Tru long Ae blong God
I Kam long Elda Del G. Renlan
Blong Kworom blong Olgeta Twelef Aposol
Blong helpem narawan long fasin we i wok gud, yumi mas luk olgeta tru long ae blong papa mo mama, tru long ae blong Papa long Heven.
Ol dia brata mo sista blong mi. Tangkyu blong sastenem mi yestedei olsem wan memba blong Kworom blong Olgeta Twelef Aposol. Hem i had blong talemaot hamas hemia i minim long mi. Mi talem tangkyu from sastening vot blong tufala bigfala woman long laef blong mi: waef blong mi, Rut, mo dia, dia, dia gel blong mi, Asli.
Koling ia i givim bigfala pruf se toktok we Lod i talem eli long dispensesen ia i tru tumas: “Blong olgeta we oli no strong mo oli simpol bae oli talemaot ful gospel blong mi kasem evri en blong wol, mo long fored blong ol king mo ol man blong rul.”1 Mi mi wan long olgeta ia we mi no strong mo mi simpol. Ten yia i pas, taem oli bin singaotem mi wan bisop long wan wod long Is Yunaeted Stet, brata blong mi, we i bigwan long mi mo i waes moa long mi, i ringim mi. Hem i se: “Yu mas save se Lod i no singaotem yu from wan samting we yu bin mekem. Long kes blong yu, ating hem i no from samting we yu bin mekem. Lod i bin singaotem yu from wanem we Hem i nidim blong mekem tru long yu, mo hemia bae i hapen nomo sapos yu mekem long wei blong Hem.” Mi luksave se waes toktok ia we i kam long bigfala brata i tru moa tedei.
I gat bigfala samting i hapen long seves blong misinari taem hem i luksave se koling, i no abaot hem; be, hem i abaot Lod, wok blong Hem, mo ol pikinini blong Papa long Heven. Mi filim se hemia i tru tu long wan Aposol. Koling ia i no abaot mi. Hem i abaot Lod, wok blong Hem, mo ol pikinini blong Papa long Heven. I nomata wanem wok o koling insaed long Jos, blong save mekem wok, wan i mas save se evriwan we yumi givim seves long olgeta i wan “spirit boe o gel blong papa mo mama blong yumi long heven, mo from hemia, i gat wan tabu fasin mo fiuja.”2
Long wok blong mi bifo, mi dokta blong hat we i lukluk long taem hat i stop mo blong putum niu hat wetem plante man we oli bin sik bigwan. Waef blong mi i tok fani i talem se i no wan gud saen blong kam wan sikman blong mi. Mi tok fani nomo, be mi bin luk plante pipol i ded mo mi developem wan kaen filing ia blong stap longwe taem samting i no go gud. Long wei ia, mi save kontrolem ol filing blong harem nogud mo slakem tingting.
Long 1986, wan yang man, Jad, i kasem problem long hat mo i kasem wan niu hat. Hem i stap gud blong ten yia haf olsem. Jad i mekem evri samting blong stap helti mo laef wan gud laef. Hem i go long wan misin, i wok, mo i lisingud long papa mo mama blong hem. Long ol las yia blong laef blong hem, i had smol, mo hem i go kam long hospital oltaem.
Wan naet, oli tekem hem long imejensi rum long hospital from hat blong hem i stop. Ol fren blong mi mo mi i wok blong longtaem blong blad blong hem i ron bakegen. Long en, i kam klia se Jad bae i no save kambak. Mifala i stop blong wok mo mi talem se hem i ded. Nomata i no gud mo mi harem nogud, mi holemtaet fasin blong wan dokta mo mi tingting long miwan: “Jad i bin gat wan gud laef. Hem i laef longwan moa bitim we hem i sapos blong gat.” Mi nomo gat kontrol taem papa mo mama blong hem i kam long imejensi rum mo luk boe blong tufala we i ded i slip long bed. Long tetaem ia, mi luk Jad tru long ae blong mama mo papa blong hem. Mi luk ol bigfala hop mo samting we tufala i wantem blong hem, we tufala i wantem se bae i laef smol taem moa, mo gud moa. Taem mi luksave hemia, mi stat blong krae. Samting we i hapen, i go nara wei, mo long wan fasin we i kaen we bae mi neva fogetem, papa mo mama blong Jad, tufala i leftemap tingting blong mi.
Naoia, mi luksave se insaed long Jos, blong helpem narawan long fasin we i wok gud, yumi mas luk olgeta tru long ae blong papa mo mama, tru long ae blong Papa long Heven. Long tetaem ia nomo bae yumi stat blong andastanem tru praes blong wan sol. Long tetaem ia nomo bae yumi save filim lav we Papa long Heven i gat long evriwan long ol pikinini blong Hem. Long tetaem ia nomo bae yumi filim kea mo wari se Sevya i gat long olgeta. Yumi no save mekem fulwan kavenan wok blong yumi blong krae wetem olgeta we oli krae, blong leftemap tingting blong olgeta we oli nidim sapos yumi no luk olgeta tru long ae blong God.3 Longfala lukluk ia bae i openem hat blong yumi long slak tingting, fraet mo hat i brok blong ol narawan. Be Papa long Heven bae i givhan mo leftemap tingting blong yumi, semmak olsem papa mo mama blong Jad i mekem long mi plante yia i pas. Yumi nid blong gat ae we i save luk, mo sora we i save harem, mo hat we i save mo filim sapos yumi stap blong sevem man oltaem olsem Presiden Tomas S. Monson i stap askem yumi blong mekem.4
Taem nomo bae yumi luk tru long ae blong Papa long Heven, bae yumi fulap long klin lav blong Kraes.”5 Evri dei yumi mas plis long God blong gat lav ia. Momon i wonem: “From samting ia, ol brata blong mi we mi lavem tumas, prea long Papa wetem evri paoa blong hat, blong yufala i save fulap wetem lav ia, we hem i bin givim long olgeta we oli ol tru man blong folem Pikinini blong hem, Jisas Kraes.”6
Wetem ful hat blong mi, mi wantem stap wan tru man we i folem Jisas Kraes.7 Mi lavem Hem. Mi laekem Hem tumas. Mi witnes se i tru se Hem i laef. Mi witnes se Hem nao, God i Jusum Hem, i Mesaea. Mi witnes long saed blong bigfala sore, lav mo sore, mo bigfala lav blong Hem. Mi ademap testemoni blong mi long hemia blong ol Aposol we, long yia 2000 oli bin talem se Jisas i Kraes we i stap laef, Pikinini blong God ia we i no save ded. …Hem i laet, laef mo hop blong wol ia.”8
Mi testifae se, long dei ia long 1820 long wan bus long Niu Yok, Lod we i girap bakegen i bin kamaot wetem God, Papa blong yumi long Heven, long Profet Josef Smit, stret olsem we Josef Smit i bin talem. Tufala i bin kamkamaot. Ol ki blong prishud oli stap long wol tedei we oli mekem se i posibol blong gat ol odinens blong sevem man mo kam olsem wan god. Mi save hemia. Long nem blong Jisas Kraes, amen.