Klin Inaf blong Kasem Ol Blesing blong Promes
I Kam long Linda S. Rivs
Seken Kaonsela long Rilif Sosaeti Jeneral Presidensi
Be, wan visen blong bigfala blesing blong promes blong Papa i mas stap olsem fas lukluk long fored blong ae blong yumi evri dei.
?Yufala i laekem ol sista ia long vidio? Mifala i save se plante long yufala we i no bin gat janis blong gat ol pikinini blong yufalawan, i bin spendem taem long laef blong yufala blong givim lav, tijim, mo blesem ol pikinini. Mo, !o, Papa blong yumi long heven mo mifala i lavem yufala from hemia, ol sista!
?Yumi evriwan, wetem yufala ol dia yang sista long Praemeri mo Yang woman, yumi bin gat janis blong holem wan bebi we i jes bon long han blong yumi mo mekem hem i lukluk stret long ae blong yumi? ?Yumi bin filimsave tabu filing we i raonem selestial spirit ia, we Papa blong yumi long Heven i jes sendem i kam long smol niufala bodi we i nogat doti? Mi no stap gat plante janis olsem ia blong eksperiensem ol filing we oli swit, sopsop, mo oli fulap long spirit.
Bodi blong yumi i tabu presen we i kam long Papa long Heven. Oli ol tempol we oli blong yumiwan. Taem yumi stap kipim i klin mo klin gud evriwan, yumi save stap klin inaf blong helpem Papa blong yumi long Heven blong krietem ol bodi blong ol spirit pikinini blong Hem we Hem i lavem tumas.
Presiden Boed K. Peka i talem long las jeneral konfrens toktok blong hem, we bae yu tingbaot olsem, “wan kuki mo wan kis,” se hem i testifae se “komanmen blong kam plante mo fulumap wol ia…hem i wan nid…mo i stamba blong mekem man i stap glad. Tru long stret mo gud fasin blong yusum paoa ia blong krietem laef, yumi save kam kolosap long Papa we i stap long Heven mo filim wan ful glad, we i olsem hemia blong wan god. Paoa mekem pikinini i no wan mistek pat blong plan; hem i plan ia nao.”
Hem i gohed blong talem se:
“Lav we i tru i nidim blong man i wet kasem taem we hem i mared, blong save serem kaen lav ia we i blong openem doa blong ol tabu paoa ia … yumi mekem olsem taem yumi stap longwe long situesen we filing blong bodi i tekem kontrol …
“… Blong yumi stap glad long laef long wol ia, glad blong yumi mo fasin blong kam olsem wan god i dipen long olsem wanem yumi save fesem ol strong filing blong bodi ia we oli kam mo pusum tingting blong yumi.”1
Ol dia sista blong mi we mi lavem, ol yangfala mo olgeta we i no yang tumas, mi filim wan bigfala wari taem mi stap rere long toktok ia. Olsem Yangfala Alma i talem, “Dip insaed long hat blong mi … mi wantem yufala … i prea long tabu nem blong hem, mo lukaot mo prea oltaem, blong oli no save temtem yufala bitim mak ia we yufala i save fesem, … blong oli save leftemap yufala long las dei.”2
Afta, Momon i testifae tu se long taem blong Alma, Koriho, man we i agensem Kraes “i bin prij long olgeta mo, lidim hat blong plante ….woman i go longwe.”3
Ol sista. Setan i bin leftemap wan flag we i olsem Koriho tedei, mo i gat plante sakses. ?Wanem nao sam long ol tul blong hem? Ol lav stori buk, ol lav stori long TV, ol mared woman mo ol olfala boefren we oli stap toktok long sosol media, mo ponografi. !Yumi mas lukaot gud, ol dia sista blong mi! Yumi no save pleplei wetem ol spia blong devel we i gat faea long hem mo no save bon. Mi no save wan samting moa we i save mekem yumi fit blong gat Tabu Spirit i stap olsem fren blong yumi oltaem, be klin fasin nomo.
Plante long wol tedei oli stap lukaotem samting we bae i mekem olgeta i glad kwik mo kasem kwik save long intanet. Be long narasaed, bae yumi gat blesing sapos yumi praktisim fet mo fasin blong wet longtaem, mo go long Papa long Heven, we Hem i stamba blong evri trutok, mo talem ol wari blong yumi long Hem. I save gat plante ansa mo save we oli save kamtru long fasin blong luklukgud mo stadi ol skripja, wetem tru strong prea, be i no gat promes olsem long Intanet. Profet Jekob i testifae se: “From Spirit i talem trutok mo i no giaman. From samting ia, Hem i talemaot ol samting we oli stap finis, mo ol samting olsem we bae oli kam.”4
Taem yumi stap lukluk, ridim, o eksperiensem eni narafala samting we i stap andanit long ol standet blong Papa blong yumi long Heven, bae i mekem yumi nomo strong. Nomata yumi gat hamas yia, sapos wanem we yumi stap luk, ridim, lisin long hem, o jusum blong mekem i no stret long standet insaed long Blong Ol Yut i Kam Strong, nao yu ofem, yu yu brebrekem, yu sakem i go, mo yu sarem doa.
I no gat wan long yumi i stret evriwan, be taem yumi mekem sin, President Peka i talem bakegen long yumi se:
“Promes hem i hemia: ‘Luk, man we i bin sakem ol sin blong hem, mi fogivim hem, mo mi, Lod, mi nomo tingbaot ol sin ia bakegen’ (luk long D&C 58:42). …
“… Atonmen ia i save pembak wanwan long yumi, i no lego wan mak i stap. Hemia i minim se, nomata wanem yumi bin mekem, o weaples yumi bin go, o olsem wanem nao samting i bin hapen, sapos yumi sakem sin wetem tru tingting, Hem i promes se bae Hem i pem praes. Mo taem Hem i pem praes, Hem i stretem samting ia. I gat sam long yumi we i stap haed olbaot … wetem filing se oli rong, mo no save olsem wanem blong kamaot. Yu kamaot taem yu akseptem Atonmen blong Kraes, mo evri samting we i mekem hat i soa bae i tanem i kam naes, i gat lav, mo i blong taem we i no save finis.”5
Wetem fasin blong sakem sin, ?wanem help o tul nao we yumi bin kasem blong helpem yumi stap klin mo gat klin fasin? Ol praemeri mo ol yang woman evriwan i save mo singim singsing ia “Skripja Paoa.”6?Bae yumi save pulum i go long “Prea Paoa,” “Tempol Paoa,” “Kavenan Paoa,” “Sabat Dei Paoa,” “Profet Paoa,” mo “Klin Fasin Paoa”?
I gat ol bigfala blesing mo proteksen long promes we i kam wetem fasin blong werem gud ol tempol gamen. Mi kam blong filim se mi stap putum ol klos we i ripresentem klos blong king mo kwin we Papa blong mi long Heven i bin givim. Mi testifae, ol sista, se taem yumi traehad blong werem ol gamen ia long stret fasin, Papa blong yumi i luksave hemia olsem wan bigfala saen blong lav mo komitmen blong yumi long hem. Hem i wan saen blong ol kavenan we yumi bin mekem wetem hem, mo Hem i bin promes: “Mi, Lod, mi mas mekem folem promes blong mi taem yufala i mekem wanem mi talem; be taem yufala i no mekem wanem we mi talem, yufala i no gat promes.”7
I no longtaem i pas, mi bin toktok wetem wan fren blong mi blong longtaem we i bin go tru long tu divos from se ol hasban blong hem oli no save lego ol nogud fasin mo gat ol nara woman. Hem wetem ol trifala pikinini blong hem oli bin gotru long hadtaem. Hem i plis long mi se: “Mi bin traehad blong laef long wan stret mo gud fasin. ?From wanem nao mi stap fesem plante hadtaem? ?Wanem nao mi bin mekem we i rong? ?Papa long Heven i wantem mi blong mekem wanem? Mi stap prea mo ridim skripja blong mi, mi helpem ol pikinini blong mi, mo mi go long tempol plante taem.”
Taem mi stap lisin long sista ia, mi filim se bae mi singaot bigwan nomo se: “!Be yu stap mekem ia! !Yu stap mekem wanem we Papa long Heven i wantem mo hop se bae yu mekem!”
Hemi klia, se plante oli talem se ol blesing blong promes blong Papa “oli stap longwe tumas,” speseli taem laef blong yumi i fulap wetem ol jalenj. Be Alma i bin tijim pikinini boe blong hem se “taem naoia hemi taem … blong rere blong mitim God.”8 I no taem blong kasem evriwan long ol blesing blong yumi. Presiden Peka i eksplenem se ‘“mo olgeta i gat wan gudfala laef go kasem en’ i neva stap long seken pat blong plei. Laen toktok ia i blong nambatri pat blong plei taem we i nomo gat sikret mo evri samting i stap long stret ples.”9 Be, wan visen blong bigfala blesing blong promes blong Papa i mas stap olsem fas lukluk long fored blong ae blong yumi evri dei—mo yumi mas save “abaot plante sore mo lav we hem i gat”10 we yumi stap gotru olgeta evri dei.
Ol sista. Mi no save from wanem yumi gat plante tes we yumi gat, be hem i filing blong mi se praes i bigwan tumas, i no save finis, i no gat en, i gat plante glad mo i bigwan bitim wanem yumi andastanem, mekem se long dei blong givim praes, bae yu filim blong talem long Papa ia we i gat bigfala lav mo sore: “? Hemia nomo blong mi mas mekem?” Mi biliv se sapos yumi save tingbaot mo luksave evri dei, bigfala lav ia blong Papa long Heven mo Sevya, bae yumi glad blong mekem eni samting we Tufala i askem blong yumi gobak stap wetem Tufala. Ol dia sista, ?Wanem we yumi safa long ples ia bae i impoten sapos long en, ol hadtaem ia nao bae oli ol samting we bae i mekem yumi save kwalifae from laef we i no save finis mo fasin blong kam olsem wan god insaed long kingdom wetem Papa mo Sevya blong yumi?
Mi testifae se bodi blong yumi i tabu presen we i kam long Papa long Heven, mo taem yumi kipim laef blong yumi i klin gud mo klin tru long sakrifaes blong Sevya we i pem praes, mo taem yumi kipim visen ia, abaot ol promes praes blong papa, i stap long fored blong yumi, se bae wan dei, yumi kasem “evri samting we Papa [blong yumi] i gat.”11 Long nem blong Jisas Kraes, amen.