Korakoran te Aomata rinanon Ana Mwakuri ni Kamaiu Iesu Kristo

Iroun Unimwane Richard G. Scott

Man te Kooram n Abotoro n te Tengaun ma Uoman

Rinanon ana Mwakuri ni Kamaiu Iesu Kristo, ngaira n tatabemaniira ti kona ni kaitiakaki ao rawawatara ni kakaitara e na kabebeteaki.

N taai aika tibwa nako, I kakabwaia ni kaaitibo ma teuana te kurubu ni kairake ae rang ni kakateke te nano man te titeiki mai Idaho. E titirakinai temanna te ataeinaine tera te bae I namakinna ae rang ni kakawaki ae a riai ni kakaraoia i nanon maiua n te tai aei. I tuangnga bwa a na reiakina kinaakin ana Mwakuri ni Kamaiu Iesu Kristo ni maiuia. N te bong aei N na kamatata teuana anuan te mwaaka anne, are korakoran te aomata are ti kona ni karekea rinanon ana Mwakuri ni Kamaiu Iesu Kristo.

N Ana Boki Moomon ti wareka taekan Amon ma tarina ngke a angareirei i aon ana euangkerio Iesu Kristo nakoiia tekorakina “ake a tuai ota ao a matoatoa nanoia ao a kakamwarua.”¹ A rawata mwaitiia ake a rairannano a motinnanoia ni kitan kateiia ni bubure. E rang ni koaua raoi rairakiia bwa a taun aia bwaintiritiri ao a berita nakon te Uea bwa a na aki manga kabonganai.²

I mwin anne, e rawata mai irouia tariia ake aki rairaki ake a ewekiia ma n tiringiia. Naake a kakaonimaki ngkai a motinnanoa te taenikai ao n tiringaki n te kabang nakon ara a na katokai kaiia ni bwaintiritiri. Aroia ae tamaroa aei e buokiia ae e a mwaiti riki ae rairaki ao ni katikui bwaintiritiri ni kaaitara.³

Rinanon Ammon, e kairiia te Uea ni kamanoiia ri buakoia Nibwaite, a riki ni kinaaki iai bwa ana aomata Amon.⁴ A kawakiniia Nibwaite i nanon ririki aika mwaiti, ma i nanon te tai e moanna ni kerikaaki korakorana, ao e a rang ni kainnanoa buokana.⁵

E a roko aia tai ae kakawaki ngkai ni maiuia n tamnei ana aomata Amon. A tia ni kakaonimaki n aia berita n aki tabeki bwai ni kamamate. Ma a ota bwa tabeia tama kamanoakiia aia utu man te kabuanibwai.⁶ Te kainnano anne e taraa ni korakora ma n tau ni karekea te iango n uruakin aia berita.⁷

Ereman, aia mataniwi n nakoanibonga ae atatai, e ataia bwa uruakakin te berita ma te Uea e aki kona ni butimwaeaki. E anga teuana ana iango ae kakukurei. E kauringiia bwa natiia mwaane a na aki kona ni kaairua n te bure are ti tearona ao ma ngaia are a aki kainnanoia ni karaoa te berita ae ti tearona.⁸ E ngae ngke a rang n raa natimwaane ma a aintoa rabwataia ao, e a kakawaki riki, bwa a tamaroa ao n rang n itiaki. A kamatoatoaaki natiia mwaane n aia onimaki tinaia.⁹ I an ana kairiiri aia tia kairiiri ae te burabeti, kairake n ataenimwaane aikai a onoi mwiia tamaia ni kamanoakiia aia utu ma mwengaia.¹⁰

Baike a riki ni katobibia te motinnano ae kakawaki aei a kaota bannan ana Mwakuri ni Kamaiu Iesu Kristo ni karekea korakoran te aomata nakon maiuia natin te Atua. Iangoi aia tangira karo akekei. A kanga n namakinna n ataia bwa mwakuri ni kakaaitara ni maiuia ake ngkekei a tuukiia man kamanoakiia kaainabaia ao natiia n aia tai ni kainnano arei. Te atatai n aomata te kakamwarua ma akean te nanoanga n te waki n tiritiri are a nang rinanona ngkai natiia mwaane, a na bon riai n tia n tang i bon irouia. Karo, tiaki nati, a kantaningaki bwa a na kamanoiia aia utu!¹¹ Nanokawakiia e na bon riai ni korakora.

Bukin tera aia mataniwi n nakoanibonga ae kairaki iroun te Tamnei e maku n aia iango ni kaoka kamanenaan aia bwai n tiritiri, mwiina a na bua tamneia?”¹² E a tia ni kamataata te Uea bwa are e a tia n rairannano n ana bure e na kabwaraaki ana bure, ao te Uea e aki manga uring ana bure.”¹³ Karo aika kakaonimaki aikai a kaman rairannano n aia bure, ao n riki n itiaki iai rinanon ana Mwakuri ni Kamaiu Iesu Kristo, ai ngaia ae bukin tera a reireiaki bwa a na aki kamanoiia aia utu?

Bon botona ni koaua bwa rinanon ana Mwakuri ni Kamaiu Iesu Kristo, ti kona ni kaitiakaki iai. Ti kona n tamaroa riki ao n itiaki. Ma, n tai tabetai ara rinerine aika mamaara a katikuira i nanon te tai ae maan. Teuana man baire aika kakawaki ni katabwanina te rairannano bon uotakin boon mwin ara bure ake man ngkoa. Aia rinerine ngkekei a reke iai katereakiia karo n Amonaite nakon mataaiakinan bwain te aonaba are e kona ni karika te mamaara i nanoia, are e na kataia Tatan ni kamanenaa.

E na kataia Tatan ni kamanena ara ururing n ara kairua ake man ngkekei ni katikira nakon ana anainano. Ti riai n tai nako n tataratara ni katuai ana kabwakabwaka. Ai aron tebaere riki irouia tama n Amonaite ake a marurung. Ai aron are riki irouia karo n Amonaite. E ngae imwin aia ririki ni maiuakina te kakaonimaki, e rang ni kakawaki ibukiia ni kamanoia n te tamnei man kabwakabwaka nakon uringan bure ake a bwakanako.

E tuatua Kaben Moronaai i marenan buaka ake a bati, kamatoatoaan kaawa ake a kai ekakinako. “Ao e karekea te anga are a na katea te kateitei te oo ae tei iaon rabeen te mwanono; ao a kawaerakea te tano mai nanon te mwanono nako oin te kateitei are te oo ae te kai … ni karokoa ae a katobibia te kaawa … n oo aika matoatoa ma te tano, ae rianako abwabwakina.”¹⁴ E ota Mataniwi Moronai ni kakawakin kamatoatoaan tabo ake a mamaara bwa e aonga n reke te korakora.¹⁵

Tama n Amonaite aikai bon ti tearona naba. A kainnanoi kamanomano n tamnei ake a korakora riki ni kamaaenakoakiia man maiuia aika kakaonimaki, a aki kai rotaki n te kabwakabwaka ae ti tearona. A a kona ni kamanoiia aia utu n te kakaonimaki n akea kabuanibwaian rabwataia n tamneiia.

Te rongorongo ae kakimwareirei nakon are e tangiria ni kaakeaa mai irouna boon imwin rinerine man ngkoa bwa e nori kakaokoron mamaara n aron are e noria n te mwakuri ni kakaaitara. Ma e kauring te Uea bwa te mwakuri ni kakaaitara are akea te rairannano iai e na karekea te katuua,¹⁶ ma ngkana e taekin mamaara te Uea, e karaoi n tai nako ma te nanoanga.¹⁷

N te koaua, iai te tatangira teutana bwa a reireinaki tama n Amonaite katein maiuia tamaia aika kewe, ma ni kabane natin Tamara are i Karawa a reke n te maiu ae mamate ma otan Kristo. N aki tarai mwiin buren aia mwakuri, mwina bon rikiraken kai rotakin te tamnei bwa e na kataia Tatan ni kamanenaa.

Ma te nanoanga ae bati a reiakinaki n te euangkerio, a rairannano, ao rinanon ana Mwakuri ni Kamaiu Iesu Kristo a rang ni korakora riki n te maiu tamnei nakon ana kariiri Tatan. Kanga a aki namakina te kabwakabwaka n okira maiuia n tiritiri ngkoa, ma n ririmwian aia tia kairiiri te burabeti, a aki angan Tatan ana tai ni “[kamwanei] tamneiia, ao ni kakaraurau [ni kairiia] nako mone.”¹⁸ Ana Mwakuri ni Kamaiu te Tia Kamaiu e aki ti kaitiakiia man te bure, ma ibukin ongeaabaia nakon ana reirei aia mataniwi n nakoanibonga, e a kona te Tia Kamaiu ni kamanoiia man mamaaraia ao ni kamarurungiia. Aia kakaonimaki ae mangori nakon kabwaraan aia bure e karaoa ae bati riki ni kamanoiia aia utu nakon te bwai are a kona n tia ni karaoia i aon te marae ni buaka. Aia nanorinano e aki tuukiia man te kakabwaia. E kamatoaiia ao e kakabwaiaia e na kakabwaiai te roro n tai aika a na roko.

Tokin te karaki e katerea aron ana tangira te Uea ni kakorakorai bwai aika mamaara.”¹⁹ Karo aika kakaonimaki aikai a kanakoia natiia mwane i an ana tararua Ereman. E ngae bwa natimwane a boo ni buaka aika korakora ike ni kabane ngaiia a reke tabeua ikoakiia, ma akea are mate.²⁰ A reke kairake n ataeinimwane bwa te korakora ae kainnanoaki nakon te taanga ni buaka ae kua. A kakaonimaki ao a aintoa riki n te tamnei ngke a karairaki n okiri mwengaia. A kakabwaiaaki aia utu, a kawakinaki, ao a kamarurungaki.²¹ N ara bong, a uanao ataein Ana Boki Moomon ake a karikirakeaki man aia kakairi natimwaane aika itiaki ao n tamaroa.

A tia n reke ara tai n tatabemanira n oin maiura ni karaoi rinerine aika bubuaka. Ti bane n rotaki ni kainnanoan te mwaaka ni kamaiu n ana Mwakuri ni Kamaiu Iesu Kristo. Ti ria n tatabemanira n rairannano ni mwakuri ni kaaitara nakon te kairiiri. “E taku te Uea bwa e aki kona n taraa te bure ma te kariaia teutana nako iai.”²² E aki kona ibukina bwa e ataa are e riai ibukira n riki n Aiarona.

E mwaiti mai iroura ake a tia ni kariaia te mamaara n riki n anuara. Rinanon ana Mwakuri ni Kamaiu Iesu Kristo, n aroia Amonaite, ti kona ni katei kamatoa n tamnei i marenara ao kairuara man ngkoa ake e katai ni kamanenai Tatan. Kamanomano n tamnei ake a kateaki ni katobibiia karo n Amonaite a kakabwaiai ao ni kakorakoraiia, aia utu, abaia, ao roro n tai aika a na roko. Aron naba aio e kona ni koaua nakoira.

Ngaia are e kanga arora ni katean kamatoa n tamnei aikai? Te moan waki e riai ni koaua raoi, babane raoi ao ni kabwanina raoi te rairannano. Rinanon ana Mwakuri ni Kamaiu Iesu Kristo, ti kona riki ngaira n tatabemanira n itiaki ao rawawatan ara kakaaitara nakon te kariiri e na kabebeteaki. Uringnga, te rairannano tiaki te katuua. Bon te kawai ae kaonaki n te kantaninga ae rang ni mimitong are imwaira.

E a tia Tamara are i Karawa ni karekei nakoira bwai ni mwakuri ake a buoka katean te kamatoa i marenan kai rotakira ma ara kakaonimaki. Iangoi katautau aikai:

Karaoi berita aika tabu ao karekei otenanti ibukim. Ngkanne mwakuri n ririkirake ao n onimakinaki n anga otenanti i nanon te tembora ibukiia am bakatibu.
Tibwa te euangkerio ma aika tiaki membwa ke membwa ke raom aika aki bati ni marurung. Tibwatibwaakin koaua aikai a kona n uota te ingaingannano nakon maium.
Kakaonimaki karaoi mwakuri n te Ekaretia ake ko weteaki nako iai, riki te kakawari n te mwenga ma katabeam ni kakawari n reirei. Tai riki bwa ti te tia reirei n te mwenga ao te kakawari inanon 15 te miniti n te namwakaina. Ma, kawariia n tatabemania nako kaain te utu. Kinaiia raoi. Riki bwa raoia ni koaua. Rinanon mwakuri n akoi, kaotia taben nanom irouia n tatabemaniia nako.
Ae rang ni kakawaki, karaoi mwakuri nakoia kaain am utu. Karikirakea maiun tamnein kainabam ao natim bwa a rietata n am moanibwai. Kaokaotiko ni karaoi ibuobuoki nakoiia n tatabemania ao katabeko irouia. Tatauraoi n anganiia am tai ao am kantaninga.

Ni katoai iango aikai, iai te boto n iango ae okioki: katabea maium ni beku ibukiia tabeman. Ngkana ko kabua maium ni buokakia natin Tamam are i Karawa,²³ ana karirii Tatan a na bon akea korakorana ni maium.

Ibukina bwa Tamam are i Karawa e rang n tangiriko, ana Mwakuri ni Kamaiu Iesu Kristo e karekea te korakora anne. E aki kamimi aio? E bati mwaitimi ake a tia n namakin karawawatan rinerine aika bubuaka, ao kam kona n tatabemaningkami n namakina mwaakan ana kabwarabure te Uea, ana nanoanga ao korakorana. I a tia n namakinna, ao I kakoauaa bwa e tauraoi nakoimi n tatabemaningkami, n aran Iesu Kristo, amen.