Te Tetere ni Bwakantain te Kaonobong
“Tiiku n Rau, ao n Ataia Bwa Ngai te Atua”
Te Rongorongo ae Kaeweaki
Ni katoa tai are ti kakaonimaki ni butimwaea, rinanon, uringa, ao ni kaboou ara berita aika tabu, atinroon tamneira a kamatoaki riki ao ni kateimatoaaki i aon ana “bwaa” Iesu Kristo.
Ngkana aan maiura e kateaki i aon te Tia Kamaiu, ti kakabwaiaaki bwa ti na “tiku n rau”—ni karekea kakoaua n tamnei bwa te Atua bon Tamara are i Karawa, ngaira Natina, ao Iesu Kristo bon ara Tia Kamaiu. …
… Te Tabati bon ana bong te Atua, te tai ae tabu ae kaokoroaki bwa ti na uringa ao n neboa te Tama n aran Natina, n ira buakon ana otenanti te nakoanibonga, ao n karekei ao ni kabooui berita aika tabu. …
… Te “auti [n] tataro” ake ti bobotaki iai n te Tabati bon autinibootaki ao taabo riki tabeua ake a kariaiakaki—taabo aika tabu n karinerine, nebonebo, ao n reirei. …
Te tembora bon te tabo ae tabu naba teuana are e a tia ni katabuaki ibukin neboakin ao te beku ibukin te Atua ao reiakinan koaua aika akea tokiia. …
… A riai bootaki inanon mweengara ni karekea te tai ae tabu ao te tabo ae tabu ike ngaira n tatabemaniira ao utu ti kona n “tiku n rau” ao n ataia bwa te Atua bon Tamara are i Karawa, ngaira Natina, ao Iesu Kristo bon ara Tia Kamaiu. …
I berita bwa ngkana ti katei aan maiura i aon ana “bwaa” Iesu Kristo, ti kona ni kakabwaiaaki iroun te Tamnei ae Raoiroi ni karekea te rau n tamnei inanon tamneira n tatabemaniira are e na kakorakoraa ataakin ao uringan ae te Atua bon Tamara are i Karawa, ngaira Natina, Iesu Kristo bon ara Tia Kamaiu, ao ti kona ni kakabwaiaaki bwa ti na karaoi man tokanikai i aon bwaai aika a kangaanga.