Kawaekoan Ana Mwakuri ni Babaire te Uea!

Iroun Unimwaane S. Gifford Nielsen

Man te Itingaun

Ti riai n tatabemaniira nako ni karikirakei ao ni karaoi oin ara mwakuri ni bairei ni beku ma te ingainga n nano irarikiia mitinare aika a bwanin aia tai.

Tabeua te ririki n nako I tangiria bwa N na taetae ma buun temanna te bitiobi n ara titeiki, ngaia are I a tarebooniia ni mwengaia. Natia te mwane e kaeka te tareboon. I taku, “Mauri iai tinam ikanne?”

Ana kaeka: “Eng, aei. N na weteia. Antai aei?”

Au kaeka: “Tuangnga bwa Beretitenti Nielsen aei.”

Akea bwa I a tataninga n te tai ae uarereke, ma te bwana ae korakora, are I ongo, “Ei, Tinau, Beretitenti Hinckley ae iaon te tareboon!”

I aki kona n ataia bwa tera te bwai ae e iangoia. Tao bon te rianna ae abwabwaki nakon te tareboon are e a tia ni karaoia. E roko te iango irou ae kangai: “E riai aei?” I aki kantaninga aio ma ngaia are I a manga boni ngare i bon irou. Ngke I tabe ni iango, ao I taku tao e a kan un irou.

Tera raoi ae ko na karaoia ngkana e bon tareboniko raoi ana burabeti te Uea? Eng, e a tia! Beretitenti Thomas S. Monson, n aron ae e a tia ni manga karaoia n te moaningabong aei, e a tia ni weteira n tatabemanira nako nakon te mwakuri ae moan te kakawaki aei. E taku, “Ngkai e a roko aia tai kaain te aro ao mitinare bwa a na bane ni bootaki, ni mwakuri, ni beku n ana nne ni kurebe te Uea ni uotia tamnei nako Ina” (“Te Onimaki n te Mwakuri ni Kamaiu” [te rawebwana ae onoti ibukin te kataneiai ni kairiiri n te aonaba ni kabuta Tuun 2013]; lds.org/broadcasts).

Ti a tia ni kakauongo?

A tia titeiki, mwakoro, ao mition ni kabuta te aonaba n rinanon rinanin korakora aika boou, koroboki aika a tabu n aron are taekinna te Tia Kamaiu nakon Iotebwa Timiti n 1832 e a tia ni koro bukina: E taku bwa e na katia ana mwakuri n taina (taraD&C 88:73).

Taari ao mwaane, te tai bon ngkai! I namakinna, ao I koaua bwa boni ngkoe naba.

I tangiria ni kaoka kukureiu ao au onimaki iroun Iesu Kristo nakon te mwakuri. Ngkana I takakaro n te butibooro, I iangoia bwa e na kaineti ma te babaire n takakaro. Akea raraomara ngkana ti wakina te takakaro aei ngkana a tauraoi kaain ara tiim ao ni kekeiaki ni karin booro aika baireaki raoi ao ti na bon tokanikai. E ngae n anne, I a tibwa tia n taetae ma aia tia reirei kaain te BYU ae rangin ni kinaaki LaVell Edwards ibukin ara babaire n te takakaro, ao e taku, “I aki tabe bwa te kawai ra ae kam iangoia ni karaoia I tii tabe ma reken ana bwi te tiim!” Ngkai ngaia temanna mai ibuakoia aika kaira te takakaro, I taku bwa e kanganga riki nakon anne, ma tao ana iango aika bebete ae ngaia ae anne bukina ngkai e aranaki n aran te tabo n takakaro.

Ngkai ti bane ni mena n ana tiim te Uea, iai iroura ara babaire ibukin karekean te tokanikai n te mwakuri? Ti tauraoi ni mwakuri? Ngkana ngaira, bwa kaain te aro, ti tangiria raoi ara utu, raoraora, ao ara reitaki, ti na aki kan tibwauai ara koaua ma ngaiia ibukin te euangkerio ae e a tia ni kaokaki?

N tain te tiemina ibukiia beretitenti n te mition aika boou inanon Tuun, te ware ae rietata ae 173 ibukia taan kairiri n ikotaki ma buuia a tia ni karekei kaetieti imwain ae a na wakina aia mwakuri n ibuobuoki. Ni kabane kaain te Moan Beretitentii ao te Kooram n Abotoro ake Tengaun ma Uoman aika 15 a taetae nakoia kain te bootaki ae onoti aei.

Unimwaane. Tom Perry e reita n te kabanea ni maroro, “Aio te tai ae moan te kamimi n rongorongon te Ekaretia. Aio te bwai ae ti tebo kakawakina ma bwaai aika korakora aika a riki bwa rongorongon ngkoa, n aron te Moan ni Kaotioti, n aron te bwaintangira ae ti a tia ni karekea are Ana Boki Moomon, n aron Manga kaokan te euangkerio, n aron bwaai ni kabane are e katea aan te kateitei anne ibukira bwa ti na waaki nako ao n reirei inanon abaneuan Tamara are i Karawa” (“Kainan te Maroro” [te maroro are e anga n te tieminaa ibukiia beretitenti aika a boou n te mition Tuun 26, 2013], 1, Te Raiburari ibukin Rongorongon te Ekaretia, Salt Lake City).

Ngaira ti kainnanoia bwa ti na katabeira n te mwakuri ni mitinare n akea aekakina mai imwaina ni katiteboira ma nanoia ara tia kairiiri ao katabeakiia ara mitinare aika bwanin aia tai. Te mwakuri aei e na aki kona ni waaki nako n ana kantaninga te Uea ngkana akea ngaira! N aron are e taekinna Beretitenti Henry B. Eyring, “Bwa e aki taraki te ririki bwa iraua, ara konabwai, ara mwakuri n te Ekaretia, ke te tabo, ma ti na riai n ataia bwa ngaira (kaain te Ekaretia) ti bane ni katiteuanaaki ni weteaki nakon te mwakuri ni Buokia ao ni kairia tamnei Nakoina (“We Are One,” Ensign ke Liahona, Meei 2013, 62).

I kona n tibwaua nakoimi au babaire ni mwakuri ake I kukurei ni karaoi imwin te tataro, warekan te mwakoro 13 inanon Taetaekina Au Euangkerio, ao n iangoi raoi bwaai ake I rinanona ngkekei? I kaoi ngkami bwa kam na iangoi teniua iango aikai n am tai n iangoa oin am babaire.

Te Moan, tataro mwaaka bwa kona uota temanna ni kaniia nakon te Tia Kamaiu ao Ana euangkerio ni katoabong. Ti kona ni karaoa aei man iangoakiia aomata ni kabane bwa natin te Atua mwaane ao aine aika ni buokiia i bon imarenaia n tatabemaniia nako iaon kawaia n okira mweengaia. Iangoia raoraom aika boou ake ko kona ni karekeia.

Te Kauoua, tataro ibukiia mitinare aika a beku n am aono ma aia aomata n araia ni katoa bong. Ti te kawai ni karaoan aei bon man kamaurakiia, tarai araia iaon aia baeti ao titirakiniia bwa antai aika a reireiniia, e anga ana maroro ma te wanawana Unimwane Russell M. Nelson, “Ni karokoa ae ko kina raoi aran ao matan te aomata anne, te Uea e aki kona ni buokiko ni kina nanon teuanne ke neienne.”

I ira ana bwabetito temanna te aine ae rangi n tamaroa are e tibwaua ana koaua. N na bon aki mwaninga neieinne n taekina, “I tuai maan ongongo irouia aomata aika mwaiti aika a na tataro ibukiu ao n namakina te tangira ae bati! I ataia bwa e koaua te mwakuri aei!”

Te Kateniua, kaoa raoraom nakon te waaki ni kakukurei inanon mweengam ke n taabo riki tabeua. Te tabo ra ae ko nako iai ke tera ae ko karaoia, iangoia raoi bwa antai ae na kukurei nakon bwaai aika a tia ni baireaki ao kakauongo nakon te bwai are e tuangko te Tamnei.

Tia Kamaiu e a tia n reireinai atun te reirei ae bebete n te euangkerio are, I kakoaua, bwa e kaineti raoi nakon “te kawaekoa.” Ngkana I rangin ni ingainga n te bwai teuana, e na oti n au koroboki ao n tainako N na kaotia n tokin te tiententi ma te kanikina aei! are e kaota aron te namakin ae korakora [ke} kaotan te bwai ae kakawaki” (Merriam-Webster’s Collegiate Dictionary, 11th ed. [2003], “te kanikina ae kaota aron am namakin”).

E anaaki nanou ni booki aika tabu n taekan “ikotakiia ana aomata te Uea” are e kaoti n tokin te kanikina aei are moanna ni katereterea nakoiu, aron nanon Aramwa ae korakora: “O bwa ngke ngai te anera, ao e kona n reke te bwai are e tangira nanou, bwa ni waaki nako ma n taetae ni bwanan te Atua, ma te bwanaa ae na ioa te aba, ao man takaruaea te rairannano nakoia aomata ni kabane!” (Aramwa 29:1).

N au kakaae ni booki aika tabu n te taetae n Ingiriti I a tia ni kunei 65 kawai ni kaota aekakin aia namakin mitinare ae korakora, ni kairaki ma aikai:

E taku te Uea bwa E korakora kimwareireina ngkana e rairananona te aomata! …

Ao ngkana ti beku ni kabanea ara bong n reirei te rairannano nakoia tabeman ao ni uota ti temanna te aomata nakoina, ao ti na karekea te kimwareirei ae korakora ma te aomata anne n abanuean te Tama.

Ao ngkai kimwareireim e na korakora ma temanna te aomata are ti uotia nakon abanuean te Tama, a na korakorara kimwareireira ngkana ti uoti tamnei aika mwaiti nakoina (tara D&C 18:13, 15–16).

Te bwai ae kauta au namakin nakon kiibu aika onoti aikai a karekea te tibwanga ae kakawaki ni moan au mwakuri ngke I riki bwa te Itingaun n te Aono. E nako nanou ngke I riki bwa toan te Abotoro, ae Unimwaane Quentin L. Cook, n te maungatabu n te titeiki. Ngke I nakonako nako nanon ana aobiti te beretitentii n te titeiki ibukin te moan ni boowi n te bong ni motirawa anne, I noori kaau aika toaraoi aika buraonti ni nnen te boki iakuun ana taibora, n raonaki ma booki aika tabu ae kanimwaki ma te kanikina ae kamimi. Ngke I warekia, I namakina bwa e a tia te Uea n ata au kamatebwai mwaaka, e a tia ni kaeka au tataro ao E ata raoi te bwai ae I kainnanoia ibukin karauan nanou ae ingainga.

I tuanga te beretitenti n te titeiki bwa e na tuangai karakinan taian kau.

E taku:

“Aikai ana kau te kairake ae e a tibwa rairaki nakon te Ekaretia are iai ana kanganga ma ana utu, ma e korakora ana iango ni kani karaoa raoi ana mwakuri ni mitinare ao e korobukina bwa e nako ni mitinare te tabo ae Guatemala. Ngke e a oki I kaitibo ma ngaia n anganna te kamotirawaaki ae karineaki ao I noria bwa aki raoiroi ana kau, bwa a uruaki. E a tia te ataeinimwaane aei n anga ana bwai ni kabane nakon te Uea n akea nikiraia, ngkana iai, aia ibuobuoki ana utu.

“E mimi irou ngke I a bon karekea tarakin ana kaau ao e taku nakou,”Beretitenti iai te bwai ae kairua ae I karaoia?’

“I kaeka, ‘Akea, te Mitinare, a nakoraoi bwaai ni kabane! Ko kona n anganai kaau aikanne?’”

E reitinako ni karaki te Beretitenti aio n te Titeiki: “Au karinerine ao au tangira nakon te mitinare ae oki aio e rangin ni korakora! I tangiria ni karinea aron ana waaki, .ai ngaia are I a karau ni kawakina te kau ae buraonti. E kauringai ngkana I rinnako n te aobiti aei bwa te mwakuri are ti riai ni bane n anga n aki tarai arora. Te kibu e reke n Itaia: ‘Ai tamaroa ra i aoni maunga waen are ua rongorongo aika raraoi, are kaongoraea te aba n te raoi, are uarongorongoi baika raraoi, are tataekina te maiu; are kangai nakon Tion, E uea Atuam!’” (Itaia 52:7).”

Tariu ao mwaneu aika kam tangiraki, buun te bitiobi ae tamaroa (ae I weteia n te tareboon) e na bae ni mimmi bwa bukintera e weteia te burabeti. I kakoaua bwa neienne ao ngaira ti na aki manga mimi n TE KANIKINA AE KAMIMI!

I ataia ae ti riai ngaira n tatabemanira nako ni karikirakea ao ni karaoa oin ara babaire ni mwakuri ma te nano ae korakora ni buokia mitinare aika bwanin aia tai n TE KANIKINA AE KAMIMI!

I reitanako au koaua nakon te Burabeti Iotebwa Timiti: Imwiin koaua aika mwaiti aika e a tia n atai te Tia Kamaiu, e anga te koaua aei, ni kabaneana: Bwa e maiu te Tia Kamaiu!” (D&C 76:22). N aran Iesu Kristo ae tabu, amen.