Nimenimochun Ennet, Nimenimochun Nongonong, me Nimenimochun Pwarata
Ouse mochen oupwe fori ei mwichenap epwe ewe fansoun kametip won ekkewe porous seni ewe Samon me ren Noun kewe chon angang.
Achengicheng pwi me fefinei, ua etiwa kemi ngeni mwichenapen mwichefen! A men fokkun apwapwa ai nonnom remi! Oua fen nom non ai ekiek iteiten fansoun non ekkewe wonu maram ra no. Ua fen iotek usun ami me fan itemi. Non ekkewe chok wik ua ennetin iotek pwe ei mwichenap epwe ew fansoun nenengeni me pwarata fan iten meinisin ekkewe ra kutta ekkena feioch.
Aua pwapwa ne kapas ngeni kemi sefan seni ewe Conference Center. Napengeni ekkewe sea ir mi chok pon, nge an ekkoch ekkewe chon ewe Tabernacle Choir nonnom a ew fetanoch mi amwarar. Aua etiwa kemi meinisin ngeni ei watten mwichenap oua katon me ekis, ian chok oua nom ia.
Kich mi chiwen weri feiengawen COVID-19 me ekkewe kinikinin. Aua kinisou ngeni kemi ren ami apwonueta am ourour me ewe fon an chon safei mi sinenap me nouwisin government non neniemi kewe.
Aua achufengeni ew me ew mwichenap fan emwenien ewe Samon.1 Napanapan a sokkono non chommong ier. Nupwen ua emon chok kukkun, mwichenap a ukukun unungat ika ruanu ran. Mwirinon, mwichenap a kisitiw ngeni ru ran. Meinisin porous—akkom me iei—ir pungunon ennetin iotek me watten amonneta non pekin ngun.
Ekkewe Meinap Unus me Nouwisen Mwichefen mi Nap repwe kapas repwe anonga ar porous won ach Chon Amanau, Jises Kraist, An umoumoch, me An manamanen ngaseno esemuch. Ese mwo wor ew fansoun non uruon fonufan nupwen sinenap usun ach Chon Amanau a kon auchea me fich ngeni meinisin ngunun aramas. Ekieki ifa usun mwitirin ekkewe waten osukosuk non unusen fonufan—me ekkewe non manawen emon me emon kich—repwe wesino ika meinisin sipwe finata ne tapweno mwirin Jises Kraist me aneasochisi An afanafan.
Non ena ngun, ua tingor oupwe ausening ngeni unungat mettoch fansoun ei mwichenap: nimenimochun ennet, ewe nimenimochun nongonongen Kraist, me nimenimochun pwarata. Sokkono seni an ekkoch tipemwaramwar, mi ennet wor sokkun mettoch usun pung me mwan. Mi ennetin wor wesewesen ennet—ennet esemuch. Ew me nein ekkewe osukosuken ach fansoun ina a chokukkun aramas mi sinei ian repwe kunnuno ia fan iten ennet.2 Ua tongeni apinukunuk ngeni kemi pwe met oupwe rong ikenai me nesor ir unusen nimenimochun ennet.
Ewe nimenimochun nongonongen Kraist mi unusen manaman. A siwini manauen meinisin ekkewe ir mi weweiti me kutta ar repwe aea non manauer. Ewe nongonongen Kraist a anisi kich ach sipwe kuna me nom won ewe aanen pwon mi pin. Ach nom won ena aan mi chokisikis nge fatafatoch epwe wesen atufichi kich ach sipwe angei mettoch meinisin mi wor ren Kot.3 Ese wor mettoch epwe kon auchea nap seni meinisin a wor ren Samach!
Amuchunon, nimenimochun pwarata fan iten ekkewe kapaseis non netipemi epwe fori pwe ei mwichenap epwe namwotech me esapw menukuno. Ika kose mwo kutta ewe aninisin ewe Ngun mi Fel an epwe anisuk om kopwe rong met ewe Samon a mochen kopwe rong non ekkei ru ran, upwe tingoreok kopwe fori iei. Ouse mochen oupwe fori ei mwichenap epwe ewe fansoun kametip won ekkewe porous seni ewe Samon me ren Noun kewe chon angang. Kaeo ifa usun ka tongeni anganga ir me non manauom.
Iei Ewe Mwichefenin Jises Kraist ren Aramas mi Pin non Fansoun Soponon. Kich Noun kewe aramas pwon. Ewe Samon a afata pwe I epwe emwitiri An angang non pwisin an fansoun,4 me I a fori non fansoun wesewesen mwitir. Sia feioch ne choni An angang mi pin.
Ua apasa ew feioch won meinisin ekkewe ra kutta watten saram, mirit, me ennet. Ua pwarata ai tong ngeni emon me emon ami, non ewe it mi pin iten Jises Kraist, amen.