Nakoiia Tibuu Ataei
Iroun Beretitenti Henry B. Eyring
Te Moan Kauntira n te Moan Beretitentii
Iai te tua ae korakora iaoia are e na buokiira ni kaitarai kakaewenako ao ni kairiira ni karika te utu ae kakukurei.
Te ririki aio uoman tibura natiaine aika a okoro tamaia (natin Beretitenti Eyring mwaane) aika a nang mareaki. I nanon tabeua te ririki e na reke te mwaiti ae 10 man aia katin e na roko n tetaina ni maiuia are a na rimwi nako nanon aonaban te kateiutu ae kamiimi.
Te iango anne are e kakukureiai e karikai bwa N na iango raoi ngke a tuangai ibukin au taeka n reirei ibukin karikirakean te utu. Oin aia titiraki, “Baikara rinerine ake I kona ni karaoi ake a na kairai nakon te kukurei?” Ao te titiraki are e kaitara, “Baikara rinerine ake a kona ni kairai nakon teakikukurei?”
Te Tama are i Karawa e a tia ni karaoira n tatabemaniira bwa ti na kakaokoro. Akea uoman mai buokora ae iai irouia te taneiai ae titebo. Akea uautu aika titebo. Ai ngaia are e aki kakubanako bwa te reirei ibukin ae ko na kanga n rinea te kukurei i nanon maiun te utu e bon kaangaanga bwa ko na anga. Ma e ngae n anne te Tama are i Karawa e a tia ni katea te mwakuri ae titebo nakon te kimwareirei ibukiia Natina ni kabane. Bwa baikara arora i bon iroura ke baikara taneiai ake ti na karekea, bon iai bwa ti teuana te babaire ibukin te kimwareirei. Te babaire anne e na iri ana tua ni kabane te Atua.
Ibukira ni kabane, n ikotaki ma tibuu ake a iangoa te mare, bon iai te tua ae korakora i aoia are e na buokira ni kaitarai kakaewenako ao ni buokiira ni karika te utu ae kakukurei. E kaineti aio nakon aekaki nako n iraorao n aki taraia bwa aekara. E kaokiokaki ni kabutai booki aika tabu ao inanon aia reirei burabeti i nanon ara bong. Aio ana taeka te Baibara ibukin ana taeka n reirei te Uea nakoiia ni kabane ake a tangiria ni maiu n akea tokina i nanon te tangira ni kukurei:
“Ao temanna i buakoia, ae te tia reirei te Tua, e titirakina Iesu ni kataia, ao e taku,
“Te Tia Reirei, tera te tua ae korakora i buakon taian tua?
“Ao Iesu e taku nakoina, Ko na tangira Iehova ae Atuam n nanom ni kabanea, ao tamnein ni kabanea, ao ni wanawanam ni kabanea.
“Mooa te tua aei ao e korakora.
“Ao ai aron naba are te kauoua, ko na tangira raom n ai aron tangiram i bon i roum.
“E bane te tua ma aia taeka burabeti nako n tauraki n tuua aika uoua aikai.”1
Man te taeka ae bebete anne e aki kaangaanga kakimototoan ni kabane ake I a tia n reiakin taekan aekan rinerine ake a kairiiri nakon te kukurei i nanon utu. I moanna ma te titiraki, “Baikara rinerine ake a kairai nakon tangiran te Uea ma nanou ni kabane ao tamneiu ao wanawanau ni kabane?” Ibukiu e a tia bwa N na rineakatukakiu ike I namakina te kimareirei n te kabwara bure rinanon ana Mwakuri ni Kamaiu te Uea.
N ririki ake a nako I bwabetitoa te ataeinimwaane i Albuquerque, New Mexico, are raou ni mitinare ao ngai ti a tia n reireinna. I katebonakoa te kairake ni mwaanei nanon te ran ao ni kawaerakea. E kan titebo abakina ma ngai ibukina bwa e kona n taetae ni kaineti nakon taningau. Ma te ran man te tabo ni bwabetito ao rannimata aika baro rikaaki i moana ao te kimareirei i nanon bwanaana, e taku, “I a itiaki, I a itiaki.”
I a tia n nori rannimata aika aekan akanne ni kukurei ni matan temanna are e taekini ana taeka ana Abotoro te Atua: te Abotoro anne e taku nakoina, i mwin te itaramata ni maroro ae akoi man karaoaki raoi, “I kabwara am bure n aran te Uea. E na kabwara am bure i nanon oin Ana tai ao i nanon oin Ana kawai.” Ao E karaoia.
I a tia n noora bukin tera te Uea e kona n taekina anne ngkana a kabwaraaki bure ao E aki kona ni manga uring. Ma ni mwaakan te Mwakuri ni Kamaiu, aomata ake I kinaiia raoi ao n tangiriia a riki bwa aomata aika boou, ao ana mwakuri te bure a kamaunaaki. Nanou e a tia ni kaonaki ma te tangira ibukin te Tia Kamaiu ao te Tama ae tangira are e Kanakoa.
Te kakabwaia ae korakora anne e a tia n roko man kaungakiia aomata ake I tabeakiniia bwa a na nakon te Tia Kamaiu ibukin kanakoan te maraki are tii Ngaia are e kona n anga. Anne bukina are I kaumakiia ake I tangiriia ni butimwaea ao ni kabubura te wewete ni kabane ake a anganaki i nanon te Ekaretia. Te rinerine anne bon teuana te kiing ae korakora nakon kukurein te utu.
Te korakai are ti namakinii ni katoa tain maiura e kona ni kataira n aki butimwaea ke ni mwaninga wewete ni mwakuri ibukin te Tia Kamaiu. Anne e a kona ni katikuira n te kaangaanga n te maiu n tamnei i bon ibukira, kaainabara, ao ara utu. Tabeua mai buakon wewete akanne a kona n taraa n aki kakawaki, mamaiuu, ao au utu, a bon bitaki ibukin ae raoiroi riki man butimwaean weteakiu n angareirei nakon te kooram n riikan. I namakina tangiraia riikan akanne ibukin te Tia Kamaiu ao Ana tangira ibukiia.
I a tia n noora anne n riki ni maiun te beretitenti mai mwaaina n te titeiki ao te mition n ana wewete ni buoka te tia reirei n te kooram. I ata temanna are e a tia n riki bwa te bitiobi ao i mwina bwa te Itingaun n te Aono are e kamanenaaki iroun te Uea ni buoka te ataeinimwaane n aia kooram taan tia reirei are e a ikoaki n te kabuanibwai. Kakai man te mwakuri n ibuobuoki anne e roti maiuia aika bati n ikotaki ma ngai ao ni kabatia aia tangira ibukin te Tia Kamaiu.
I nanon buokakia tabeman, ti riai ni bubuti ibukin ana iraorao te Tamnei ae Raoiroi. Te tokanikai inanon ana mwakuri te Uea n ibuobuoki n tainako e karekei kakai ake a riaon mwaakara. Te karo ae iai natina ae rang n aki ongotaeka e ataia bwa e koaua anne, n ai aron te tia kakawari n te mweenga are e kataetaeaki iroun te aine are e kakaaea te karaunnano ngke buuna e a tuangnga bwa e nang kitanna. Toro aika uoman akai a kakaaitau bwa a tataro n te ingabong anne ibukin te Uea bwa e na kanakoa te Tamnei ae Raoiroi bwa raoia.
Bon ti man ana iraorao te Tamnei ae Raoiroi ae ti na kantaninga te katiteuanaki bwa rao ngaira ae titebo arora n te mare n akea te kauntaeka. I a tia n noria bwa e kanga te iraorao ni kakawaki ibukin karekean te kukurei n te mare. Te kakai ibukin te riki n titeuana e tangira ana buoka karawa, ao e anaa te tai. Ara kouru bwa ti na maeka ni botaki n akea tokina i rarikin te Tama are i Karawa ao ara Tia Kamaiu.
Tamau ao tinau a bon rang ni kaokoro i bon irouia. Tinau bon te tia anene ao te tia koro tamnei. Tamau e tatangira te chemistry. Tetaina n te kaotioti n te katangitang, tinau e bon kubanako ngke tamau e teirake ao ni moanna n nako i mwaain ae a kaota kakatongaia taan tia mataku. Tinau e titirakinna bwa e na nakea. Ana kaeka bon akea burena, “E tuai bane te kamataku?” Ti ana mwakuri ae bebete te Tamnei ae Raoiroi are e a karokoa ma neierei n te kaotioti ao are e a tutuangnga bwa e na nako ma neierei nakon te kaotioti i nanon taai aika bati riki.
Tinau e maeka i New Jersey inanon 16 years n te aro are tamau e kona ni boutoka te utu man karaoan kakae ao n anga reirei n te chemistry. Nakoina bon te angakarea kaokoroana ma tinana are akea buuna ao tarina ae e tuai iein are e a tia n tararuaia i nanon te auti n utu ae e a bati ririkina n te tabo ni man. A uaia ni mate ngke Tinau e raroa nako i New Jersey. Akanne bon tii taai are I a tibwa noora tinau n tang.
Ririki ake imwiina tamau e anganaki te mwakuri i Utah. E a manga titirakina riki tinau n arona ae e itiaki, “Mildred, terana am iango ae N na riai ni karaoia?”
E taku, “Henry, karaoa are ko taku bwa te kabanea n tamaroa.”
E kabutua te mwakuri. Te ingabong are i mwiina e korea ana reta tinau nakoina are I tangiria bwa e na iai irou. I uringa are e tuangnga, “Tai kaukia ikai. Nakon te aobiti ao kaukia ikekei.” E moanaki ma kaotan te nano ae e aki kukurei. E a tia ni berita nakon buuna te aine n ririki mai mwaaina bwa ngkana e kona, e na kairia ni kaania ma ana utu (i Utah). E bon rang ni mimi man kaotan unna. E aki uring baike e tangiri nanona. E waekoa ni kanakoa te rongorongo ni butimwaea te mwakuri.
E taku, “Mildred, bukin tera ko aki tuangai?”
E taku, “Ko bon kantaningaaki bwa ko na uringnga.”
E aki toki n taekina te rinerine anne are te mwaing nako Utah bwa oin ana rinerine, tiaki bwa te anganako tabeua mwakoron ana mwakuri. A tia ni karekea te kakai n riki n ti teuana. E na rang n tikiraoi riki ngkana Dad e a tia ni kauringaki iroun te Tamnei ae Raoiroi n te berita are e a tia ni karaoia n ririki ake mai mwaaina. Ma e bon kariaia te Tamnei ae Raoiroi ni kamaraua nanona bwa e aonga ana rinerine te bu te aine e na titebo ma ana rinerine.
Te Tama are i Karawa iai ana noraaba ae kororaoi, e ataira n tatabemaniira nako, ao n atai kanoan ara bong aika a na roko. E atai kaangaanga ae ti na rinanoi. E kanakoa Natina bwa e na korakai bwa e aonga n ataia bwa e na kanga ni buokiira inanon katakira ni kabane.
Ti ataia bwa te Tama are i Karawa iai natina tamnei n te aonaba aio ake n tabetai a rinea te bure ao te aki kukurei ae korakora. Anne bukina are E kanakoa ana Moannati bwa ara tia Kabooira, are te kabanea ni kakannato ni mwakuri n tangira ae akea n arona. Anne bukina ae ti na riai ni kantaningaia bwa e na anaa ana ibuobuoki te Atua ao te tai ni katamaroaira, ibukin te maiu ae akea tokina, ni maeka ma Tamara.
Te maiu n utu e na kataira. Anne teuana mai buakon ana kantaninga te Atua n anganakira te bwaintituaraoi n te maiu ae mamate—ni kakorakoraira ma ni karekeira bwa ti na rinanon te kataaki. Anne e na riai ni koaua n te maiu n utu are ti na kunea te kimwareirei ae korakora ao te nanokawaki ao kaangaanga aika korakora ake a kona n taai tabetai n tara ni korakora nakon mwaakara ni kaaitaraiia.
Beretitenti George Q. Cannon e taekina aio ibukin ae e kanga te Atua n tia ni katauraoiko ao ngai ao natira ibukin te kataaki are ti na kaaitarai: “Akea mai buakora are e tuai ni karekea ana tangira te Atua. Akea mai buakora are E a tia n aki tararuaia ao ni karaoi mwakuri n akoi. Akea mai buakora are E a tia n aki tangiria ni kamaiua, ao ni bairea te kawai ni kamaiu. E a tia n anganiia Ana anera tabeia ni kaineti ma ngaira n tatabemanira nako. Ti kona n iangoira bwa ti aki kakaawaki ao n tau bwa ti na ribaaki ao tabeman aomata a na iangoia n ti tearona, ma te koaua e bon tiku n arona bwa ngaira natin te Atua, ao bwa E a tia ni bon anganiia Ana anera—aomata aika aki noraki ni mwaakaia ao korakoraia—katabeaki ibukira, ao a tararuaira ao a kawakinira.”2
Tera are e reirei i aona Beretitenti Cannon e bon koaua. Ko na kainnanoa te kakoaua anne, n aron are I a tia ni kainnanoia ao n onimaki iai.
I tataro ma te onimaki bwa temanna are I tangiria e na kakaae ao e na namakina mwaakan te Mwakuri ni Kamaiu. I tataro ma te onimaki bwa a na roko aomata ake a mamate ake a karaoi mwakuri bwa anera ni buokiia, ao a roko.
Te Atua e a tia ni karaoi aanga ni kamaiuiia Natina n tatabemania nako. Ibukiia aika bati, anne e na tangira ae ko na katukaki ma te tari ke titita ke te tibu are e tangiriia n aki tabe bwa tera are a karaoia.
Ririki ake a nako temanna raoraou e taekina tinan tamana. E a tia ni maiuakina te maiu ae tamaroa, n taainako e kakaonimaki nakon te Uea ao nakon Ana Ekaretia. Ma temanna tibuna te mwaane e rineia bwa kaain te karabuti. N tokina ao e a motikaki taekana bwa e na kabureaki. Raoraou e uringa bwa tibuna te unaine, ngke e buti n te kawai ni kabubuti ni kawara tibuna n te karabuti, a ranran matana ngke e tataro ma te rawawata n ana iango, “I a tia ni kataia ni maiuakina te maiu ae tamaroa. Bukin, bukin tera I anganaki te kabuanibwai aio iroun tibuu te ataeinimwaane ae tara n ae e a tia n uruaka maiuna?”
Te kaeka e roko nakon ana iango inanon taeka aikai: “I anganiko nakoim ibukina ae I ataia bwa ko kona ao kona tangiria n aki tabe bwa tera are e karaoia.”
Iai te reirei ae kamimi ibukira ni kabane. Te kawai ibukiia kaaro ao tiibu ao ni kabane ana toro te Atua aika tangira e na aki bebete n te aonaaba ae ea rikirake ni buakaka. Ti aki kona ni kairoroia natin te Atua bwa a na rinea te kawai nakon te kukurei. Te Atua e aki kona ni karaoa anne ibukin te inaomata n rinerine are E a tia n anganiira.
Te Tama are i Karawa ao Natina ae Tangiraki a tangiriia ni kabane natin te Atua n aki tabe bwa tera are a karaoia ke n riki bwa antai ngaia. Te Tia Kamaiu e kabooa te bure ni kabane, n aki taraia bwa buakakara. E ngae ngke e na riai n iai te motikitaeka, te tai ae angaraoi ibukin te nanoanga e kabwabwakaki bwa e na aki anaa ana tai te motiraoi.
Aramwa e taekin te kantaninga anne nakon natina te mwaane Koriaenton n taeka aikai: “Ngaia are ni kaineti ma te motiraoi, te babaire ni kabomwi e bon kona ni koro bukina, ma ti man rairannano mairouia aomata n te tai ni kataitai, eng, te tai ni katauraoi aei; bwa ngke akea aaro, ao bon akea korakoran te nanoanga ma e na ti kamauna te motiraoi. Ao ngkanne te mwakuri ni motiraoi e bon kona ni kamaunaaki, bwa ngkana e riki aei; ao te Atua bon tiaki te Atua.”3
Au rongorongo ngkanne nakoia tibuu ataei, ao ngaira ni kabane ake a kataia ni karikiia utu aika akea tokiia, bon are iai te kimwareirei ae beritanaki ibukiia aomata ake a kakaonimaki. Man ngke akea te aonaba, te Tama ae Tangira i Karawa ao Natina ae Tangiraki a tangiriia ao ni mwakuri ma naake a ataiia bwa a na kitana te raoiroi. Te Atua e na tangiriia n aki toki.
Iai iroum te tekeraoi n ataia bwa a reiakina te babaire ni kamaiu man reirei ake a karekei n te aonaba n tamnei. Ngaiia ao ngkoe kam bon kakaonimaki ni kariaiakaki n roko nakon te aonaba ike e bati aika aki.
Ma ana ibuoboki te Tamnei ae Raoiroi, e na kauriuring bwai ni kabane i nanora ake E atong nakoira. Ti aki kona ni kairoroiia tabemwang bwa a na karekea ana koaua te Tamnei ae Raoiroi, ma ti kona ni kariaia bwa a na nora ana koaua te Tamnei ae Raoiroi i nanon maiuira. Ti kona n tainako ni karekea te kakoaua bwa ngaira ni kabane ti a tia n namakina te kimwareirei ni botaki bwa kaain ana te utu ae tangiraki te Tama are i Karawa. N ana ibuobuoki te Atua ti a kona ni bane n namakinna te kantaninga anne ao te kimwareirei anne riki. I tataro bwa ke e reke anne iroura ni kabane n aran te Uea Iesu Kristo, amen.