Ko Kona ni Karaoia Ngkai
Iroun Beretitenti Dieter F. Uchtdorf
Kauoman ni Kauntira n te Moan Beretitentii
Ti ngkana ti tauraoi ni manga teirake ao n reitinako iaon kawaira, … iai te bwai ae ti kona n reiakinna man kabwakara ao n riki n tamaroa ao ni kukurei riki
Ngke I kairake, te bwaka ao te teirake e tara n ae ti teuana te kammwakuri ae titebo. E ngae n anne, imwiin ririki aika a bati, I ata kabanean iangoana ae aki karaunano bwa tuan te bitikiti(physics) e a tia ni bitaki―ao e kangabuakaki nakoiu.
N te tai ae tibwa nako, I nako n tikii ma tibu te mwaane ae 12 ana ririki. Ti rangi ni kukurei n ara tai anne ngke I a okanako te tabo ae buraoki ao n tokina I a kurati nako aon te tabo ae katati.
I kabanea au anga n teirake, ma I aki kona—I a bwaka, ao I aki kona n teirake.
I namakinna bwa marurungin rabwatau e nakoraoi, ma au kantiabwai e a kerikaaki. Ngaia are I a kakoaua raoi bwa bwarau ao matau a tokaraoi ni nneia, ngkai I kainnanoa riki bwa tabeman taan tikii a na aki kinaai. I kona n iangoi n tekateka n akea te bwai ae I kona ni karaoia ngkai a tikii irarikiu ma te nakoraoi, n takarua ni kukurei, “Mauri, Tari Uchtdorf!”
I a moanna n iangoia bwa tera aron kamaiuakiu. Anne e riki ngke e roko irarikiu tibu te mwane. I tuangnga te bwai ae riki, ma e aki rang kan ongora n au kabwarabwara bwa bukin tera I aki kona n teirake. E tarai matau, anga baina, taua baiu, ao n te bwana ae matoa e taku, “Opa, ko kona ni karaoia ngkai!”
N te tai ae waekoa, I teirake.
I teimatoa n aki kakoaua aei. Te bwai are kaanga e aki kona n riki n te tai ae uarereke imwain waekoan ataakin te koaua, ibukina bwa te ataeinimwane ae 12 te ririki e buokai man taku, “Ko kona ni karaoia ngkai!” Nakoiu, bon karinan te aki nanououa, te namakin ni kukurei, ao te korakora.
Taari, ana iai tai inanon maiura are te teirake ao ni waaki nako e kona n taraa n riaon ara konaa. I reiakina te bwai teuana n te bong arei n te katati are e rabunaki n te tinoo. I reiakina te bwai teuana. E ngae ngkana ti iangoia bwa ti aki kona n teirake, e na iai n tainako te kantaninga. Ao n tabetai ti bon tii kainnanoa temanna bwa e na taraira ni matara, taua baira, ao ni kangai, “Ko kona ni karaoia ngkai!”
Te Aki ota n te Bwai ae matoatoa
Ti kona ni iangoia bwa aine a kakai namakina riki te aki tau ao te nanokawaki nakoia mwaane ―bwa namakin aikai e raka riki namakinana irouia nakoira. I aki ataia ngkana e koaua aei. Mwaane ti kona n namakinii taian kairua, nanokawaki ao te aki tau. Ti kona ni bakaea angkoa aki rotiira, ma a bon rootiira. Ti kona n rangi n rawawata n aki taura ao ara aki konabwai nakon are ti moan iangoia bwa tia bon aki kona n tokanikai. Ti kona naba n iangoia bwa ibukina bwa ti a tia n aki tau mai imwaina, te aki tau ai bon tokin kawaira. Ngke e koreia temanna te tia koroboki, “Ti reitinako, n ai aron te booti ni kaitara te aira, ake a teimatoa ni uotiira rikaaki nakon taai ake rimoa.”1
I a tia ni mataku irouia mwaane ake a kaonaki ni konabwai ao te akoi are a toki n iira te mwakuri ae kakaewenako ni katean abanuean te Atua ibukina bwa a tia ni bwaka tetaina ke uatai. Aikai bon mwane n te berita ake a kona n tia n riki n rianako n te nakoanibonga ao ana toro te Atua. Ibukina bwa a bwaka ao a bwarannano, a kerikaki man kabaeakiia n te nakoanibonga ao a karekei tabeua ma aikoa rang tau aia tokanikai.
Ai ngaia are a reitinako, ao a tii katiai mwakoron bwaai ake a kona ni katiai, n aki roko n tokin kabanean aia kona are bon tibwangaia. Te tia kamatenano e korea nanokawakina n taekana, aikai bon ibuakoia tamnei ake a tekebuaka ake a mate n aki karaoi tabeia ake a bon konabwai iai.”2
Akea ae tangiria ni kan bwaka. Ao ti bon aki tangiria ngkana tabeman―riki naake ti tangiria―n noorira ni bwaka. Ti bane ni kan karineaki, ao ni kakannatoaki. Ti tangiria n riki bwa tiambion. Ma arora ni mamate e aki riki n tiambion n akean te mwakuri ao te boaki ke n aki karaoi kairua.
Taari, arora e aki baireaki man mwaitin te tai are ti tatanako iai ma man mwaitin te tai are ti tei iai, taea te bubu mai iaora, ao n ni waaki nako mooa.
Te rawawata are e tangiria te Atua ni karaoan te rairannano nakon te maiu
Ti ataia bwa te maiu ae mamate aei bon te kataitai. Ma ibukina bwa Tamara are i Karawa e tangiriira ma te tangira ae kororaoi, E kaota nakoira te tabo are ti kunea iai te kaeka. E a tia n anganiira te mwabe are ti na kona ni borau iai n te aba ae ti aki ataia ao kataaki aika aki kantaningaaki ake ti kaitarai n tatabemaniira. Ana taeka te burabeti bon mwakoron te mwabe aio.
Ngkana ti bua―ngkana ti bwaka ke ti kiitana te kawai mai iroun Tamara are i Karawa―aia taeka burabeti a tuangiira arora ni waerake ao n oki rikaaki iaon te kawai.
Man koaua ni kabane ake a reireiaki irouia burabeti inanon tienture, teuana are e a tia ni kamatataaki ni kaokiokaki bon te rongorongo ae kaunganano ae karekea te kantaninga bwa aomata nako a kona n rairinanoia, bita kawaia, ao n oki nakon te kawai ae koaua n riki bwa ana reirei.
Anne e aki kananona bwa ti riai ni mwengaraoi ma kabwakara, kairua, ke bure. Ma iai kaokoro aika kakaawaki imarenan te nanokawaki ibukin te bure are e kairi nakon te rairannano ao te nanokawaki are e kairi nakon te bwarannano.
Te Abotoro are Bauro e reirei bwa “ te rawawata n Atua e karika rairan te nano nakon te kamaiuaki … ma rawawatan aon te aba e karika te mate.”3 Te rawawata n Atua e karekea te bitaki ao te onimaki rinanon te Mwakuri ni Kamaiu iroun Iesu Kristo. Rawawatan aon te aba e katikiira rikaaki, kabua te kantaninga, ao e kairiira nakon te kaririaki riki.
Te rawawata n Atua e kairiira nakon te rairaki4 ao te bitaki n nano.5 E karikiira bwa ti na ririba te bure ao n tangira te raoiraoi.6 E kaungaira bwa ti na teirake ao n nakonako inanon otan ana tangira Kristo. Te rairannano ni koaua bon taekan te bitaki, tiaki te kammarakaki ke te kaikoakaki. Eng, namakinan nanom n raraoma ao te nanokawaki ibukin te aki ongotaeka n tabetai a kammaraki ao bon mwaneka aika a rangi ni kakawaki ni karaoan te rairannano ae tabu. Ma ngkana namakinan te kairua e kairi nakon riribakim, ke e totokoira man te manga teirake, e bon totoko nakon kaungakin ara rairannano.
Taari, iai te kawai ae tamaroa riki. Tia teirake ao n riki bwa ana aomata te Atua. Iai ara tiambion, te Tia Kamaiu, are e nakonako inanon mwaruan nuun te mate ibukira. E anga Ngaia bwa kabwaraakin ara bure. Akea riki ae e korakora riki ana tangira nakon aei―Iesu Kristo, Te tibu te teei ae akea memeana, n ingainga ni kawenea Ngaia iaon te bao ni karea ni kabooi mwiin ara bure “te kabanea ni baring.”7 E katoka iaona korakaira. E uotii rawawatara, ara bure iaon Angana. Ao ngkana ti nakoIna, katoka iaora Arana, nakonako ni kawaia ana reirei, ngkanne rinanon te Mwakuri ni Kamaiu e reke iroura te berita tiaki tii te kukurei ao te “rau n te aonaaba aei” ma “maiu naba ae akea tokina n te aonaaba ae e na roko.”8
Ngkana ti karaoi kairua, ngkana ti bure ao ni bwaka, ti na iangoa te bwai are e bon riki n te rairannano. Nanona bitakin nanora ao ara kantaninga nakon te Atua ao kanakoan te bure. Te rairannano ni koaua ae nako man te nano e airi ma te kakoaua mai karawa bwa “ti kona ni karaoia ngkai.”
Antai Ngkoe?
Teuana te kawai ni kakaitara n totokoira man te rikirake bon te nanououa n ataakin bwa antai ngaira ao tera ae ti tangiria raoi.
Ti tangiria ni kabanei ara tai ma natira, ma ti tangiria naba ni kabaeira ma ara takakaro ni mwaane ae ti tatangiria. Ti tangiria ni kauarerekei rawatara, ma ti tangiria naba ni kakukureira n amwarake are ti tatangiri. Ti tangiria n riki n Aron Kristo, ma ti kaota naba unra nakon te aomata are e kairoroira n rimoara ni buti ni kaotia bwa ko aki kukurei n te bwai are e karaoia.
Ana kantaninga Tatan bwa e na kariirira bwa ti na kaibibiti bwaeao ibukin te kukurei ae koaua ao bwaai aika bongana aika akea tokiia ma bwaai aika buratiteki aika a tii kaminoa ma ni katotonga te kukurei ao te kimareirei.
Teuana riki ana kawai ara kairiribai ae e kabongana ni kabwarai nanora bwa ti na aki teirake bwa ti na noria bwa tuua bon bwaai ake a kairoroaki nakoira. I taku bwa bon anuan te aomata n rawa ni bwai ake tiaki oin ara iango n te moan tai.
Ngkana ti tarai amwarake aika kamarurung ao kammwakuran am mwatireti bwa te bwai ae e kantaningaira ara taokita mai iroura, ti na kona ni bwaka. Ngkana ti nooria rinerine aikai bwa antai ngaira ao te bwai are ti tangiria bwa e na riki nakoira, iai ara tai ae korakora n tiku iaon te kawai ao n tokanikai.
Ngkana ti tara te reirei n te mweenga bwa tii ana kouru te titeiki beretitenti, ti kona n taraia bwa e aki bongana. Ngkana ti noria bwa bon ara kouru―te bwai ae ti kan karaoia bwa ti aonga n riki n ai aron Kristo ao n reirei nakoia tabeman―ti na aki tii kakoroi bukin katabeara ma ni katiai naba n te aro ae e na kakabwaiaia utu ake ti kawari ao ara utu naba.
E tau n tabetai, ngaira ake a buokaki irouia raoraora ke utu. Ma ngkana ti tarataranako ma te taratara raoi ni matara ao karaoan bwaai ake e mwannanoia te nano, ti na kinai anga ake e katauraoi nakoia te Uea ni buokiia tabeman ni manga teirake ao ni waaki rake nakon aia konabwai ni koaua. Boki aika a tabu a taekinna, “ao ana bwai Kristo ngkami; ao ana bwai te Atua Kristo.”9
Bon ana bwai mwaakan te maiu n tamnei ni maiuakin maiura n te tamaroa ao te etieti ao ni boboto iaon te tabo are ti tangiria n roko iai n aki toki. Riki ngkana ti kona n noora tokin kawaira tii man te iango ake a boboto iaon te onimaki, e na buokiira n aki raroa n tionako man te kawai.
Ngkana ti kabotoi nanora iaon ara tokanikai ke kabwakara ni katoabong, ti na kona ni kabuai kawaira, tionako, ao ni bwaka. Ma ngkana ara taratara a toka iaon ara kouru ae rietata riki e na buokiira n riki bwa nati mwaane aika tamaroa riki, ao taari, karo aika akoi riki, ao kainnaba aika tangira riki.
Bon nakoia naba naake a katikui nanoia iaon kouru mai karawa a kona ni karaoi kairua, ma a na bon aki konaki. A onimaki ao a katan iaon ana berita te Atua. A na manga teirake ma te kantaninga ae ota n tamaroan te Atua ao te mii ae anainano n te mimitong n taai aika a na roko. A ataia bwa a kona ni karaoia ngkai.
Ko Kona ni Karaoia Ngkai
Ni kabane aomata, kairake ke kara, a tia n rinanon naba te bwaka. Te bwaka bon anne ae ti karaoia n te rabwata ae mamate. Ma ti ngkana ti kona ni manga teirake n reitinako n te kawai ni kaineta te kouru n tamnei are e anganiira te Atua, ti kona n reiakina te bwai teuana man te bwaka ao n riki n tamaroa riki ao n tokina ni kukurei riki.
Tariua aika kam tangiraki, raraou aika kam taniraki, iai taai ake kona tatanako ke n iangoia bwa ko aki kona n teirake ke n reitinako. Onimakina te Tia Kamaiu ao Ana Tangira. Ma onimakinan te Uea Iesu Kristo ao te mwaaka ao te kantaninga ibukin te euangkerio ae kaokaki, ti na kona n teirake ao ni kaeti ikara ao n reitinako.
Taari, ti tangirii ngkami. Ti tataro ibukimi. Ko bia ongo ana tataro Beretitenti Monson ibukim.Tao ngkoe te karo ae kairake, te tia tau ate nakoanibonga ae unimwane, ke te riikan ae tibwa kamatoaki, ti tabeakini ngkami. Te Uea e tabeakini ngkami!
Ti kakoaua bwa kawaimi n taai tabetaie na kaangaanga. Ma I angani ngkami te berita aei n aran te Uea: teirake ao toui mwanekan ara Tia Kabooira ao ara Tia Kamaiu, ao n te bong teuana ao ko na tanrikaaki ao ko na kaonaki ma te kakaitau ae akea tokina bwa ko rineia n onimakina ana Mwakuri ni Kamaiu ao mwaakana n tabekikorake ao e na anganiko te korakora.
Raou ao taariu aika a tangiraki, tai taraia bwa iraua am tai are ko marannako iai ke ni bwaka, teirake! Tokin kawaim bon te mimitong! Kaeta ikam ao nakonako inanon otan ana euangkerio Iesu Kristo are e kaokaki! Ko korakora riki nakon are ko ataia. Ko konabwai riki nakon are ko iangoia. Ko kona ni karaoia ngkai! Man aikai I kakoaua n aran ara Mwatita ao te Tia Kabooira, Iesu Kristo ae tabu, amen.