Soqoni ena Mataka ni Sigatabu
Na Mana, Savasava ni Vunau i Karisito
Veitikina lavetaki
Vakacurumi Koya Yani ki Loma, mai vei Malory Fiso
Na tubu vakayalo ena yaco mai “ena loma ni dua na gauna ni bula taucoko ni da katona vakawasoma na ivakavuvuli i Karisito.” Ni vakayacora vakakina, e vakavulica o Peresitedi Russell M. Nelson, ena vakavuna e dua na “ivakarau kaukauwa ni ivalavala dodonu” [Vakamalumalumutaka na Vuravura ka Kunea na Vakacegu,” Liaona, Nove. 2022, 97]. E dina, na veitiki ni vunau i Karisito—me vaka na vakabauta na Turaga ko Jisu Karisito, veivutuni, curuma e dua na veiyalayalati kei na Turaga ena papitaiso, ciqoma na isolisoli ni Yalo Tabu, ka vosota ki na ivakataotioti—e sega ni kedra inaki me yaco ga vakadua, ka toqai na kedra lomanibai.
E gadrevi me vakabulabulataki e veisiga na vakabauti Jisu Karisito. Ena vakabulabulataki nida masu, vulica na ivolanikalou, vakananuma na vinaka ni Kalou, veivutuni ka muria na veivakauqeti ni Yalo Tabu e veisiga. …
… Sa vakakina ni tarai cake na totolo ni toso nida segata na talairawarawa ki na lawa ni Kalou ka veivutuni… .
Na ikarua ni tiki ni vunau i Karisito na papitaiso, ka okati kina na papitaiso ena wai ka, ena veivakadeitaki, na papitaiso ena Yalo Tabu. Na papitaiso e dua ga na ka vakataki koya, eda vakavouya wasoma na noda veiyalayalati ni papitaiso ni da vakayagataka na sakaramede.
Ni sa veivakayarayarataki vakaukauwa cake na Yalo Tabu ena noda bula, eda sa na toso ka yaco e veigauna na noda vakaitovotaki ena itovo Vakarisito. … Ka eda na rawata na mana vakalomalagi e gadrevi me da vosota me yacova na ivakataotioti. …
Au sureti kemuni mo ni bulataka na ivunau i Karisito vakawasoma e veigauna ka vukei ira eso tale me ra gole kina.