Fakataha ʻo e Hoʻatā Sāpaté
Ko e Fakafehokotaki ʻo e Ongo Fekau Lalahí
Ngaahi Konga Fakamatalá
Tau sivisiviʻi takitaha angé ʻa e ongo fekau lalahi ʻe uá, ʻa ia naʻe fakahā mo fakamatala ʻi he tali ʻa Sīsū Kalaisí. ʻI heʻetau fai iá, fakalaulauloto ki he ʻata ʻo e hala fakakavakava fisifisimuʻá.
Ko e ʻuluakí, ke ke ʻofa ki he ʻEikí ʻaki ho lotó, laumālié, mo e ʻatamaí kotoa.
… ʻOku ʻuluaki fakatefito ʻa e ʻofa ʻi he ʻEikí ʻi ho lotó—ʻa ho natula totonú. ʻOku kole mai ʻa e ʻEikí ke ke ʻofa ʻaki ho laumālié kotoa—ko hoʻo moʻui kuo fakatapui kakató—pea fakaʻosí, ke ʻofa ʻaki ho ʻatamaí kotoa—ʻa ho potó mo e fakakaukau mahinó. …
… Te u lava ʻo ʻofa ʻi he Tamai Hēvaní mo Sīsū Kalaisi, ʻa ia ʻoku iku leva ki he lotú, ako folofolá, mo e moihū ʻi he temipalé. ʻOku tau ʻofa ʻi he Tamaí mo e ʻAló ʻo fakafou ʻi heʻetau totongi vahehongofulú, tauhi ʻa e Sāpaté ke māʻoniʻoní, moʻui maʻa mo angamaʻá, pea mo talangofuá. …
Ko e ʻofa ki he ʻEikí ʻoku fakaiku ia ki he fiefia taʻengatá!
… ʻOku ʻikai kakato ʻa e ʻofa ki he ʻEikí kapau ʻoku tau liʻaki hotau kaungāʻapí. ʻOku kau ʻi he ʻofa ki tuʻa ko ʻení ʻa e fānau kotoa ʻa e ʻOtuá ʻo ʻikai ha kaunga ki he tuʻunga tangata pe fefiné, tuʻunga fakasōsialé, matakalí, tuʻunga fakasekisualé, vāhengá, taʻu motuʻá, pe anga fakafonuá. …
… Ke lava ʻe ha faʻahinga hala fakakavakava pē ʻo fai ʻa e meʻa naʻe langa ke ne fakahokó, kuo pau ke ngāue fakataha hono ngaahi tauá ʻi he faaitaha kakato. ʻOku pehē pē ʻa e makatuʻunga ʻetau malava ke muimui ʻia Sīsū Kalaisí ʻi hotau ivi mo e mālohi ke moʻui ʻaki ʻa e fekau ʻuluakí mo e uá ʻi he potupotutatau mo e līʻoa tatau kiate kinaua fakatouʻosi. …
… Fakatauange ʻe fakahanga hotau lotó mo ʻetau fakakaukaú ki ʻolunga ke tau ʻofa ki he ʻEikí pea fakahanga ki tuʻa ke ʻofa ki hotau kaungāʻapí.