Satedei Aftenun Sesen
“Stap Kwaet, mo Save se Mi Mi God”
Samfala Pat
Evri taem we yumi kasem, riviu, tingbaot, mo riniu ol tabu kavenan wetem fet, ol angka blong yumi long saed blong spirit oli moa strong mo sef gud antap long “strong ston” ia we i Jisas Kraes.
… Taem yumi bildim fandesen blong laef blong yumi long Sevya, yumi kasem blesing blong “stap kwaet”—blong gat wan klia save long saed blong spirit se God i Papa blong yumi long Heven, yumi ol pikinini blong Hem, mo Jisas Kraes i Sevya blong yumi. …
Eksampol, Sabat i dei blong God, wan tabu taem we oli putum i stap blong tingbaot mo wosipim Papa long nem blong Pikinini blong Hem, blong tekpat long prishud odinens, mo blong kasem mo riniu ol tabu kavenan. …
… Ol “Haos blong prea” we yumi stap kam tugeta long hem long Sabat oli ol mitinghaos mo ol nara ples we oli apruvum—ol tabu ples blong stap revren, wosip, o stap lan. …
Tempol i wan nara tabu ples we oli mekem speseli blong stap wosip mo stap givim seves long God mo stap lanem ol trutok we i no save finis. …
… Ol hom blong yumi i mas gat tugeta tabu taem mo tabu ples we insaed wanwan man mo ol famli i save “stap kwaet” mo save se God i Papa blong yumi long Heven, yumi ol pikinini blong Hem, mo Jisas Kraes i Sevya blong yumi. …
Mi promes se taem yumi bildim fandesen blong laef blong yumi antap long “strong ston” ia we i Jisas Kraes, bae Tabu Spirit i save blesem yumi blong kasem wan filing blong stap kwaet long saed blong spirit insaed long sol we i mekem yumi save mo tingbaot se God i Papa blong yumi long Heven, yumi ol pikinini blong Hem, Jisas Kraes i Sevya blong yumi, mo yumi kasem blesing blong mekem mo winim ol had samting.