Ao E Kabae Ikoakiia
Iroun Beretitenti Henry B. Eyring
Te Moan Kauntira n te Moan Beretitentii
I tataro bwa ti na kona ni katauraoira n anga te mwakuri n ibuobuoki n te nakoanibonga are te Uea e na kona ni kawenea iaoni kawaira n te maiu aio.
Ngaira ni kabane ti kakabwaiakaki ma te katabeaki (n tararuaia) tabeman. N taua ana nakoanibonga te Atua bon te bukinaki ibukin te maiu ae akea tokina irouia Natina. Bon anne raoi te koaua, e tamaroa anne, ao n taai tabetai e kona n rangi ni korakora.
Iai beretitenti n te kooram n unimwaane aika a ongora n te tairiki aei aika ata te bwai ae I nanonna. Aio te bwai ae bon ririki nakoia aika mwaiti—ao n raka riki iaon teuana. E kona n ae a kakaokoro aron kabwarabwarakiia, ma arona titabo.
Temanna te unimwaane ae ko aki kina raoi ao e butiko ibukin am ibuobuoki. E a tibwa kunea bwa e na kamwainga buuna ao natina temmwaane ae uarereke nakon aia tabo ae boou are e bon uaakan ma aia tabo are mai imwaina.
Teuaei ma buuna a kaman tia ni butia raoraoia bwa a na tangoa aia turaki ibukin te bong anne ni kamwaing bwain aia auti ao aia bwai. Raoraoia aio e kariaia bwa a na kabongana aia turaki. Te rorobuaka ni karo aio e moanna ni katokai aia bwai nakon te turaki, ma inanon tabeua te miniti nako, akea bwa e a rotaki nukana. Raoraona are e tangoa ana ka e aki kona n ibuobuoki bwa e rangin n tabetabe. Te kairake ni karo aei e rangin n raraoma. E iangoia, ana beretitenti n te kooram n unimwaane.
N te tai are e bubuti buokana, ao e a bon bwakantai te tai anne. Boni bongin aia bowi kain te Ekaretia n te tairiki anne. Ko a tia ni berita nakon kaain abam bwa ko na buokia ni kamwaing bwain ana auti n te bong anne. A tia am ataei n tuangko bwa ko na karaoi bwaai tabeua ma ngaia, ma ko tuai ni karekea am tai ni karaoia ma ngaia.
Ko ataia naba bwa kaain am kooram, ake a korakora aia onimaki, naake ko aki toki ni weweteia bwa ana ibuobuoki, ao a na titebo aroia ma are ko mena iai.
E ataia te Uea ae ko na kataia ni katabetabeko ao noria koa reke n te kanganga bwa e a tia ni e ni weteiko nakon te nakoa aei bwa kona taua, ngaia ae E anganiko te karaki aei bwa e na kaungako. Bon te taeka ni kaikonaki aio ibukiia kaain te nakoanibonga aika rangin n tabetabe ni bong aika nako. N tabetai ti taekinna bwa te karaki aio ibukin te Itamaria ae raoiroi. Ma bon te karaki raoi aio e bon kaeneti nakoia naake iai irouia te nakoanibonga, inanon kabanea ni bong aika katabetabe man kangaanga.
E kaineti te karaki aio nakon te toro n te nakoanibonga ae korakora tabena. Tii te kauring bwa ngkoe bon te I-Tamaria ao tiaki te ibonga ke te Reewi ae riaon te mwaane are e ikoaki.
Ko na bae n aki iangoa te karaki anne ngkana ko kaitarai kakaewenako aikanne. Ma I tataro (bwa ko na iangoa karakinan te I-Tamaria ae raoiroi) ngkana boong ake ko namakina iai te rawawata a manga roko riki, ao a na manga bon roko riki.
Tiaki tuangaki inanon booki aika tabu bwa bukintera te I-Tamaria e mwananga iaon te kawai mai Ierutarem nako Ieriko. Tiaki n ae e nakonako n tingaia ngkai e riai n tia n ataia bwa taan iowawa a tataninga ibukia aika aki tatauraoi. E nakonako iaon te kawai ae kakamaku, ao n aron ae tataneiai te aba iai, iai irouna te man, n aron te taongki ke te ox aika a kabonganaki ni uoti bwaai aika rawawata n raonaki ma te oera ao te wain.
N ana taeka te Uea te I-Tamaria, ngke e noora te aomata ae ikoaki e tei, ibukina bwa “iai ana nanoanga.”
E raka iaon namakinan te nanoanga, e karaoia. Uringnga n tainako kabwarabwaran te karaki:
“Ao [e] kawaria, ao e kabae ikoakina, ao e runakina te bwa ma te wain iai, ao e katokaa i aon ana man, ao e uotia nakon te auti n iruwa, ao e kawakinna.
“Ao ngke e a ingabong ao e anai uoua te tiring, ao e angan teuare ana auti te auti, ao e taku nako ina, Ko na kawakina teuaei; ao ane bua riki n am bwai ao I a manga kabooa, ngkana I oki.”1
Ngkoe ao ake iai irouia te nakoanibonga ake a weteaki bwa a na kairiri a kona ni karekei tenua koaua. Te Moan, e na anganiko te Uea, ngkana ko bubuti, namakinan te nanoanga ake E namakin ibukiia ake a kainnano. Te Kauoua, E na karekea nakoia tabeman, n aron te tia tararua, bwa e na raoniko n am mwakuri n ibuobuoki. Ao te katenua, te Uea n aron te I-Tamaria ae raoiroi, e na karaoa ae bati riki, e na kaniwangaia riki naake a reitaki n anga n ibuobuoki nakoia naake a kainnano.
Ngkami beretitenti n te kooram e bae n tia ni mwakuri iaon kaniwanga aikanne n raka iaon teuana. Tungia tabeman ana nakoanibonga te Uea bwa e na buokia, ma te onimaki bwa ana kaeka ma te nanoanga. Kam aki maaku n titirakinia naake a tia ni kaeka bwa angiin te tai n taai aika nako ibukina bwa kam ataia ae a kai namakina te nanoanga. Titirakiniia bwa n taai aika a nako a tia n namakina ana akoi te Uea ngkana a rineia bwa a na ibuobuoki. Titirakiniia tabeman aika a kaman rootaki n te karawawataki, n atakina ae ngkana e bati riki am anganano, ao e na mwaiti riki te kabomwi ae ana karekea mairoun te Uea. Naake a tia n ibuobuoki n taai aika nako a tia n namakina ana kakaitau te Uea ae takaburinako.
Ko na bae n tia ni kaungaaki n aki titirakina temanna ibukin buokona ni katokai ao ni manga kanakoi bwai man te turaki. Ngkai te tia kairiiri ngkoe ko na riai n ataia kaain am kooram ma aia utu naba. E kinaia raoi te Atua.
E ataia bwa antai buuna ae a kania namakinan te rawawata ae bubura ibukina bwa e aki kona n reke ana tai buuna ni karaoa te bwai ae tangiria ni karaoia ibukin kainnnanona. E ataia bwa antai ataei aika a na kakabwaiakaki man noorakin tamaia n nako teuana riki te tai ni buokiia tabeman ke ngkana a kainnanoa te namakin ataei ake a kakawaki riki nakoia aia karo ae na tau ibukina ni kabanea aia tai ma ngaia n te bong anne. Ma E ataia naba bwa antai aika a kainnanoa te kakao ni beku ma e kona n tara n tiaki te aomata ae e na kona n riki ke n tauraoi n ibuobuoki.
Ko aki kona n ataia raoi kaain am kooram ni kabane, ma e ataia te Atua. Ai ngaia are, titebo ma ae ko a tia ni karaoia n taai aika mwaiti, tataro bwa koa onga n ataia bwa antai ae ko na tuanga bwa e na buokiia tabeman. E ataia te Uea bwa antai aika ana kakabwaiakaki man n tia n tuangaki bwa ko na ibuobuoki ao antai te utu ae na kakabwaiakaki n akean tuangakina. Anne te kaotioti ae ko kantaningaia bwa e na roko nakoim n am tai ni kairiiri n te nakoanibonga.
I noora te bwai anne n riki ngke te kairake ngai. Ngai te moan tia ibuobuoki n te kooram n ibonga. E tareboniai n te bong teuana ni mweengau te bitiobi. E taekinna bwa e tangiria bwa N na nako mangaia ni kawara te aine ae akea buuna ae rangi ni kainnano. E taku bwa e kainnanoai.
Ngke I tabe n tataningaia bwa e na anai ni mweengau, I reke n te kangnga. I ataia bwa iai ana kauntira te bitiobi aika marurung ao ni wanawana. Temanna bon te tia moti ae kinaaki. Are temanna ngaia ae iai ana kambwana ae bubura ao e na riki ngaia bwa te Mataniwi ni Kabuta imwiina. Te bitiobi e a manga riki bwa te Mataniwi ni Kabuta. Bukin tera te bitiobi e taekina ana anuana aio nakon te ibonga ae akea ana atatai, “I kainnanoa am ibuobuoki”?
Eng, I ata riki ngkai te bwai ae na kona n taekinna nakoiu. “Te Uea e kainnanoia ni kakabwaiako.” Ni mweengan te aine ae akea buuna, I noria ni kubanako ngke e tuanga te aine bwa e na aki karekea te buoka man te Ekaretia ni karokoa e tia ni kanoa te boomwa ni kataumwane ae e a kaman katikua irouna. Ngke ti buti n okira mwengara ao n noorai n arou ni kuba e ngare nakon mimiiu ao man taku, “Hal, ngkana e kona ni karekea aron tararuan ana kataumwane ao e na kona ni buokiia tabeman.”
N te tai teuana, e anai au bitiobi bwa ti na nako ni kawara te karo ae kinimanging te karo aio e kanakoia ataeinaine aika maaku bwa a na kaitibo ma ngaira n te mataroa. Imwiin ana maroro ma ataeinaine aikai, ti rairaki (n nako) ao e taku nakoiu, “Ti aki kona ni biti maiuia ngkai moa, ma ti kona n namakina ana tangira te Uea nakoia.”
N te tairiki teuana e anai nakon mwengan te mwaane ae tuai man ira te taromauri inanon ririki aika mwaiti. E tuangnga te bitiobi bwa a tangiria ao a kainnanoia naba kaain te uoote. E tara n aki bati mwiina nakon teuarei. Ma n te tai anne, ao n tainako ngkana e kairai te bitiobi, iai mwiina ae korakora nakoiu.
Akea te kawai ae I kona n ataia bwa e tataro te bitiobi ibukin atakin te ibonga ae na kakabwaiakaki man nako ma ngaia n taian kakawari aikanne. E bae n tia ni kairia ibonga ake tabeman ma ngaia n taai aika mwaiti. Ma e ataia te Uea bwa n te taina ao N na riki bwa te bitiobi ni kaoia naake a mamara n oki nakon te euangkerio ike a na kona iai aia onimaki ni kakorakoraki. E ataia te Uea bwa n te taina ao N na anganaki te nakoanibonga ibukiia bubua ao ngaa natin Tamara are i Karawa ake a kainnano n te maiu n rabwata.
Ngkami kairake ni mwaane kam aki kona n ataia bwa tera mwakuri n te nakoanibonga aika e katauraoi te Uea bwa kam na anga. Ma te kakaewenako ae korakora riki nakoia ni kabane kaain te nakoanibonga bon te ibuobuoki n tamnei. Ngaira ni kabane iai iroura te mwiokoaki anne. Bon te katabeaki ae katautauaki bwa kona riki bwa kaain te kooram. E roko man kainakin te utu. Ngkana ana onimaki temanna n am kooram ke n am utu a buakanaki iroun Taatan, ko na namakina te nanoanga. Kanga titebo ma te mwakuri ao te nanoanga are e anga te I-Tamaria, ko na buokiia naba ma te bwaa ni kamaiu ibukin manekaia n aia tai ni kainnano.
N am mwakuri ni mitinare ae bwanin taina, ko na nakoia ngaa n aomata ma te kainnano n tamnei ae korakora. A mwaiti, ae a na aki ataia ae iai manekaia n tamnei, aika tuai ni karaoaki, ae a na uoti nanokawaki aika akea tokiia, ni karokoa ae kam reireiniia. Ko na waaki nako n ana wewete te Uea ni kamaiuia. Ti te Uea ae kona ni katoki ikuakin tamneia ngkana a kariai otenanti ake e na kairiia nakon te maiu are akea tokina.
Ngkai ngkoe kaain te kooram, ae te tia reirei n te mweenga, ko aki kona ni buokiia aomata ni katoki uruakin tamneia ti ngkana e korakora am onimaki. E nanonaki n anne bwa ko na kabanea riki am tai ni wareki n tainako booki aika tabu ao n tataro ibukiia. Te tataro n te tai aei ao te wareware ni booki aika tabu bon tiaki te katauraoi ae tau. Ma bon kakoauaan te bwai ae ko na kainnaoia e airiiri ma te reirei aei man te ka 84 n tiekition n te Doctrine ao Covenants: are ti na iangoi imwain te bwai ae ti na taekinna, ma n iangoia n ara iango taekan te maiu, ao ngkanne ti na anganaki tibwara n te tai are ti kainnanoia iai.”2
E kona te berita anne ni karekeaki tii ngkana ti “kawakin raoi” taekan te maiu ao ni kateimatoai ni karaoia. Te bwai ae kakawaki n iteran te koroboki ae tabu anne bwa kanga te bwai ae ko namakinna ibukin taeka. Te katoto, ngke I a tia n nako ni kataia ni buoka temanna ae nanououa n ana onimaki teuanne ke neienne ibukin ana wewete mai i karawa te Burabeti Iotebwa Timiti, ana namakin a na oki rikaaki nakoiu.
Tiaki tii taeka man ana Boki Moomon. Bon te namakin ni kakoaua te koaua are e roko riki ngke i wareki tabeua rain man Ana Boki Moomon. I aki kona ni berita bwa e na roko nakoia aomata ni kabane ake iai nanououaia ibukin te Burabeti Iotebwa Timiti ke Ana Boki Moomon. Ma I ata Iotebwa Timiti bwa te Burabeti ibukin Kaokan bwai ao bwa Ana Boki Moomon bon ana taeka te Atua ibukina bwa I a tia ni kawakinna.
I ataia man au atatai bwa ko kona ni karekea kakoauaan te koaua mairoun te Tamnei ibukina bwa e a tia n roko nakoiu. Ngkoe ao ngai ti riai n tia ni karekea te kakoaua anne imwain ae e na katikuira te Uea ni kawain te tia mwananga ae ti tangiria ae a tia n ikuaki irouia ana kairiribai te koaua.
Iai riki te katauraoi ae ti riai ni karaoia. Bon katein te aomata n riki ni kamatoatoaaki nakon marakia tabeman. Anne bukina teuana ngkai e karaoa ae mwaiti te Tia Kamaiu n taekina ana Mwakuri ni Kamaiu ao ni katoka Iaona marakiia ao nanokawakiia natin Tamara are i Karawa ni kabane ao E ataia bwa e na kanga ni buokiia.
E ngae ngke ana kabanea n nakoraoi n nakoanibonga ae mamate te Tama are i Karawa aki kakoroa nanon te nanoanga anne n akea te kangaanga. Arora ni kaitarai kateira n aomata bwa ti na taotaonaki n nano ma te aomata ae aki kona n noora te koaua ae rangi ni matata nakoira. Ti riai ni karaurau bwa e naki taraaki ara aki taotaonaki n nano bwa te kabuakaka ke te totoko.
Ngkana ti katauraoi n anga te ibuobuoki ibukin te Uea ngkai Ana toro ngaira aika te nakoanibonga, Iai inanona te bwaintangira ae ti na kainnanoia ibukin mwanangara, nakon te tabo are e na kanakoira iai te Uea. Iai iroun te I-Tamaria ae raoiroi te bwaintangira anne. Ti na kainnanoia, ao e a tia te Uea n tuangira bwa ti na kanga ni karekea:
“Ma ngaia are, tariu aika kam tangiraki irou, ngkana akea iroumi te tangira ae kororaoi, ao bon akea ngkami, bwa akea kabwakan te tangira. Ngaia are, niim ma te tangira ae kororaoi, are te kabanea ni korakora iaon bwaai nako, bwa bwaai ni kabane a na kona ni bwaka—
“Ma te tangira ae kororaoi bon ana tangira Kristo, ao e teimatoa n uaa te toki; ao ane e kuneaki irouna n te kabanea ni bong, ao e na bon nakoraoi ibukina.
“Ngaia are, tariu aika kam tangiraki irou, tataro nakon te Tama ma korakoran nanomi ni kabane, bwa kam na kaonaki n te tangira aio, are e a tia ni katoka iaoia ni kabane ake taan irira Natina, are Iesu Kristo ni koaua; bwa kam aonga n riki bwa natin te Atua; bwa ngkana e kaoti ao ti na riki n arona, bwa ti na nooria n arona ngkai; bwa tia aonga ni karekea te kantaninga aio; bwa ti aonga ni kaitiakaki n arona ae e itiaki.”3
I tataro bwa ti na kona ni katauraoira n anga te aeka ni mwakuri n te nakoanibonga ae na anganira te Uea iaon kawaira n te maiu ae mamate. N aran Iesu Kristo ae tabu, amen.