Nakomai, Raoniira
Iroun Beretitenti Dieter F. Uchtdorf
Kauoman ni Kauntira n te Moan Beretitentii
N aki tabeakin am kaangaanga, rongorongom, ke korakoran am koaua, iai am tabo ikai inanon te Ekaretia aio.
N te tai teuana iai te mwane ae mii bwa e mena n te mwaneaba ae bubura ike a bootaki iai taian aro n te aonaaba. E ataia bwa a mwaiti aroia aro n tatabeua are a taraa n tangiraki ao ni kakawaki.
E kaitibo ma taanga aika tamaroa aika tei ibukin Ana Ekaretia Iesu Kristo Ibukiia Aika Itiaki Ni Boong Aika Kaitira ao e titirakiniia, “Tera ae kamkainnanoia mairouia kaain ami aro?”
“Akea te bwai ae ti kainnanoia,” a kaeka. “Ma te Uea e tuangira bwa ti na katabui ni kabane.”
A waaki nako taanga ni kabwarabwara aron mwakuri inanon te Ekaretia, te kakawari ao te reirei n te mweenga, karaoan te mwakuri ni mitinare ae bwanin, bootakin te utu ni katoa wiiki, mwakurin te tembora, te warebea, ao mwakuri ni ibuobuoki ibukin te botanaomata, ao mwakuri ao mwioko n reiakini taian kiraati.
“Kam kaboia ami aomata ibukin te mwakuri are a karaoia?” e titiraki te mwaane.
“O, tiaki,” a kabwarabwara taanga. “Anga aia tai n aki kaboaki kaain te aro.”
“Ao riki,” a reitia nako taanga, “ni katoa onoua namwakaina, kaain te aro, a kabanea aia wiikiente n ira ke ni matakuakina te maungatabu ni kabuta ae tebwina aoana.”
“Tebwina te aoa ae a taetae iai aomata?” e mimi iai te aomata.
“Ao e kanga ngkanne ami taromauri ni katoa wiiki? Maanra?”
“Tenua te aoa, ni katoa Tabati!”
“O, ai aki akora,” e taku te mwaane. “A karaoi kaain ami ekaretia bwaai ake a taekinaki?”
“Anne ao a mwaiti riki. Ti tuai n taekina taekan rongorongon te utu, aia kaembing kairake, taromauri, kamatebwai ni booki aika tabu, kataneiai n te aro ni kairiiri, aia waaki ni kakukurei kairake, tieminari n te moaningabong, kateimatoaan raoiroin kateitei n te Ekaretia, ao iai ana tua te Uea ibukin te marurung, te aki mamatam ni katoa namwakaina ni buokiia aika kainnano, ao te kabwianibwai.”
E taku te mwaane, “I a minotaki teutana. Bukin tera bwa a kani kaaina te ekaretia anne?”
A wingare te taanga ao a taku, “Ti taku bwa ana akea am titiraki.”
Bukin Tera Aomata A Kani Kaina te Ekaretia Anne?
N te tai are ngke a namakina kerikakin aia mwaiti ekaretia aika bati ni kabuta te aonaaba, Ana Ekaretia Kristo—e ngae ngkana e uarereke ni kabotauaki ma tabeua aika mwaiti—bon teuana te ekaretia ae rangi ni birimwaaka rikirakena n te aonaaba. N Tebetembwa 2013 ao e raka iaon 15 te mirion membwa ni kabuta te aonaaba.
A mwaiti bukin bwaai aikai, ma I kona n anga tabeua?
Ana Ekaretia te Tia Kamaiu
Te Moan, te Ekaretia aei e kaokaki inanon ara bong iroun Iesu Kristo n tii Ngaia. Ikai ko kona ni karekea te kariaia ni mwakuri n Arana— ni bwabetito ibukin kabwaraan bure, n anga te bwai n tituaraoi are te Tamnei are Raoiroi, ao ni kabaeaki iaon te aba ao i karawa.1
Aomata ake a kaaina te Ekaretia aei a karaoia ibukina bwa a tangira te Tia Kamaiu Iesu Kristo ao a tangiria ni kan Rimwina. A kukurei inanon atakina bwa te Atua E a manga taetae nakoia aomata. Ngke a karekei otenanti n te nakoanibonga ao ni berita ma te Atua, a kona n namakina Mwakana inanon maiuia.2 Ngkana a rin n te tembora ae tabu, a namakina ae a mena i Matana. Ngkana a wareki booki aika tabu3 ao ni maiuakin aia reirei Ana burabeti, a rikirake ni kaan nakon Te Tia Kamaiu are a rangin n tangiria.
Te Onimaki ae Maiu
Bukina teuana bwa te Ekaretia e karekei tain karaoan baika raraoi.
Kakoauan te Atua e bon rangi n tamaroa, ma mwaitia aomata a tangiria ni karaoa are a tangiria nakon te kakauongo nakon reirei ke “iangoan [aia] maeka i eta.4 A tangiria ni kan kamwakura aia onimak. A tangiria ni kan irakei bain aia kabaraaki ni katabeia n tataekina te euangkerio.
Anne te bae e na riki ngkana a raonira—ma angiia aomata e mwaiti aia tai ni biti aia tarena, nanoanga, tain karaoan mwakuri aika raraoi. Ibukina bwa ti aki kaboia mitinare inanon ara botaki n taromauri n te aonaaba ae kabuta, kaain ara aro a karaoi mwakurin te aro n ti ngaiia. A weteaki man ana kairi te Tamnei. N tabetai ti anganano; n tabetaiti “anga nano.” Ti tarai mwioko bwa tiaki karawawata ma taai ni kakoroi bukin berita ake ti kukurei ni karaoi ibukin te Atua ma Natina.
Kakabwaia aika Kakawaki
Bukina ae te kateniua bwa bukin tera aomata a kaaina te Ekaretia bukina bwa maiuakinan ana reirei Iesu e kaineti nakon kakabwaia aika kakawaki.
Ti taraa te bwabetito bwa te moan ni mwaneka ni kawaira nakon rikira bwa ana reirei Iesu. Nakonakora ma Iesu ni katoa bong e kairiira nakon te rau ao te mwakuri n te maiu aio ao ni karekea te kukurei ao te kamaiuaki are akea tokina n te aonaaba ae na roko.
Te koraki ake a rimwiin te kawai aei ma te kakaonimaki a totokoi kairua, rawawata ao te maiu ae katangi nano.
Akana a nanorinano ma te nano ae kokoaua a kunea ikai kaubwain te ataibwai ae korakora ikai.
Naake a rootaki ao n tang a kunea te kamaiuaki ikai.
Naake a karawawataaki n te bure a kabwaraaki aia bure, a kainaomataaki, ao ni motirawa.
Nakoia Naake A Nako.
Kakaaean te koaua e a tia ni kairiia mirion aomata nakon Ana Ekaretia Kristo, E ngae n anne, iai tabeman ake a kitana te Ekaretia are a tangiria ngkoa.
Temanna e na kona n titiraki, “Ngkana e raoiroi te euangkerio, bukin tera bwa e na kitanaki iroun temanna?”
N tabetai ti katautaua ibukina bwa a tia n kamwebuakaki ke n taningaroti ke n onrake n te bure. Te koaua raoi e bon aki bebete. Ni koauana, tiaki ti teuana bukina are kaitarai kangaanga aika kakaokoro.
Tabeman membwa aika tangiraki a kekeiaki inanon ririki ma te titiraki bwa a kona ni karaaureia ma te Ekaretia.
N te Ekaretia aei ao e korakora karinean inaomatan te aomata, are kaokaki iroun te ataeinimwaane are iai ana titiraki ae kakaea kaekakina, ti karineia aika a ukoukora raoi te koaua. E kona ni karika te un inanora ngkana e uotia nako aia mwakuri man te Ekaretia ao te koaua are ti kunea, ti karinei aia koaua n taromauria te Atua ae mwaaka ni kaineti nakon oin aia koaua, n aron ae ti tangiria naba ngaira.5
Titiraki aika tuai Kaekaaki
Tabeman a kekeiaki ma titiraki aika tuai ni kaekaaki ibukin bwaai aika tia ni karaoaki ke n taekinaki n taai aika nako. Ti itiaki ni kamatoa bwa inanon ae e kaniia 200 te ririki n rongorongon te Ekaretia— n raonaki ma kawain te namakin ae aki kona ni kamangaoaki, ae karineaki ao taai ake riki iai karikirakean te onimaki—iai bwaai tabeua aika a taekinaki ao ni karaoaki are e karika aia titiraki aomata.
N tabetai a kaoti titiraki bukina bwa akea iroura rongorongo ni kabane ao ti tangiraki bwa ti na taotaona nanora teutana. Ngkana e ataaki te koaua ni kabanea, bwaai ake aki kakoauaki ngkoa a na manga karauaki nanora iai.
N tabetai ao e na iai te kakaokoro ni iango bwa tera nanon “baika koaua.” Te titiraki are karika te nano uoua n aia iango tabeman e kona, imwiin te kakaae ae nano, e a karika te onimaki irouia tabeman.
Aia Kairua Aomata Aika Aki Kororaoi
Ao, n taekinan raoi ae koaua, e na iai taai tai are e na reke iai te kairua irouia taan kairiri n te Ekaretia. E na iai bwaai aika a tia n taekinaki ke ni karaoaki ake aki boraoi ma tamaroara, reirei, ke te tua.
I katautaua te Ekaretia bwa e na nakoraoi tii ngkana e kairaki iroun te aomata ae kororaoi. E kororaoi te Atua, ao Ana reirei a bon itiaki. Ma E mwakuri rinanora— Natina aika aki kororaoi—ao aomata aika aki kororaoi a karaoi kairua.
Inanon atun te iteraniba n Ana Boki Moomon ti warekia, “Ao ngkai, ngkana arona bwa iai kairua bon aia kairua aomata; ma ngaia ae kam na aki kabuakakai Ana bwai te Atua, bwa e aonga n ae akea barekami ae e na kuneaki i matan ana kaintekateka ni motikitaeka Kristo.”6
Bon aio te kawai are e a kaman tia ao ni karokoa te bong are kororaoi ngkana Ngaia Kristo E uea iaon te aba.
Te kananokawaki bwa tabeman a bwaka ibukin kairua ake a karaoaki irouia aomata. Ma ibukin kairua aikai, koauan Ana Euangkerio Iesu Kristo ae kaokaki e aki kairua, e aki uarereke, ke ni kamaunaaki.
Ngkai ngai Ana abotoro te Uea ae Iesu Kristo ao ngkai temanna are e a tia n noori kauntira ao mwakurin te Ekaretia aio, I kaota au kakoaua bwa akea te babaire ae tamaroa are na roota te Ekaretia aei ke akea kaaina ae aki ukoukora te kairi mai ieta, te kaetieti, ao ana kariaia te Tama are i Karawa. Aio bon Ana Ekaretia Iesu Kristo. E bon aki kona te Atua ni kariaia Ana mwakuri bwa e na kabuakakaki ke n aki kakoroa nanon kawaina ae mairoun te Atua.
Iai te Tabo Ibukimi
Nakoia naake a kararoaia ma te Ekaretia, I kona ni kangai bwa bon iai naba ngkai te tabo ibukim ikai.
Nakomai ao reita ami tarena, bwaintangira, ao korakorami ma ngaira. Ti na bon nakoraoi riki n tokina.
A na bae n titiraki tabeman ni kangai, “Ma e kanga nanououau?”
Te bwai ae riai bwa ti na titiraki—e a tia boton raoi te bubuti n rikirake ao n tau nakon kain te ataibwai ae moan te korakora. Iai tabeman membwa n te Ekaretia ake, n te tai aei ke te tai teuana, a aki kaitarai titiraki aika rawawata ke n nanowanawana. Ana mwakuri te Ekaretia teuana bwa karikirakean ao unikan atin te onimaki—n taai tabetai inanon taai n nanououa ao n aki koaua. Te onimaki bon kantaningan baika aki nooraki, aika a koaua.7
Ngaia ae, tariu ao mwaneu—raoraou aika tangiraki—taiaoka, tiku moa iaon ami nanououa imwain ae ko aki kakoaua am onimaki.8 Ti riai n aki kariaia te nanoua be na tauira ao ni kararoaira man te tangira ae mimitong, te rau ao te bwaintituaraoi ae kakawaki are roko n te onimaki inanon te Uea Iesu Kristo.
Tabeman ana kangai, “I aki tau ni mena ma ngkami kaain te Ekaretia.”
Ngkana kam kona n noori inanora, kam na bae ni kunea bwa ko tau n rin nakon are ko kantaningaia. Ko na bon mimi ni kunea bwa ti a tia n nanoanga ao ni korakai ao ni kantaningai bwaai aika ti tebo ma ae iroumi. Aroaromi ke kaikawakimi e taraa ni kaokoro n aron ae kam noria irouia membwa, ma e kona n riki bwa te kakabwaia. Tariu ao Maneu, raoraou aika tangiraki, ti kainnanoa ami tarena aika raka aroia ao raoiroimi. Kakaokoroia ni katobibia te aonaaba bon korakoran te Ekaretia aio.
Tabeman ana kangai, “I taku bwa I aki kona ni maiuakina ami katei.”
Ana mwaiti riki bukina aika a na roko! E kateaki te Ekaretia bwa e na kamaiuia aika aki kororaoi, aika kekeiaki, ao aika mamaara. E kaonaki irouia aomata aika a tangiria ma nanoia ni kabane ni kawakin taian tua, e ngae ngkana a tuai ni matenikuna irouia.
Tabeman ana kangai, “I kina kaain am Ekaretia ae te tia mwamwana te aba. I aki kona ni kaina te ekaretia ma kaina ae aekan te aomata anne.”
Ngkana ko kabwaranakoate tia mwamwana te aba bwa te aomata ae aki maiuakina te maiu ae raoiroi n aron ae teuanne ke neienne e onimakinna, ngkanne ngaira ni kabane bon taan mwamwana te aba. Akea ae aekakin maiun Kristo n aron ae ti ataia bwa ti na bon riai. Ma ti a kaman tangiria n tokanikai iaon ara kairua ao te nano ni kani bure. Ma nanora ao tamneira ti kekeiaki ni kororaoi riki ma ana ibuobuoki ana Mwakuri ni Kamaiu Iesu Ma ti a kaman tangiria n tokanikai iaon ara kairua ao te nano ni kani bure..
Ngkana aikai kanoan ami iango, ao ngkanne n aki tabeakin am kaangaanga, rongorongom, ke korakoran am koaua, iai am tabo kai inanon te Ekaretia aio. Nakomai, raonira!
Nakomai, Raoniira!
N aki ongeai kabwakara n aomata, I onimaki bwa kam na kunea ibuakoia membwa n te Ekaretia aio aomata aika a rangi n raraoi are kona n reke iroumi. Ana Ekaretia Iesu Kristo e taraa n ae karekea te akoi ao te tararua, te kokoaua ao te mwamwakuri.
Ngkana ko kantaningaia bwa ko na kunea te aomata ae kororaoi ikai, ko na bon aki kukurei. Ma ngkana ko ukoukora Ana reirei Kristo ae itiaki, ae ana taeka te Atua “are kamaoa te aomata ae e ikoaki,”9 ao ana kairiri ae itiaki te Tamnei ae Raoiroi, ao ngkanne ko kunei ikai. N te roro ae mamara iai te onimaki —inanon te roro aei ngke a namakinna aika mwaiti bwa a kararoaki man kakabwaian karaw— ikai are ko na kuneia aomata aika a nanoanga n ataa ao ni mwananga ni kaniia nakon te Tia Kamaiu man bekuia ibukin te Atua ao aomata, n aiaromi!
Ko Na Nako Naba Ngkoe?
I kauringaki te tai n Ana tai ni maiu te Tia Kamaiu ngke a mwaiti aika Kitanna.10 E titirakiniia Ana Reirei Iesu ake tengaun ma uoman:
“Kam na nako naba?
“Ao e kaeka Timon Betero, Te Uea ti na nakon antai? E mena i Roum taekan te maiu are aki toki.”11
E na iai taai ae ti na kaeka te titiraki ae titebo. Ko na nako naba ngkoe? Ke Ngaira aekakin Betero, ti taua ni kamatoa taekan te maiu are akea tokina?
Ngkana ko ukoukora te koaua, nanona, ao te kawai ni bita te onimaki nakon te mwakuri; ngkana ko kakaea te tabo ae ko na kainna: Nakomai raonira!
Ngkana ko a tia ni kitana te Onimaki are ko a tia ngkoa ni mena iai: Nakomai riki. Raoniira!
Ngkana e anaaki nanom bwa e na bwara nanom: Tiiku riki kamaaniko. Iai te tabo ikai ibukim.
I bubuti nakoia aika ongo ke a wareki taeka aikai: Nakomai, raoniira. Nakomai kakauongo Ana wewete Kristo ae rau. Ke e tabeka ana Kaibangaki ao ke e Irirai.12
Nakomai, raoniira! Ibukina bwa ko na kunea te bwai ae kakawaki ikai nakon boona ae raka riki.
I kakoaua bwa ikai kam na kunea taekan te maiu are akea tokina, te kawai nakon te rau, te kamaiuaki are beritaaki ao te kukurei.
I tataro ma te koaua bwa ami ukeuke ibukin te koaua e na roko inanomi te nano ni kan roko ao n raonira. N aran Iesu Kristo ae tabu, amen.