Fakataha ʻo e Pongipongi Tokonakí
Loto-Falala ki he Fuakava ʻoku Fakafou ʻia Sīsū Kalaisí
Ngaahi Konga Fakamatalá
Siʻi kāinga ʻofeina, ko kinautolu ʻoku nau loto-falala moʻoni ki he ngaahi fuakava naʻe fai ʻi he fale ʻo e ʻEikí ʻo fakafou ʻia Sīsū Kalaisí, ʻoku nau maʻu ʻa e ngaahi ivi mālohi taha te tau lava ʻo maʻu ʻi he moʻuí ni. …
Te tau maʻu fēfē ha faʻahinga loto-falala pehē ʻo fakafou ʻia Sīsū Kalaisí? ʻOku maʻu ia ʻi he loto-fakatōkilaló, ʻi hono fakatefito ʻetau moʻuí ʻi he Fakamoʻuí, moʻui ʻaki ʻa e ngaahi tefitoʻi moʻoni ʻo e ongoongolelei ʻo Sīsū Kalaisí, maʻu ʻa e ngaahi ouau ʻo e fakamoʻuí mo e hakeakiʻí, mo hono tauhi ʻa e ngaahi fuakava ʻoku tau fai mo e ʻOtuá ʻi Hono fale māʻoniʻoní. …
… ʻOku ou ʻiloʻi ko e taimi ʻoku ʻafioʻi ai ʻe he ʻEikí ha kiʻi ʻata ʻo e loto-holí pe ko ha kiʻi ngāue māʻoniʻoni ʻi heʻetau loto-fiemālie ke fakatefito ʻetau moʻuí ʻiate Ia pea ʻi he ngaahi ouau mo e ngaahi fuakava ʻoku tau fai ʻi Hono falé, te Ne tāpuekina kitautolu, ʻi Heʻene founga haohaoá, ʻaki ʻa e ngaahi mana mo e ʻaloʻofa ongongofua ʻoku tau fiemaʻú.
Ko e fale ʻo e ʻEikí ʻa e feituʻu ʻe lava ke liliu ai kitautolu ki ha ngaahi tuʻunga māʻolunga mo māʻoniʻoni ange. … ʻOku ou fakapapauʻi atu ʻi heʻetau maʻu ʻa e laumālie ʻo e fale ʻo e ʻEikí te ne liliu fakaʻaufuli kitautolu. …
ʻE kei fakafiefia, tākiekina, mo faitāpuekina kitautolu ʻi he hokohoko atu mo e fakavaveʻi hono langa ʻo e ngaahi temipalé. Ka ko e meʻa ʻoku mahuʻinga angé, ʻi heʻetau liliu ʻetau teuteu ke hū ki he temipalé, te tau liliu ai ʻetau aʻusia ʻi he temipalé, pea te ne liliu ʻetau moʻui ʻi tuʻa ʻi he temipalé. Fakatauange ke fakafonu ʻe he liliu ko ʻení kitautolu ʻaki ha loto-falala ki heʻetau ngaahi fuakava māʻoniʻoni naʻe fai mo e ʻOtuá ʻo fakafou ʻia Sīsū Kalaisí.