Soqoni ena Mataka ni Sigatabu

Na iNaki ni Kalou Me Kauti Iko Vua

Veitikina lavetaki

Mai vei Elder Patrick Kearon

Ena Kuoramu ni iApositolo Le Tinikarua

iVakatakilakila

Patrick Kearon

Na veika kece me baleta na ituvatuva ni Tamada vei ira na Luvena e tuvai me kauti ira taucoko vua. …

Sa kena ibalebale beka oqo ni sa vakatarai na veika kece ena ivakarau ni noda bulataka na noda bula?. …. Sega, ka segai sara. E vakamatatataki sara ga ena Nona ivakavuvuli kece sara na bula ena itutu cecere ni itovo savasava sa ikaci ni tubu yadudua, ki na vakabauti Karisito me vakayaco veisau qaqa e yaloda. …

Kevaka eda vakabauta na inaki ni yavu ni Kalou me vakabulai keda, vueti keda, solia vei keda na loloma veivueti, ka kauta mai vei keda na marau, na cava na inakinaki ni Luvena ka kauta vata mai na ituvatuva levu oqo? …

Na lomai Jisu sa i koya na loma i Tamada dauloloma! E vinakata o Koya me rawa vei ira kece na luvena na Tamada me ciqoma na takete ena icavacava ni yavu— na bula tawamudu vata kei Rau. E sega ni dua e tarovi mai na rawaka lagilagi oqo. ….

Na iVakabula, na iVakatawa ni Sipi Vinaka, e lako me vakasaqarai ira na Nona sipi ka yali me yacova ni sa kunei ira tale. …

Sega, e sega ni biuta na itatarovi kei na ilatilati; e vakagalalataka o Koya. E sega ni biuti iko tu e tautuba; e kidavaki iko i loma. …

Oqo na itukutuku vinaka! E sega ni tukuni rawa na noqu vakavinavinaka kina vei dina rawarawa oqo. Na inakinaki ni Tamada, Nona ituvatuva, Nona inaki, Nona gagadre, kei na Nona inuinui kece me vakabulai iko, me solia vei iko na vakacegu kece, me kauti iko, kei ira kece o lomana, i vale.

Kilai Elder Patrick Kearon

A sucu ena ika 18 ni Julai, 1961 mai Carlisle, Cumberland, Igiladi.
A vakaitikotiko mai Arapea me vica vata na yabaki kei na nona matavuvale.
Tekivu vuli ena koronivuli curuibure mai Igiladi ni se qai yabaki 10. “E vaka me a malumu sara ga o Harry Potter mai Hogwarts ni vakatauvatani,” a kaya me baleta na koronivuli curuibure. “E sega ni rawarawa.” Ia, mai Arapea kei Igiladi, a kaya kina, “Au a sotava e vuqa na tamata duidui” ka “vulica mai na veika au sotava ni vuqa na duidui e vinaka, ka totoka sara! Na noqu bula esa vakavutuniyautaki sara vakalevu mai na veimaliwai kei ira ka duidui na nodra itovo kei na vakabauta mai na vuqa na veiyasa i vuravura.”.
A katia na yavana na batibasaga ni se qai yabaki vitu ni keba tiko.
Ni se gone yabaki ciwa ena vanua dravuisiga ni Arapea, a vakavulici koya o tamana ena draiva.
Papitaiso ena Yakavi ni Siganisucu ena 1987 ni sa yabaki 26.
Sotavi watina, o Jennifer, ni sikovi Lodoni ena dua na vuli ki vanua tani. Erau a vakamau ena Valetabu na Oakland California ena 1991.
E va na luvena: Sean (ka a mate ni se gone dramidrami), Elizabeth, Susannah, kei Emma.
Cakacaka e Peritania, Saudi Arabia, kei Amerika ena levu na tabana ni cakacaka. Erau a cicivaka kei watina na nodrau bisinisi ni veitaratara.
Tokoni me Vakaitutu Raraba ena ika 3 ni Epereli, 2010.
Kacivi ki na Kuoramu ni iApositolo Le Tinikarua ena 7 ni Tiseba, 2023. “Na veikacivi tabu oqo e veirawai ka veivakayalomalumalumutaki vei au,” a kaya. “Au na gadreva meu vakararavi taucoko vua na iVakabula niu segata meu yaco me vaka na ka e gadreva o Koya ka wasea na noqu ivakadinadina ni Nona loloma kei na rarama. Au lomani Koya. Au na segata meu qaravi Koya ena noqu vinaka taucoko.”