakí, mate taʻeʻamanekiná mo e mahaki fakatupu vaivai ki he sinó ko ha konga ia ʻo e moʻui fakamatelié; pea falala ʻoku ʻikai ke ʻomi ʻe heʻetau Tamai Hēvani ʻofá ha ngaahi faingataʻa ke tauteaʻi pe fakamaauʻi ʻaki kitautolu. …
… ʻOku fengāueʻaki fakataha ʻa e ngaahi meʻa kotoa pē ki he leleí ʻi he taimi ʻoku tau ngāue fakatauhi ai ʻo hangē ko ia naʻe mei fakahoko ʻe Sīsū Kalaisí.
Naʻe fakamatalaʻi ʻe ha tamai naʻe vahe ange ke hoa ngāue fakaetauhi mo hono foha ʻoku ʻi he toʻu akonakí, “Ko e ngāue fakaetauhí ʻa e taimi ʻoku tau mahulu hake ai mei he hoko pē ko ha kaungāʻapi ʻokú ne ʻomi ʻa e fanga kiʻi kūkisí, ʻo hoko ko ha ngaahi kaungāmeʻa falalaʻanga, mo ha kau ʻuluaki tokoni fakalaumālie.” ʻOku hoko ʻa e kau ki he fuakava mo Sīsū Kalaisí, ke fakafiemālie, fakafehokotaki, mo fakatapui. …
Ko e Tohi ʻa Molomoná ko ha fakamoʻoni ia ʻoku tau lava ʻo puke ʻi hotau nimá, ko Sīsū ʻa e Kalaisí pea ʻoku fakahoko ʻe he ʻOtuá ʻEne ngaahi kikité. …
ʻI he fakaʻau ke ofi mai ange ʻa e ngaahi temipalé kiate kitautolu ʻi ha ngaahi feituʻu lahi, ko ha feilaulau fakatemipale te tau lava ʻo fakahokó ko e fekumi tuʻo lahi ange ki he māʻoniʻoní ʻi he fale ʻo e ʻEikí. …
Ko e taumuʻa ʻo e Fakatupú pea mo e natula ʻo e ʻOtuá Tonu ʻi he moʻuí ni pea mo e moʻui taʻengatá, ke fakatahatahaʻi ʻa e ngaahi meʻa kotoa pē ki heʻetau leleí.
Ko e taumuʻa taʻengata ʻeni ʻa e ʻEikí. Ko ʻEne fakakaukau taʻengatá ia. Ko ʻEne talaʻofa taʻengatá ia. …
… Haʻu ki he ʻOtua ko ʻetau Tamaí mo Sīsū Kalaisi. Falala ʻokú Na moʻui, ʻofeina koe, mo finangalo ʻa e ngaahi meʻa kotoa pē koeʻuhi ko hoʻo leleí.