Soqoni ena Mataka ni Vakarauwai
Ia Dou Vakaisulu, ena Turaga ko Jisu Karisito
Veitikina lavetaki
E vinakata na Tamada e dua na isema ni veiwekani titobu kei ira na Luvena tagane kei na yalewa, ia e noda na digidigi. Nida digia meda toro voleka Vua ena dua na isema ni veiyalayalati e vakatara vei Koya me toro volekati keda mai ka vakalougatataki keda vakalevu cake.
… O Jisu Karisito e usutu ni veiyalayalati kece eda cakava, ka vakarautaki na veivakalougatataki ni veiyalayalati baleta na Nona veisorovaki.
Na papitaiso ena tabadromuci e wai e imatamata vakatakilakila eda curu yani ki na isema ni veiwekani ni veiyalayalati kei na Kalou. Noda tabadromuci e wai kei na noda mata cake mai e ivakatakarakara ni mate ni iVakabula kei na Tucake tale, ki na bula vou. … Ena Veiyalayalati Vou eda wilika, “Ni sai Karisito dou sa vakasulumi kemudou kina, oi kemudou yadua sa papitaisotaki vei Karisito.” [Kalatia 3:27]. …
Na cakacaka vakalotu ni sakaramede e dusimaki keda vua na iVakabula. Na madrai kei na wai e ivakatakilakila ni yago i Karisito kei na dra e dave ena vukuda. … Ena gauna eda sa kania ka gunuva na ivakatakarakara ni yagona kei na Nona dra, oqo e vakatakilakilataka ni o Karisito sa tiki ni noda bula [raica na Joni 6:56]. …
Ena gauna eda vakayacora kina na veiyalayalati kei na Kalou ena vale ni Turaga, eda vakatitobutaka na isema ni veiwekani kei Koya. Na veika kece eda cakava e valetabu e dusimaki keda ki na ituvatuva nei Tamada baleti keda, ka tiko saraga e lomadonu na iVakabula kei na Nona Veisorovaki. …
… Na noda qameni ni valetabu e vakananuma vei keda ni na maroroi keda ena noda bula taucoko na iVakabula kei na Nona Veisorovaki. Nida daramaka na qameni ni matabete tabu e veisiga, na ivakatakilakila talei oqori sa tiki ni noda bula. ….
… Au vakadinadinataka ni veivakalougatataki cecere oya ni isema veiwekani ni veiyalayalati e veirauti kei na kena isau.