Soqoni ena Mataka ni Vakarauwai
Ena Vinaka Na Veika Kece Ena Vuku ni Veiyalayalati ni Valetabu
Veitikina lavetaki
Taciqu kei na ganequ, au vakadinadinataka ena yalomalumalumu nida gole i valetabu, eda na rawa ni vakananumi tale ena ituvaki tawamudu ni yaloda, na noda veiwekani kei Tamada kei na Luvena vakalou, kei na noda gagadre levu duadua meda lesu tale ki na noda itikotiko mai lomalagi. …
Ena ruku ni veiliutaki veivakauqeti nei Peresitedi Nelson, na Turaga sa vakatotolotaka, ka na tomani me vakatotolotaki, na tara ni veivaletabu e vuravura raraba. Oqo me rawa kina vei ira kecega na luve ni Kalou mera ciqoma na cakacaka vakalotu ni veivakabulai kei na bula vakacerecerei ka cakava ka maroroya na veiyalayalati tabu. …
Na vakaitavi vakawasoma ena cakacaka vakalotu ni valetabu ena rawa ni bulia e dua na ivakarau ni veiqaravi ena yalodina vua na Turaga. Ni o muria ka nanumi ira tiko na nomu veiyalayalati ni valetabu, o sureta tiko na veitokani ni Yalo Tabu me vaqaqacotaki iko ka vakasavasavataki iko. …
Ena veiyalayalati ni veivauci e loma ni valetabu sa rawa kina meda ciqoma na veivakadeitaki ni isema lomani ni matavuvale ka na tomani tiko ni oti na mate ka na tu ga me tawamudu. Na rokovi tiko ni veiyalayalati ni vakawati kei na matavuvale e caka ena valetabu ni Turaga ena sabaya tani na veika ca ka dau yaco mai na nanumi koya vakataki koya kei na dokadoka. …
Na veivakatovolei, na bolebole, kei na mosi ni yalo ena yaco mai vakaidina vei keda kece sara. E sega ni dua vei keda e taqomaki mai na “votonikau ni yago” [raica na 2 Korinica 12:7–10]. Ia, nida gole i valetabu ka nanuma na noda veiyalayalati, eda rawa ni vakavakarau me ciqoma na veidusimaki yadua mai vua na Turaga. …
Taciqu kei na ganequ lomani, au vakadinadinataka ni sega tale ni dua na ka e bibi cake mai na nomu rokova na veiyalayalati o cakava se o na cakava ena valetabu.