Bwaai aika Uarereke man Aki Kanganga

Iroun Unimwaane Arnulfo Valenzuela

Man te Itingaun

Ti na buokiia tabeman ma te onimaki ao te tangira.

Tariu ao mwaneu aika kam tangiraki, tabeua te wiiki n nako I mena n te tabo ni kataneiai ibukia mitinare ni Kawan Mexico n tibwaua te rongorongo ma mitinare. Ngai ma kainabau ti roko tabeua te aoa imwain te tai. Ngke ti matakuakin onaroka aika tikiraoi ao kawain te Tabo ni Kataneiai Ibukia Mitinare ae itiaki man barongaki raoi, e bon aki kanganga bwa ko na aki kina, ti kakai kina te kukurei are e oti n ubuia kairake ni mitinare mwane ao aine, mitinare n tatabemania nako a kabanei aia iango ni kakaean rabakau iaon taetae aika boou ao n reiakina atakin taben teuanne ke neienne ni mitinare.

Ngke I tei teutana n tara te tabo ae tamaroa aei ma te karaurau, I iangoi ana taeka Aramwa ngke e tua nakon natina te mwaane Ereman bwa e na kawakin rongorongoia ana utu bwa mwakoron rekooti ake e a tia n onimakinaki iai ao ni kawakin ni kabane rekooti aikai bwa a na tabu bwa n te bong teuana a na waaki nako nakon aaba, reeti, neewe ao botanaomata.

Ngkanne e taetae Aramwa nakoina:

“Ao ngkanne tao ko na taku bwa iai te burababa irou; ma nooria I taku nakoim, bwa a riki bwaai aika a korakora man bwaai aika a uarereke man aki kanganga; ao bwaai aika uarereke n angiin te tai a kaminoia aika a wanawana.

“Ao te Uea ae te Atua e bon mwakuri ma te kantaninga bwa e na karokoa ana babaire ao man bwaai aika uarereke ao te Uea e kaninoia aika a wanawana ma ni kaekea kamaiuaia aomata aika a mwaiti” (Aramwa 37:6–7).

Aika a itiaki ao ara kairake ni mitinare bon banna ni katoto aika tamaroa n ana kawai te Uea—ae aomata aika a nanorinano aika a kona ni “kaoia tabeman bwa a na nakomai nakon Kristo ni buokiia ni karekea te euangkerio ae kaokaki rinanon te onimaki inanon Iesu Kristo ao Ana Mwakuri ni Kamaiu, rairannano, bwabetito, karekean ana bwaintituaraoi te Tamnei ae Raoiroi, ao n teimatoa ni karokoa te toki” (Tataekina Au Euangkerio: Te Kairi nakon te Mwakuri ni Mitinare [2004], 1).

N tabera ngaira kaain te Ekaretia, ti kona, rinanon oin ara bwai aika uarereke ao man aki kanganga, ni “[kairia]aika mwaiti ibukin buren aroia” ao ni buokia nakon “ataakin Atuaia nakon kamaiuan tamneia” (Aramwa 37:8).

N te taina ao I raona te beretitenti n te titeiki ao te bitiobi ni kawaria membwa aika aki rangin ni kakaonimaki. Ti reireinna, n te kawai ae aki kanganga, ibukin kakabwaia n te Tabati. Ti kaota ara tangira nakoina. E kaeka, “Ti te bwai ae I kainnanoia bon rokon temanna ao n anganai te abrazo,” ke kaotan te tangira.” I waekoa n teirake ao ni kakaitaua. Te bong are imwiina bon te Tabati. Te mwaane naba aei e ira te bootaki n toa ma ana utu ni kabane.

N tain te kakawari n reirei, Martha, kaain ara uoote, e tuanga kainabau ao raona bwa a na aki manga oki. E a tia n iangoia bwa e na aki manga taromauri. Temanna te tia kakawari n te mweenga e tuanga Martha ngkana a kona ni uaia n anene n te kabanea ni mwananga aei, ao e kariaia. Ngke a anene, iai te bwai ae onoti ae riki. Teutana imwiin teutana, e moanna ni kaona te ru te Tamnei. A bane n namakinna. E moanna ni bebete nanon Martha. Ma rannimatana ae wawanako, e kabwarabwara ana namakina nakoia ana tia kakawari n te mweenga. N te tai anne, e kunea bwa e ataia bwa e koaua te euangkerio. E kaitauia ngkai ana tia kakawari n te mweenga ao e kaota nanona ibukin manga okiia. Man te tai anne ni karokoa ngkai, e butimwaiia n tainako ma te kukurei.

E moana irakin te taromauri Martha ma natina ae uarereke riki. Inanon ririki aika mwaiti a teimatoa n ira te taromauri, ma Martha ae aki bua ana kantaninga bwa n te taina ao buna e na rineia bwa e na raonia. N tokina ao e roko te bong ngke te Uea e ana nanona, ao e moanna n iria ma ngaia, n aron are e karaoia natia te aine n te tai ae waekoa imwiina. E a moanna te utu aei n namakina te kukurei ni koaua are e roko man karekean kakabwaia n te euangkerio inanon mweengaia. Man te tai anne ao e a tia Martha n riki bwa ara beretitenti n te Bootaki n Aine ma te kakaonimaki, ao e a tia buuna ni beku inanon wewete aika kakaokoro inanon te titeiki. Bwaai aikai a moanaki ma aneneakin te anene, te bwai ae uarereke man bebete are e ringa nanon Martha.

Naaman bon te kaben n ana tanga ni buaka uean Turia, te mwaane ae karineaki, te mwaane ae korakora ao n ninikoria, ma ngaia bon te rebera naba (tara 2 Uea 5:1) Imwiin akin reken tekeraoina ni katokan aorakina mairoun uean Iteraera ibukin reberana, Naaman e nakon ana auti Eritai, te burabeti. Ao Eritai e kanakoa temanna nako ina, ao e kangai:

“Naako kaitiua tebotebom i Ioretan, ao e na manga okiriko irikom, ao ko na itiaki.

“Ma e un Naaman, ao e nako, ao e taku, Noria, I taku bwa e na bon oti nako nakoiu, ma n tei, ma ni wetea aran Iehova ae Atuana, ma ni katiotioa baina i aon te tabo are aoraki, ma ni kamaiua te rebera. …

“Ao ana toro e kania, ao a taetae nako ina, ao a kangai, Tamau, ngke tao e tuangko te burabeti bwa ko na karaoa te bwai teuana ae abwabwaki, ao tiaki ko boni karaoia? ao ai batira riki riaina iai, ngke e kangai nakoim, Ko na tebotebo, ao ko na itiaki?

“Ao a ruo ao e kaitiua tebona i Ioretan, n ai aron ana taeka ana aomata te Atua: ao e a manga roko irikona ae ai aron irikon te tei ae uarereke, ao e a itiaki” (2  Uea 5:10–11, 13–14).

E a tia ara burabeti, Beretitenti Thomas S. Monson, ni kaoira ni kabane bwa ti na nako ni kamaiuia tarira ao mwanera. E taku: “E rangin ni kainnanoa am ibuobuoki te aonaaba. Iai waae n nakonako, baai n tautau, iango ni kaunga, naano ni kairi mai ieta, ao tamnei ni kamaiu. Kakabwaia ibukin akea tokina a tataningaiko” (“To the Rescue,” Ensign, Meei 2001, 48; ke Liahona, Turai 2001, 57).

I kakoaua bwa a mwaiti aika kainnanoa ara ibuobuoki aika a tataningaira ikekei. A tauraoi ibukiia tariia ao mwaneia aika kakaonimaki bwa a na karoko nakoia ao ni kamaiuia rinanon bwaai aika uarereke man bebete. I a tia ni kabanei taai aika mwaiti ni kawariia kaain te Ekaretia aika aki rangin ni kakaonimaki aika a tia ni kabebeteaki nanoia iroun te Uea, aika a tauraoi ngkai ni karekei aia koaua ao ara tangira ae koaua. Ngkana ko nakoia ao ni kaoia, a na oki nakon te Ekaretia n aki totoko.

Ti na buokiia tabeman ma te onimaki ao te tangira. Ti na uringa te berita are e karaoia te Uea ngke e taekinna bwa:

Ngkana ti mwakuri ni kabanea ara bong n reirei te rairannano nakoia tabeman ao ni uota ti temanna te aomata nako Ina, ti na karekea te kimwareirei ae korakora ma te aomata anne n abanuean te Tama.

Ao ngkana kimwareireira e na korakora ma temanna te aomata are ti uotia nakon te Tia Kamaiu n abanuean te Tama, a na mwaitira kimwareireira ngkana ti uoti tamnei aika mwaiti nako Ina! (tara D&C 18:15–16).

I kaota au kakoaua n ana tangira te Uea nakoia Natina ni kabane. I ataia bwa E maiu aongaia ara Tia Kabooira. N aran Iesu Kristo, amen.