Soqoni ena Mataka ni Sigatabu
Masu, E Tiko O Koya
Veitikina lavetaki
Na iloloma cava o rawa ni masuta? Era levu tu, ia nikua au via wasea e tolu: …
iMatai, Masuta mo Kila
Na cava o gadreva mo kila? …
Ni o kila ni Tamada Vakalomalagi e bula dina ka lomani iko o Koya, o na rawa ni bula ena yaloqaqa kei na inuinui! …
Ena so na gauna ona vinakata mo kila se cava e yaco tiko kina edua na ka dredre ena nomu bula se cava o sega ni ciqoma kina edua na veivakalougatataki o masulaka. Vakavuqa na taro vinaka duadua me tarogi vua na Tamada Vakalomalagi e sega ni na cava na vuna ia na cava meu cakava. …
… Na Tamada Vakalomalagi ena dusimaki iko ni o kerei Koya se cava o rawa ni cakava kei na cava o rawa ni vulica.
iKarua, Masuta mo Tubu
Na Tamada Vakalomalagi e vinakata me vukei iko mo tubu! …
O vinakata beka mo tubu ena dauvosota se ena lomadina? O vinakata beka mo tubu ena dua na kilaka maqosa? O dau mamadua beka ka vinakata mo tubu ena yalodoudou. “Masu, e tiko o Koya.” Mai na Nona Yalotabu, sa rawa ni veisau na yalomu, ka rawa ni o ciqoma na kaukauwa.
iKatolu, Masuta mo Vakaraitaka
O rawa ni masu mo vukei mo vakaraitaka na loloma nei Tamada Vakalomalagi vei ira na tani. Mai vua na Yalona, na Tamada Vakalomalagi ena vukei iko mo raica ni edua e rarawa tiko mo rawa ni vakacegui koya. E rawa ni vukei iko o Koya mo vakaraitaka na Nona loloma ena nomu vosota edua. E rawa ni solia vei iko o Koya na yaloqaqa mo qarava edua ka wasea vei ira nira sa luve ni Kalou: …
Wasea vua na Tamada Vakalomalagi na cava e tiko e lomamu.