Kam Butimwaeaki nakon te Maungatabu
Iroun Beretitenti Thomas S. Monson
Bon au tataro bwa ti na kaonaki ma Tamnein te Uea ngkai ti ongora ao n reiakinaki.
Ai tamaroara, tariu ao mwaneu aika tangiraki, ngkai ti a manga bane naba ni kaitiboaki. E raka iaon 183 te ririki ni moan tein te Ekaretia iroun te Burabeti Iotebwa Timiti, iaan ana kairiiri te Uea. N tain te kaitibo aei n Eberi 6, 1830, bon ti onoman kaain te Ekaretia ake a roko.
I kukurei ni katanoata bwa uoua te wiiki n nako, mwaitiia kaain te Ekaretia e a ti a n roko n te 15 te mirion. Te Ekaretia e reitinako n rangin korakora n rikirake ao ni biti maiuia aomata aika mwaiti ni katoa ririki. E butanako ni katobibia te aonaaba ngkai ara mitinare a ukoukoria naake a kakaea te koaua.
E raka iaon teuana te ririki ngkai imwiin katanoatakin kauarerekean te roro n te ririki ni mitinare. Man te tai anne mwaitia mitinare aika bwanin aia tai e raka man te mwaiti ae 58,500 inanon Okitobwa 2012 nakon 80,333 n te bong aei. Ai kamimira aron karekean ao irakin te kaeka are ti a tia ni kakoaua!
Akea inanon booki aika tabu te katanoata ae kakawaki riki, akea te mwakuri riki ae kabaeaki, akea te kaetieti ae kaineti riki nakon te kaetieti are e anga te Uea ae maiu ngke E kaoti i Kariraia nakoia reirei ake tengaun ma temanna. E taku, “Ma ngaia ae kam na nako, ni kakiritianiia botanaomata ni kabaneia, ni babetitoia nako nanon aran te Tama, ma te Nati ma te Tamnei are Raoiroi.”1 E taekinna te Burabeti Iotebwa Timiti, “Imwiin bwaai ake a taekinaki, te kabanea ni korakora ao ni kakawaki ni mwakuri bon tataekinan te Euangkerio.”2 Tabeman ma iroumi aika roko ikai n te bong aei a na uringa ana taeka Beretitenti David O. McKay, are e taekina naba aei “Ni kabane membwa bon mitinare!”3
I a reita au taetae ma aia taetae. Ngkai aio te tai ibukiia membwa ao mitinare n reitaki, ni kaai ni mwakuri, ni beku n ana nne ni kurebe te Uea ni kairiia aomata Nakoina. E a tia ni katauraoa te kawai ibukira n tibwa te euangkerio ni kawai aika mwaiti, ao E na buokiira n ara tai ni beku ngkana ti beku ma te onimaki ni kakoroa nanon Ana mwakuri.
Ni buoka kateimatoan rikiraken mwaitia mitinare, I a tia n tuangiia membwa n te tai ae nako bwa a na ibuobuoki, ngkana a kona, nakon buokaia aia mitinare n aia uoote n te mwane ke nakon te mwane ni Mitinare ni Kabuta n te Ekaretia. Te kaeka naba nakon aei e bon rangin ni butimwaeaki ao e a tia n ibuobuoki ibukin boutokaia nga ni mitinare ake aia kangaanga a aki kona ni buokiia i bon irouia. I kaitaui ngkami ibukin ami anganano ae mwaiti. Tangiran te ibuobuoki e bon reitinako, bwa ti aonga ni kona n reitinako ni buokiia ake iai nanoia ae korakora ni kan beku ma aki kona ni karaoia, i bon irouia, ngkai akea aia kataumwane ni karaoia.
Ngkai, tariu ao mwaneu, ti roko ikai bwa ti na reireinaki ao ni kairaki. Angiin taian rongorongo aika a na taekinaki man atun te euangkerio, ake a na taekinaki inanon uoua te bong. Mwaane ao aine ake a an anga aia taetae nakoimi a tia n ukera buokaia mai karawa ibukin te rongorongo are a na angani ngkami.
Bon au tataro bwa ti na kaonaki ma Tamnein te Uea ngkai ti ongora ao n reiakinaki. N aran ara tia Kamaiu, Iesu Kristo, amen.