Sandei Aftenun Sesen
Ol Tempol, Ol Haos blong Lod long Evri Ples Raon long Wol
Samfala Pat
?Yu eva tingting se from wanem Lod bae i givim daereksen long profet blong Hem naoia blong putum ol tabu haos blong Hem, ol tempol blong Hem raon long wol?
… Wan risen i we long medel blong ol noes mo ol temtesen blong wol, Hem i promes blong mekem i kam strong mo blesem Ol kavenan Sent blong Hem mo ol promes blong Hem oli stap hapen! …
Insaed long haos blong Hem, yumi kasem endaomen stret wetem paoa blong Hem. Fet blong yumi long Jisas Kraes mo lav blong yumi long Hem oli konfem mo oli protektem yumi. Ivenm yumi lanem blong laven Hem moa. Yumi save stret long saed blong spirit abaot tru aedentiti blong yumi mo stamba tingting blong laef. Taem yumi stap fetful, yumi kasem blesing blong proteksen long ol temtesen mo ol samting we i stap pulumaot tingting blong yumi. Yumi filim lav blong Sevya blong yumi taem Hem i leftemap yumi aot long ol hadtaem mo ol harem nogud. Yumi fulap wetem paoa blong God. …
Ol dia fren blong mi we mi lavem tumas, sapos yumi bin save mo no save yet blong kam antap blong stap go long tempol, letem yumi faenem moa taem oltaem blong wosip insaed long haos blong Lod. …
Tempol hem i stret haos blong Lod. Mi promesem yufala se taem yufala i klin inaf blong kam mo prea from tabu haos blong Hem, bae yufala i fulap wetem paoa blong Hem, nem blong Hem bae i stap long yufala, ol enjel blong Hem bae oli lukaotem gud yufala, mo bae yufala i gro i kam antap long ol blesing blong Tabu Spirit. …
Long dei ia blong gat tu tingting mo plante noes, mi testifae se tempol i tabu haos blong Hem mo bae i help blong sevem yumi, protektem yumi, mo mekem yumi rere from dei ia we i fulap long glori, taem, we evri tabu enjel blong Hem, Sevya blong yumi, i kambak wetem paoa mo bigfala glori.