Satedei Moning Sesen
Yufala I Mas Tekem Masta blong Yumi Jisas Kraes We Hem I Olsem Klos blong Faet blong Yufala
Samfala Pat
Papa blong yumi i wantem wan moa dip rilesensip wetem evri pikinini boe mo gel blong Hem, be hem i joes blong yumi. Taem yumi jusum blong go kolosap long Hem tru long wan kavenan rilesensip, i letem Hem blong kam moa kolosap long yumi mo blesem yumi fulwan.
… Jisas Kraes i stamba blong evri kavenan we yumi mekem, mo ol kavenan blesing oli kam posibol tru long sakrifaes blong Hem we i pemaot praes.
Baptaes andanit long wota hem i saen blong get we yumi go insaed long hem i go long wan kavenan rilesensip wetem God. Blong go insaed mo kam antap bakegen long wota hem i saen blong ded blong Sevya mo Laef Bakegen long ded i go long niu laef. … Long Niu Testeman yumi ridim, “Yufala evriwan we i baptaes finis blong joen long Kraes, yufala i tekem Kraes finis, olsem we yufala i putum klos long yufala” [Galesia 3:27]. …
Mo tu, odinens blong sakramen i poen i go long Sevya. Bred mo wota oli ol saen blong bodi blong Kraes mo blad we i bin ron from yumi. Taem yumi tekem aksen blong stap kakae mo dring long ol tabu saen blong mit mo blad blong Hem, olsem saen, Kraes i kam pat blong yumi [luk long Jon 6:56]. …
Taem yumi mekem ol kavenan wetem God long haos blong Lod, yumi stap mekem rilesensip blong yumi wetem Hem i kam moa strong. Evri samting we yumi mekem insaed long tempol oli poenem yumi i go long plan blong yumi we Papa blong yumi i mekem, we i lukluk moa long Sevya mo bigfala sakrifaes blong Atonmen blong Hem. …
… Ol tempol gamen blong yumi oli rimaenem yumi se Sevya mo ol blesing blong Atonmen blong Hem i kavremap yumi truaot laef blong yumi. Taem yumi werem gamen blong tabu prishud ia evri dei, naesfala saen ia i kam wan pat blong yumi. …
… Mi testifae se ol bigfala blesing blong kavenan rilesensip ia oli gat bigfala praes.