Soqoni ena Yakavi ni Sigatabu
Na Valetabu, Sa Robota na Vuravura na Vale ni Turaga
Veitikina lavetaki
O sa bau vakataroga na vuna e dusimaka kina na Nona parofita na Turaga ena gauna oqo me roboti vuravura ena Nona vale savasava, Nona valetabu? …
… Edua na vuna oya ni ena loma ni veilecayaki kei na veitemaki ni vuravura, sa yalataka o Koya me vaqaqacotaki ira ka vakalougatataki ira na Nona tamata ni veiyalayalati Yalododonu! …
Ena loma ni Nona vale, e soli vakaidina kina vei keda na kaukauwa vakalomalagi. Noda vakabauti Jisu Karisito kei na noda lomani Koya e vakadeitaki ka vaqaqacotaki kina. Eda vulica meda lomani Koya vakalevu cake sara. E vakadeitaki vakayalo vei keda na keda ivakatakilakila dina kei na inaki eso ni bula. Nida yalodina tiko, eda na vakalougatataki ena noda taqomaki mai na veitemaki kei na veivagolei tani. Eda vakila na loloma ni iVakabula ni laveti keda tani mai na veika dredre kei na noda rarawa. Eda vakaiyaragitaki ena kaukauwa ni Kalou. …
Kemuni na itokani lomani, kevaka eda rawata ia eda se bera ni vakalevutaka cake na noda dau tiko ena valetabu, meda vakaraica e levu cake na gauna meda sokalou kina ena vale ni Turaga. …
Na valetabu e vale dina ni Turaga. Au yalataka vei iko ni o lako mai ena kilikili kei na masumasu ki na Nona vale tabu, o na vakaiyaragitaki ena Nona kaukauwa, ena tu vei iko na yacana, era na vakatawani iko na Nona agilosi, ka na tubu ena veivakalougatataki ni Yalo Tabu. …
Ena gauna ni veilecayaki ka yavavala oqo, au vakadinadinataka ni noda veivaletabu yadua e sa Nona vale ka ra veivuke me maroroi keda, taqomaki keda, ka vakarautaki keda kina siga lagilagi, ena lesu tale mai kina kei ira Nona agilosi savasava ena iukuuku, kaukauwa, kei na lagilagi cecere na noda iVakabula.