2010–2019
Te Mwaaka n te Nakoanibonga
Okitobwa 2013

Mwaakan te Nakoanibonga

Iroun Unimwane Neil  L. Andersen

Man te Kooram n Abotoro n te Tengaun ma Uoman.

Te mwane e kona ni kauka te keeten bwa e aonga kabuebuen otan tai n rin inanon te ruu, ma te mwane e aki taua taekan tai ke te ota ke te kabuebue are e uotia.

Kakabwaia n te Nakoanibonga A Tauraoi ibukiia ni Kabane.

Ngke ataei a kukurei n anenea kunan te Buraimwari n tain te botaki n toa “Love Is Spoken Here,” a bane ni moangare taan taromauri ma te kaitau. Te tina ae ninikoria ni kaikawaia natina aika niman e anga taningana n ongora nakon te kauoua ni kibu: “Mwengau e teimatoa ni kakabwaiaki ni korakoran mwaakan te nakoanibonga].”1 E iango ma te nanokawaki, “Natiu a tuai n ata te mwenga anne.”2

Au rongorongo nakon te aine ae kakaonimaki aei ao nakoia ni kabane ake a kona ni maiuakinna ni katoa aua “kakabwaia man korakoran mwaakan te nakoanibonga,” ni bwai nako ake ti kaitarai.

N tabetai ti rang karekerekea mwaakan te nakoanibonga ma mwane n te Ekaretia. Te nakoanibonga bon te mwaaka ao ana kariaia te Atua are e anga ibukin kamaiuaia ao kakabwaiakiia ni kabane—mwane, aine, ao ataei.

Te mwane e kona ni kauki keeten bwa e aonga n rin otan tai inanon te ruu, ma te mwane e aki bwaibwai n tai, te ota, ke te abue are e uotia. Kakabwaia n te nakoanibonga a korakora n akea tokina nakon te mwane are e anga te mwaaka n te nakoanibonga.

Karekean te kakabwaia, mwaaka, ao berita n te nakoanibonga n te maiu aei ao are imwina bon temanna are reke irouna te tibwanga ae korakora ao te tibwanga n rabwata. Ngkai ti tau, otenanti n te nakoanibonga e karakai riki maiura iaon te aba ao e katauraoira ibukin te berita ae tamaroa n te aonaaba are imwaira. E taku te Uea, “Inanon te otenanti …e kaotaki te mwaaka n Atua.”3

Iai kakabwaia aika onoti mai iroun te Atua ibukiia aomata nako aika tau ake a tia ni bwabetitoaki, karekea te Tamnei ae Raoiroi, ao ni kana te toa. Te tembora e uota rakan te ota ao te korakora, n airi ma te kakoaua n te mangauti ao te berita n te maiu are akea tokina.4

A rikirake kakabwaia aikai ni kabane ngkai ti kawakin tua ao ni karikirakei ara onimaki iroun Iesu Kristo. Ni kabane otenanti a kaoira ni karaoa ao ni kawakin berita aika a tabu ma te Atua. Ngkai ti kawakin berita aika a tabu aikai, ti karekea mwaakan te nakoanibonga ao kakabwaia.

Ti namakina mwaakan te nakoanibonga inanon maiura ao n nori irouia membwa aika a kawakin berita aika a tabu n te Ekaretia? Ti noria irouia aika boou aika a tibwa rairaki ngkai a otinako man te ran ni bwabetito n namakina kabwaraan aia bure ao te kaitiakaki. Ti noriia natira ao te roron rikirake ni kakai namakin nakon ana wirikiriki ao ana kairi te Tamnei ae Raoiroi. Ti nori otenanti n te tembora n riki bwa te biikan n te korakora ao te ota ibukiia mwane ao aine aika raraoi ni kabuta te aonaaba.

N te namwakaina ae nako I mataku irouia tanga n ataei ake a karekei korakora man mwaaka ni kabaebae n te tembora ngke e bungiaki te nati te mwane ma e maiu ti n teuana te wiiki. Rinanon otenanti n te nakoanibonga, te tanga ni kairake ao ni kabane ngaira ti karekea te karaunano, korakora, iango, rau, ao te berita ae akea tokina.5

Tera Ae Ti ataia n te Nakoanibonga

Tabeman aomata a kona n titiraki, “Ngkana te mwaaka ao kakabwaia n te nakoanibonga a kona n anganaki ni kabane, bukin tera otenanti n te nakoanibonga a karaoaki irouia mwane?”

Ngke te anera e titirakina Nibwaai, “Ko ataia ae e na ruo te Atua ni Kamangoria nako aon te aba?” E kaeka Nibwaai ni kaota te koaua, “I ataia ae e tangiriia natina; ma I aki atai nanon bwai ni kabane.”6

Ngkana ti taekina te nakoanibonga, e mwaiti bwai aika ti atai.

Ni Kabane Titebo Aroia

Ti ataia bwa te Atua e tangiriia Natina ni kabane ao E bon aki inanonano n tarakin aroia aomata. “Akea ae totokoia ngkana e nakoina, … mwane ke te aine;… ao titebo aroia ni kabane i matan te Atua.”7

N aron ae ti kakoaua ni kabane bwa ana tangira te Atua e “katiteboaki” irouia Natina mwane ao aine, ti ataia naba bwa E aki karikiia mwane ao aine ni katiteboi aroia. Ti ataia bwa kakaokoron rabwata aikai a kinaki n aroia ni mwakuri ao a kakawaki n te maiu n rabwata ao n aki toki. Tibwanga aika a tabu a anganaki aine ao mwane.8

Man Moan Karikanbwai

Ti ataia bwa ni moan karikan bwai te Uea e katea aron kabonganakin Ana nakoanibonga. “Te Nakoanibonga e moan anganaki Atam.”9 Noa, Aberaam, ao Moote ni kabane a karaoi otenanti n te nakoanibonga. Iesu Kristo ngaia te Kabanea n Rietata n Ibonga. E weteia Abotoro. “Ngkami kam aki rineai,” E taku, “ma Ngai ae I rinei ngkami, ao I katabui ngkami.”10 N ara bong aikai taan uarongorongo mai karawa a kanakoaki mai iroun te Atua. Ioane te Tia Bwabetito, Betero, Iakobwa, ao Ioane a kaoka te nakoanibonga nakon te aonaaba rinanon te Burabeti Iotebwa Timiti.11 Aio ana kawai Tamara are i Karawa ni karaoan Ana nakoanibonga.12

A Mwaiti Bwaintangira mai iroun te Atua

Ti ataia bwa mwaakan te nakoanibonga ae tabu e aki tii mwakuri iaon te onimaki, te Tamnei ae Raoiroi, ao te bwaintangira n te tamnei. E kauring koroboki aika a tabu, “Kam na aki kakeaa ana bwaintangira te Atua, bwa a bon mwaiti… Ao a bon mwaiti aron kamwakuran bwaintangira aikai; ma bon te Atua ae ti temanna ae mwakuri [irouia] ni kabane.”13

Aro n Tau

Ti ataia bwa arora n tau e na boboto n tainako ni karaoan ao karekean otenanti n te nakoanibonga. Titita Linda K. Burton, te beretitenti ni kabuta n te Botaki n Aine, e taku, “Te etieti bon ngaia ae e na karekei arora aika tau … ni kaoa mwaakan te nakoanibonga inanon maiura.”14

Te katoto, iangoi tamnei aika kammaira aika e taona te aonaaba ni kabuta. Ana kainibaire te Uea n te kororaoi e aki kariaia tamnei aika kammaira i buakoia naake a taui nakoa n otenanti n te nakoanibonga. E taku te Tia Kamaiu:

“Rairinanomi man …ami botaki ni karaba aika buakaka.”15

B’aen te rabata te mata. … Ma ngkana bon te ro naba te ota I nanom, ao ai bati ra te ro.”16

“Ba ane taratara te aine ba e na kaitatan nako ina, ao e a tia ni wene ni bure ma ngaia i nanona.”17

Mwakuri aika karaoaki n aki kororaoi ke kabutan te toa, kakabwaian te aoraki, ke karaoan otenanti riki tabeua, e a tia n taekinna Unimwane David  A. Bednar, weteakin aran te Atua ni bakanrerei.18 Ngkana e aki tau temanna, e riai ni kerikaaki man karaoan otenanti n te nakoanibonga ao n tataro mwaaka ni kawara ana bitiobi n te moan mwaneka n rairannano ao n okirii taian tua.

Te Nanorinano

Te bwai teuana ae ti ataia bwa a rangi ni mwaiti kakabwaia n te nakoanibonga a mwaiti inanon taian utu ike te tina ao te karo a katiteuanaki ni kairakiia natiia. Ma ti ataia naba bwa te Atua e ingainga ni katauraoi kakabwaia n aron aikai nakoia aika a mwaiti n aro tabeua.19

Te tina ae e uota te rawawata ni katauraoi n te maiu n tamnei ao n rabwata ibukin ana utu, ma e kabwarabwara n ana namakin bwa weteakiia ana taan reirei n te mwenga ni kakabwaia temanna natina e kainnanoa ana nanorinano. Ma e reitia ma ana iango are e aikoa riai n nanorinano nakon riki aia katauraoi ana taan reirei n te mwenga ibukin kakabwaian natina.20

Kiingin te Nakoanibonga

Ti ataia bwa kiingin te nakoanibonga, are irouia membwa n te Moan Beretitentii ao Kooram n Abotoro ake Tengaun ma Uoman, e kaira ana mwakuri te Uea iaon te aba. Kiing n te nakoanibonga aika onoti a katokaaki iaoia titeiki beretitenti ao bitiobi ibukin tabeia n tabo ake a mena iai. Ao a weteia mwane ao aine man te kaotioti ake a kamatoaki ao a katabuaki n anga te kariaia n reirei ao ni karaoi.21

Ngkai ti atai bwai aika a mwaiti n te nakoanibonga, te taratara rinanon te renti n te maiu ae mamate e aki bwanin te ota iai n ana mwakuri te Atua. . Ma ana kauring ae bebete, “Ba tiaki nanomi nako nanou nako, ao tiaki naba arou nako aroma nako,”22 e kakoaua nakoira bwa inanon tai ao te taratara ae akea tokina ti na kona nori bwai “n aroia ni koaua”23 ao ni kabwanina ni kamatatai riki n Ana tangira ae kororaoi.

Ti bane n anganano ni beku. N tabetai ti namakinna bwa e aki tau ara mwakuri nakon nakoara, ao ti tuangaki bwa tina karaoa riki ae mwaiti. N tai tabetai ti kakaitau ngkana e a roko te tai ni kainaomataaki. Ti aki bairei wewete ake ti karekea.24. I reiakina aio ni moan au mare. Ngke ti tanga ni kairake, kainnabau, Kathy ao ngai ti maeka i Florida. Te Tabati teuana te kauntira n te titeiki beretitentii e kabwarabwara nakoiu bwa a namakina te kukurei ni wetea Kathy bwa te tia reirei n te tieminarii n te karangaina.

“Ti na kanga ni karaoia?” I titiraki. “Iai natira aika uarereke, te tieminarii e waaki n te aoa 5 n te ingabong ao ngai te beretitenti irouia Kairake n Ataeinimwane.”

Te kauntira e moangare ao e taku, “E na bon nakoraoi. Ti na wetea neienne, ao ti na kainaomatako.”

Ao anne te bwai are a karaoia.

Aia Anganano Aine

Ni bubuti ibukin ao ni kakauongo nakon te iango ao te raraoma are e tabekaki irouia aine e kakawaki n te maiu, inanon te mare, ao ni kateakin abanuean te Atua.

Uabwi te ririki n nako n te maungatabu ni kabuta, Unimwane M. Rusell Ballard a kairekerekea te maroro are karaoia ma te beretitenti ni kabuta n te Botaki n Aine. Iai te titiraki are e tabekaki ibukin kakorakoraan kororaoia te roronrikirake ni katauraoi n nako ni mitinare. Titita Elaine Jack e taekinna ma te moangare, “Ko ataia, Unimwane Ballard, [ainen] te Ekaretia a kona ni iai aia iango aika tamaroa … ngkana [a] tuangaki. Ni koauana, … bon ngaira tinaia!”25

Beretitenti Thomas S. Monson iai rongorongon maiuna aika a nako n te bubuti ao ni kaekaan raraomaia aine. Te aine are e karekea te bitaki ae korakora nakoina bon Titita Frances Monson. Ti rang n tangiriia. Are e taekinna naba n te Kaabong ae e nako, Beretitenti Monson e kauringiia Mataniwi ni Kabuta mwaitin are e reiakinna irouia aine ake akea buuia 84 n ana uoote ngke e bitiobi. E korakora aia boutoka n ana mwakuri ao inanon nako maiuna.

E aki rang kamimi, imwain ana babaireBeretitenti Monson e tataro mwaaka ibukin bitakin te ririki ibukin te mwakuri ni mitinare, a mwaiti maroro ma te Botaki n Aine, Kairake n ataeinnaine, ao te beretitentii n Buraimwari.

Bitiobi, ngkai kam ira ana banna Beretitenti Monson, ko na namakina bain te Uea ae mwaiti riki ni kairiri ni kakabwaia am mwakuri ae tabu.

Ti maeka tabeua te ririki i Brazil. Teutana imwin rokora, I kaitibo ma Adelson Parrella, are e riki bwa te Itingaun, ao tarina Adilson, are e beku inanon ara titeiki beretitentii. Imwina I kaitibo ma tarin Adalton, e beku bwa te beretitentii n titeiki i Florianopolis ao tarina naba temanna Adelmo, are e bitiobi. I kukurei n aia onimaki taari aikai, ao I titiraki ibukiia aia karo.

A bwabetitoaki te utu aeii Santos, Brazil, 42 te ririki n nako. E taku Adilson Parrella, “N te moan tai e tara n rangi ni kukurei ara Karo ibukin kainakin te Ekaretia. E ngae n anne, n [te tai ae uarereke] e a aikoa kakaonimaki ao e tuanga tinara bwa e na aki ira te taromauri.”

Adilson e tuangai bwa tinana e itui kunnikai nakoia kain rarikiia ibukin kabwaka kantokaia natina n nako n taromauri. Taari aika aman a ikotaki n rianna iaon teuana te maire nakon te taun are teuana, toka n te bwati ibukin 45 te miniti, ao imwina a bane n rianna 20 te miniti riki nakon te umwantabu.

E ngae ngke e aki kona n taromauri ma natina, Titita Parrella e wareki boki aika a tabu ma natina mwane ao aine, n reireiniia te euangkerio, ao n tataro ma ngaia. Mwengaia ae mangori e kaonaki ni kaubwain kakabwaia ni mwaakan te nakoanibonga. Ataeinimwane a ikawairake, a nako ni mitinare, a reirei, ao mareaki n te tembora. E kaonaki mwengaia n ana kakabwaia te nakoanibonga.

Ririki ake imwina, te titita ae akea buuna, Vany Parrella e rin n te tembora ibukin ana entaumente, teutana imwina, beku inanon teniua te mition i Brazil. Ngkai ai 84 ana ririki, ao ana onimaki e reitinako ni kakabwaiaia roro ake imwina.

Kakoaua ao Berita

Mwaakan ana nakoanibonga te Atua ae tabu e kuneaki inanon Ana Ekaretia Iesu Kristo ibukiia Aika Itiaki ni Bong aika Kaitira. I kakoaua bwa ngkai ko tau ni karaoi otenanti n te nakoanibonga, te Uea e na anganiko korakora aika mwaiti riki, rau, ao ataakin ae akea tokina. Aekakira nako am kangaanga, mwengam e na “kakabwaiaki ni korakoran mwaakan te nakoanibonga” ao naake a kaan nakoim ni kabwanina nanoia ni kan karekei kakabwaia aikai ibukiia.

Ngaira mwane ao aine, taari aine ao mwane, nati mwane ao nati aine iroun te Atua, ti botaki ni waaki nako. Aio ara tai, tibwangara, ara kakabwaia. Aio tokin kawaira—ni katauraoa abanuean te Atua ibukin okin te Tia Kamaiu. N aran Iesu Kristo, amen.

Bwai aika a na taraki

  1. “Love Is Spoken Here,” Aia Boki n Anene Ataei, 190–91.

  2. Emeeri are karekea n Aokati 5, 2013.

  3. Doctrine ao Covenants 84:20.

  4. Taraa Doctrine ao Covenants 138:37, 51.

  5. Taraa Doctrine ao Covenants 84:35; 109:22.

  6. 1  Nibwaai 11:16–17.

  7. 2  Nibwaai 26:33.

  8. Taraa “Te Utu: Te Katanoata nakon te Aonaaba,” Ensign ke Riaona, Nobembwa 2010, 129.

  9. Teachings of Presidents of the Church: Iotebwa Timiti (2007), 104; tara naba Doctrine ao Covenants 84:16; 107:40–53; 128:18, 21; Russell  M. Nelson, “Lessons from Eve,” Ensign, Nobembwa 1987, 86–89.

  10. Ioane 15:16.

  11. Taraa Joseph Smith—History 1:72; tara naba Doctrine ao Covenants 13 27..

  12. Taraa M. . Russell Ballard, “Let Us Think Straight,” BYU Education Week, Aokati. 20, 2013. Unimwane Ballard e tia n taekinna: “Bukin tera ngkai a anganaki mwane te nakoanibonga ao tiaki aine? Beretitenti Gordon  . B. Hinckley e kabwarabwara bwa bon te Uea, tiaki mwane, ‘are e baireia bwa mwane n Ana Ekaretia a riai n taua te nakoanibonga,” ao bon te Uea naba are e anganakiia aine ma ‘konabwai n rauniia te botaki ae korakora man tamaroa, are te Ekaretia ao abanuean te Atua’ (“Ainen te Ekaretia,” Ensign, Nobembwa. 1996, 70). Ngkana a bane n taekinaki ao ni katiaaki, te Uea e tuai ni kaotia bwa bukin tera E katea Ana Ekaretia n aron are E karaoia.”

  13. Moronai 10:8.

  14. Linda  K. Burton, “Nakoanibonga: Te Onimaki ae Tabu ae e na Kabonganaaki Ibukin Kabwaiaia Mwane, Aine, ao Ataei” (Brigham Young University Maungatabu are e taetae iai nakoia Aine, Meei 3, 2013), ce.byu.edu/cw/womensconference/pdf/archive/2013/lindaBurtonTalk.pdf.

  15. 3 Nibwaai 30:2.

  16. Mataio 6:22–23.

  17. Mataio 5:28; tara naba Aramwa 39:9. Beretitenti Thomas S. Monson e taku: “Tamnei aika a kammaira e bon rang kakamaku ao e kareke. Kan nooran tamnei aika kammaira a kona n riki bwa anua aika kairoro, kairi nakon bwai riki aika bubuaka ao te wenenibure. Totokoi aekakin nako tamnei ni kammaira” (“Preparation Brings Blessings,” Ensign ke Riaona, Meei 2010, 65).“Kauring ae korakora … bon ribooti ni mwaitiia aomata ake a kabonganai Intanete ibukin bwaai aika bubuaka ao bukina aika buakaka, noorakin tamnei aika kammaira a riki bwa oin totoko ibukin bwai aikai. Tariu ao mwaneu, irekereke n aon aikai e bon uruana te tamnei. Kakorakorai ngkami. Kam na itiaki. Totokoi aekakin nako bwai ni kabwakabwa ao urubwai n aroia nako.—n tabo nako! I taekana te kauring aio Nakoia ni kabane, n tabo nako” (“Until We Meet Again,” Ensign ke Riaona, Meei 2009, 113).“Totokoi aekakin nako tamnei n tangako. E na kabua te tamnei ao e uruana te iango. Ti tuangaki n te Doctrine ao Covenants, ‘Bwa bwai aika aki itiaki tiaki ana bwai te Atua, ao bon te rotongitong’ [Doctrine ao Covenants 50:23]” (“Koaua nakon te Onimaki,” Ensign ke Riaona, Meei 2006, 18–19).

  18. Tara David A. Bednar, Act in Doctrine (2012), 53.

  19. Tara Dallin H. Oaks, “Nakoanibonga te Kariaiakaki inanon te Utu ao te Ekaretia,” Ensign ke Liahona, Nov. 2005, 24–27.

  20.  Oin au emeeri, Aokati 5, 2013; tara Iakobwa 5:14.

  21. Tara Ebera 5:4.

  22. Itaia 55:8.

  23. Iakobwa 4:13.

  24. Tara Doctrine ao Covenants 81:4–5. Beretitenti Gordon B. Hinckley e taku: “Nakoam e rang kakawaki n am tabo ni beku n aron nakoau n au tabo. Akea te wewete n te ekaretia aei ae uarereke ke karako mwiina” (“This Is the Work of the Master,” Ensign, Meei 1995, 71).

  25. M. Russell Ballard, “Korakora n te Kauntira,” Ensign,, Nobembwa 1993, 76.