Satedei Aftenun Sesen
Wan Glad we I Moa Hae
Samfala Pat
Sore blong luk se blong plante pipol, fasin blong stap hapi i had blong faenem. …
… Filim sore i no wan saen blong filim se yu lus. Wan samting we i gud long laef ia, i we glad mo sore tufala i joen tugeta mo i no save seperet. …
Be, mi bin eksperiensem wan niu stat blong laef tu long miwan we i fulumap gud sol wetem bigfala glad mekem se i had blong kipim insaed. Mi bin kam blong faenemaot blong miwan se strong filing blong pis ia i kam tru long fasin blong folem Sevya mo wokbaot long wei blong Hem.
Pis we hem i givim i no semmak long wanem wol i givim. I moa gud. Hem i moa hae mo i moa tabu. …
Papa blong yumi long Heven i no haedem rod blong stap glad. I no wan samting blong stap haedem. !I stap blong evriwan!
Hem i wan promes long olgeta we oli wokbaot folem rod blong stap olsem disaepol, folem ol tijing mo eksampol blong Sevya, kipim ol komanmen blong Hem, mekem mo givim ona long ol kavenan we oli mekem wetem God. …
… Hem i neja blong ol samting blong wol blong oli kam olfala, kam sting, brokbrok, o kam nogud. Be glad we i olsem hemia blong God i no save finis, from se God Hem i no save finis. …
… Plis letem mi givim sam long ol step we i blong statem wokbaot ia blong faenem stret glad.
Long ol dei we i stap kam, ol wik, mo ol manis, bae mi invaetem yufala blong:
-
Spendem taem long wan tru fasin, blong traehad fulwan blong go moa kolosap long God.
-
Lukaotem evri dei ol taem blong filim hop, pis, mo glad.
-
Mekem olgeta we oli stap raon long yu oli glad. …
Bae yumi evriwan i lukaotem mo faenem glad we i moa hae we i kam tru long fasin blong komitim laef blong yumi long Papa long Heven mo Pikinini blong Hem we i lavem tumas.