Fakataha ʻo e Hoʻatā Sāpaté
Ko e Fakamoʻoni ʻo Sīsuú
Ngaahi Konga Fakamatalá
Ko e hā ʻa e fakamoʻoni ʻo Sīsuú?
Ko e fakamoʻoni ia ʻa e Laumālie Māʻoniʻoní ko e ʻAlo fakalangi Ia ʻo e ʻOtuá, ko e Mīsaiá mo e Huhuʻí. …
ʻIkai ngata pē ʻi he fakamoʻoni ko ʻení, ka ʻoku ʻi ai ʻa e foʻi fehuʻi, Ko e hā ʻa e meʻa ʻoku tau fai ki aí?
ʻOku “maʻu” ʻe kinautolu ʻo e puleʻanga fakasilestialé ʻa hono kakato ʻo e fakamoʻoni ʻo Sīsuú ʻaki ʻenau papitaiso, maʻu ʻa e Laumālie Māʻoniʻoní, mo ikuna ʻi he tuí. …
ʻOku ʻuhinga ki he hā ke loto-toʻa ʻi he fakamoʻoni ʻo Sīsuú?
… Ko e loto-toʻa ʻi he fakamoʻoni ʻo Sīsuú ʻoku kau moʻoni ai hono tanumaki mo fakamālohia ʻa e fakamoʻoni ko iá. ʻOku ʻikai fakaliʻeliʻaki ʻe he kau ākonga moʻoní ʻa e fanga kiʻi meʻa iiki ʻoku nau pukepuke mo fakamālohia ʻenau fakamoʻoni kia Sīsuú, hangē ko e lotú, ako ʻo e folofolá, tauhi ʻo e Sāpaté, maʻu ʻo e sākalamēnití, fakatomalá, ngāue fakaetauhí mo e moihū ʻi he fale ʻo e ʻEikí. …
ʻOku toe fokotuʻu mai foki ʻe he loto-toʻá ke te loto-tauʻatāina ʻo fakahā ki he kakaí ʻete fakamoʻoní. …
Ko ha konga ʻe taha ʻo e loto-toʻa ʻi he fakamoʻoni ʻo Sīsuú ko e tokanga ki Heʻene kau talafekaú. …
Ko e loto-toʻa ʻi he fakamoʻoni ʻo Sīsuú ʻoku ʻuhinga ia ke fakalotolahiʻi ʻa e niʻihi kehé, ʻi he lea mo e ngāue, ke nau loto-toʻa mo kinautolu, tautautefito ki he niʻihi ʻi hotau fāmili tonú. …
Ko ha tafaʻaki fakaʻosi ʻe taha ʻo e loto-toʻa ʻi he fakamoʻoni ʻo Sīsuú te u lave ki aí, ko ʻetau tulifua fakafoʻituitui ki he māʻoniʻoni fakatāutahá. …
Ko ʻeku fakaafé ke ke ngāue ʻi he taimí ni ke maʻu ho tuʻunga ko ha tokotaha ʻoku loto-toʻa ʻi he fakamoʻoni ʻo Sīsuú.