Taraa Mooa ao Kakoauaa
Iroun Unimwaane Edward Dube
Man te Itingaun
N ana taratara te Uea, e aki rangi ni bati iaon tera are ti a tia ni karaoia ke te tabo ra ae ti a tia ni mena iai ma ae bati riki iaon ae e nga are ti a tauraoi n nako iai.
Ngke te ataeinimwaane ngai, ngke I tabe ni mwakuri ma tinau inanon te tawaana, e anganai teuana te reirei ae rangi ni boongana ni maiu. E a bon kaan tawanou n te ingabong, taai e a mena i karawa ao ti a tia ni keniken ibukin te bwai are I taku bwa n te tai ae rangi ni maan. I tei n taraa mwiin te mwakuri are ti a tia ni karaoia ao I taku nakon tinau, “Ko nora te bwai ae ti a tia ni karaoia!” Tinau e aki kaeka. Au iango tao e aki ongo au taeka, I a manga kaoka naba are I a tia n taekinna ao ni kabaibati riki. E teimatoa n aki kaeka. Akea bwa I a karieta bwanaau teutana riki, I a manga kaokia riki. N tokina, e rairaki nakoiu ao n taku, “Edward, tai tan rikaaki. Taraa mooa bwa tera te bwai are ti na kona ni karaoia.”
Tariu ao mwaaneu aika tangiraki, te berita are ti karaoia ma te Uea ngke ti bwabetitoaki, “n riki bwa taan kakoaua ibukin te Atua n taainako ao ni bwaai nako, n taabo nako ake [kam] nako iai” (Motiaea 18:9), bon te kabaeaki ae maanin te maiu. Beretitenti Dieter F. Uchtdorf e reirei, “Te koraki ake a tia n rinnako n ranin te bwabetito ao ni karekea ana bwaintituaraoi te Tamnei ae Raoiroi a tia ni katei rangaia ni kawain te nakoanreirei ao a tuangaki bwa a na teimatoa n iriria ao ni kakaonimaki inanon mwanekan ara Tia Kamaiu” (“Saints for All Seasons,” Ensign ke Liahona, Tebetembwa. 2013, 5). Te Uea rinanon Ana toro e weteira bwa ti ni beku n nakoa aika kakaokoro, ake ti butimwaai ma te kabaeaki ae bwanin. Ngkana te kamotirawaaki e a tia ni kabwabwakaki riki ao te wewete n te mwakuri ae kaokoro are ko a tia n anganaki, ti kimwareirei ni butimwaaia, n ataakina, n aron are a ataia ara bakatibu, bwa “inanon ana mwakuri te Uea, e aki kakawaki bwa te tabo ra are ko mwakuri iai ma e kakawaki bwa tera ae ko a tia ni karaoia” (J. Reuben Clark Jr., inanon Ribooti n te Maungatabu, Eberi. 1951, 154).
Ngaia are ngkana te beretitenti n te titeiki ke te bitiobi ake a kamotirawaaki, e kukurei ni butimwaea kamotirawaana, ao e a manga kabwabwakaki riki ni mwakuri n te kawai raa te Uea, rinanon Ana toro, “e tangiria” (Motiaea 3:19), e aki rootaki man ana mwakuri korakora, ke n tan rikaaki n iangoia bwa e a tia ni karaoa ae tau. E bon aki kua ni karaoan ae raoiroi, ibukina bwa e ataia bwa e bon “kawenea aan te mwakuri ae korakora ma te nooraba ae mataata bwa aekaki ni kekeiaki aikai a kakabwaia maiura n akea tokina. Ngaia are “man bwaai aika uarereke a rimoan bwaai aika korakora” (tara D&C 64:33).
Ti riai ni kabane n “ingainga ni karaoi mwakuri aika raoiroi aaia, ao ni karaoi aika bati n oin [ara] ara kantaninga, ao ni kakoroa bukin te raoiroi ae bati” (tara D&C 58:27).
Unimwaane Jeffrey R. Holland man te Kooram n Abotoro are Tengaun ma Uoman e reirei: “Taai aika nako e reiakiniira bwa ti na aki maiu inanona. Ti tanrikaaki n anaa are te kabanea n tamaroa man are a raoiroi ma tiaki ni manga maiuna te taneiai ake a toki. Ao ngkana ti a tia n reirei ake ti kainnanoi n reireiaki ao ni uotia ma ngaira te kabanea n tamaroa n are ti a tia rinanona, ngkana ti taraa mooa ao n uringnga bwa te onimaki e aki toki ni kotea taai aika a na roko” (“The Best Is Yet to Be,” Ensign, Tianuare. 2010, 24; ke Liahona, Tianuare. 2010, 18).
Ngkai ana reirei tinau are taraan mooa e bon kaineti ma tarakia uteute aika a kona n nooraki n te tawaana, te kakaewenako anne e aki rangin ni kakawaki ni kabotauaki ma ake a tia n rinanona aomata Aika Itiaki. Unimwaane Joseph B. Wirthlin described this experience so well: “In 1846, more than 10,000 [people] left the thriving city [of Nauvoo] that had been built on the banks of the Mississippi River. Ma te onimaki irouia taan kairiiri aika burabeti, kaain te Ekaretia ake ngkoa a kitana aia ‘Kaawa ae Tikiraoi’ ao n nako n rereuan tian America are i maeao. A aki raoi ataia bwa a na nakea, iraua raoi te maire are a na toua, e na maanra te mwananga, ke tera ae na riki irouia n taai aika a na roko. Ma a bon ataia bwa a kairaki iroun te Uea ao Ana toro” (“Faith of Our Fathers,” Ensign, Meei 1996, 33).
A ataia bwa ana kanga n taraa mooa ao ni kakoaua. Te bwiina ao te iterana te ririki mai imwaaina, tabeman membwa aikai a mena ikekei ngke te kaotioti e karekeaki:
“Bwa e koaua are I tuangkami, e a kabwaia are e kawakin au tua, e ngae ngke tao n te maiu ke n te mate; ao are e kakaonimaki inanon te karawawataaki, te kaniwanga ibukin aei e korakora riki n abanuean karawa.
“Ko aki kona n noria ni matam akanne, ibukin te tai aio, ana mwakuri Atuam ni kaineti ma bwaai akanne ake a na roko imwiina, ao te mimitong ake a na rimwiina imwiin te karawawataaki ae bati” (tara D&C 58:2–3).
Ngaira naba ti kona n taraa mooa ao ni kakoaua. Ti kona ni butimwaea ana kakao ara Uea, are e katangaina-baina ni kaoira:
“Bane mai nako Iu, ngkami akana kam kua ao kam rawawata, ao N na motiki rawami.
“Amoa amou i aomi, ao reirei i Rou; bwa I nimamanei ao I nanorinano: ao e na reke iroumi iai motikan rawaia tamneimi.
“Bwa e aoraoi amou, ao e bebete uotau” (Mataio 11:28–30).
Ara burabeti ae tangiraki, Beretitenti Thomas S. Monson; ana kauntira; ao te Kooram n Abotoro n te Tengaun ma Uoman a tia ni kanakoi aia kakao ibukira bwa ana iri mwakuri ni kamaiu. Ake a tibwa rairaki, roronrikirake, kairake n ikawai, aomata ake a tia n ritaea man aia mwakuri, ao mitinare aika bwanin aia tai a kainnanoia n amoa ae titebo n te mwakuri ni kamaiu.
Beretitenti Boyd K. Packer, n te Kooram n Abotoro n te Tengaun ma Uoman e ira n te taina te kabo n te atitiki n te man ae te ox, ike e a reke iai reireiana. E taekina te taneiai: “Te bwai ni katikitiki ae te kai e katinebuaki ma taian buraoki n timanti: te bwina tengaa te bwauna [4,535 kg]— nimaua te tan. … Te kantaninga bwa te man ae te ox e na kamwainga te bwai ni uabwai n te tino ae te kai teniua te buti [91 cm]. … I noori uoman oxen aika a rangi ni bubura aika titebo karaia, aika turu, ni buruu-kurei … [te] oxen ae buru man taai aika nako.”
N taekinan taekan mwiin te kabo, e taku: “Tiim aikai a botukuaki teuana imwiin teuana. … Te oxen ae bubura ni buru e aki reke naba n nena! Te bea ae e aki katika te nano, e aki rangi ni bootau ibukin tiaitiia, a kamwainga te bwai ni katikitiki ni kabane teniua te tai.”
E anganaki ngkanne te kabwarabwara ma mwiina ae kakubanako: “Maan ake a buruu a bubura riki ao ni korakora riki aron tamaroa riki kabotauaia ibukin te bubura nakon tiim ake tabeua. Ma oxen ake a uarereke iai irouia te mwakuri n tiim ao rabwataia aika tamaroa riki. A uaia n orea te amo. Maan aika uoman a mwaing n nako moa n te tai ae titebo ao te korakora e kamwainga te rawawata” (“Equally Yoked Together,” te taetae are e taekinaki nakoia taan tei man te aono’ tiemina, Eberi’. 3, 1975; nanon Teaching Seminary: Preservice Readings [2004], 30).
Ngkai ti taraa mooa ao ni kakoaua, ti kainnanoa te tiim ni mwakuri aei ni kawaekoa te mwakuri ni kamaiu ngkai ti kaoia tabeman bwa a na nakon Kristo. Inanon ara konabwai n tatabemaniira, ti kainnanoia n ira ana reirei Beretitenti F. Uchtdorf ni “bootaki n tei ni katenai ngkami ao tabekia ike ti tei iai” (“Lift Where You Stand,” Ensign ke Liahona, Nobembwa. 2008, 56). Ti kona ni kunea ara konabwai ae bwanin, n aron are e na nooraki iroun Unimwaane L. Tom Perry man te Kooram n te Tengaun ma Uoman: “Ngke I mwamwananga ni kabuta te Ekaretia I mimi ni bwaai ni kabane aika raraoi aika a riki. E ngae n anne I tuai n namakina are ngaira, n aroia aomata, a maiuakina nakon ara konabwai ae koaua. Au namakin bon anne bwa ti aki n taainako ti mwakuri ni bootaki, bwa ti teimatoa n rangi n nano ni karekean te karineaki ao te tokanikai i bon iroura, ao ni kaota te nano ae uarereke n te kouru ae kabuta ni katean abanuean te Atua” (“United in Building the Kingdom of God,” Ensign, Meei 1987, 35).
Ti bia katiteuanaaki ni kabane n te boto n iango ae tabangaki “ni kakoroa bukin te aki mamate ao maiun te aomata ae akea tokina” (Moses 1:39).
Ara Tia Kamaiu, Iesu Kristo, are e nora mooa nakon tokina, e ata raoi te kawai are E na toua nako Ketetemwane ao Korokota ngke E katanoata, “Akea ane e katoka baina iaon te barau n tauua, n tanrikaaki, ae tau ibukin Uean te Atua” (Ruka 9:62). N ana taratara te Uea, e aki rangi ni bati iaon tera are ti a tia ni karaoia ke ike ti a tia ni mena iai ma ae bati riki iaon ae e nga are ti a tauraoi n nako iai.
Ara koaua ae e na kairiira ao n reireinaki iroun ara Burabeti Iotebwa Timiti: “Te koaua ae aan ara aro bon aia kakoaua Abotoro ao Burabeti, ni kaineti ma Iesu Kristo, bwa E mate, e taunaki, ao ni manga uti n te katenibong, ao ni waerake nako karawa; ao ni kabane bwaai ake tabeua are a irekereke nakon ara aaro are bon tii bwaai aika uarereke nako iai” (Teachings of Presidents of the Church: Joseph Smith [2007], 49).
I kakoaua bwa ngkana ti irira ana katooto ara Tia Kamaiu, Iesu Kristo, ao ni katei baira n te katikuea ma te mwakuri ni kamatoa ara burabeti ae tangiraki, Beretitenti Thomas S. Monson, ti na kunea te rau, karaunano, ao te kimwareirei, ao ti na kana raoiroin te aba … “inanon kabanean boong aikai” (D&C 64:34). N aran Iesu Kristo, amen.