Ekkewe Mettochun Nguni
Met ekkoch mettoch en me ekieki? Met sokkun mettoch mi auchea ngonuk? Met ekkena mettochun ngunum?
Pwi me fefinei kana, iei ua uta non ach ei Conference Center mi achengicheng, me ua chechemeni ekkewe kapasen ewe Aposel Peter: “Samon, mi murinno sipwe nom ikei.”1
Ai kewe ekiek ikenai mi nongonong won kapasen ewe soufos Nifai, ewe a makkei uruon noun kewe aramas mwirin Saman Lehi a mano. Nifai a makkei, “Iwe won ekkei ua makkei ekkewe mettochun nguni.”2
Me mwan ua chok nengeni ei wokisin, me use ekieki ewe kapas mettoch ese watte auchean ika mi pin, ese fich ai upwe apacha ngeni “nguni.” Nge iei ua kaeo pwe ewe kapas mettoch a nom non ekkewe pukefel fan 2,534.3 Awewe chok, non Moses: “Ngang ewe Nepoputan me Nesopnon, ewe Kot mi Unusan Napanap; ren nei Anaemon Chok Ua forata ekkei mettoch.”4 Me anon Nifai: “Nengeni, nguni a pwapwa ren ekkewe mettochun ewe Samon; me netipei a soposopono ne ekipwichi ekkei mettoch ua kuner me rongorong usur.”5
An Nifai kapas ra eisinikich “Met sokkun mettoch oua ekiekiochu?” “Met sokkun mettoch mi auchea?” “Met ekkana mettochun ngunumi?”
Ekkewe mettochun ngunuch mi tongeni fatoch me auchea ika sipwe ekieki ekkei kapas eis.
Non ewe fansoun semwenin fonufan unus ua fen mwich ngeni serafo seni non ekkewe kinikinik fonufan non chommong mwich, watte me kukun, ren mwich mi fich won ewe internet me facebook, me aiwa fen poraus usun ar kewe kapaseis.
Ewe anuon a engon me ruanu ierin Josef Smith a wor ren eu kapas eis mi anonnon non ngunun, me uwei ngeni mwen ewe Samon. President Russell M. Nelson a esinesina: “Uwei ami kapas eis ngeni mwen ewe Samon me pwan aninis mi epinipin. Kaeo ren ewe mochenin nuku nge esap ren ewe apinukunuk pwe ka tongeni kuna och muan non manauen emon soufos ika tipefesen non ekkewe pukefel. Kouno ne anapano ami tipemwaramar ren ami eniwini ngeni ekkoch … chon tipemwaramwar. Mut ngeni ewe Samon epwe emweni kemi won ami sai ne kutta pekin ngun.”6
Ekkewe serafo ra eisiniei met ua nuku me pwata ua nuku.
Ua chechemeni ai churi won internet emon nengin non imwan. Ua eisini ika iei ewe akkaewin fansoun emon Aposel a nom non imwan. A mwitir emenimen me a apasa, “Ewer.” An kapas eis ngeniei a murinno: “Met ekkewe mettoch mi ennetin auchea upwe sinei?”
Ua ponueni ren ekkewe mettochun nguni, ekkewe mettoch a ammonaei upwe rong mongungun, ekkewe mi ekieta mesei seni mettochun fonufan, ekkewe ra ngeniei popun ren ai angang non ewe kapas allim me pwan non manauei.
Ouse mochen upwe apasa ngenikemi ekkewe mettochun nguni? Ekkei mettoch ra fich ren meinisin mi mochen manauen chon appiru Jises Kraist. Engon epwe eu murinnon nampa. Ikenai upwe ngenikemi fisu me anean pwe oupwe pwisin awora wanu, tiwu, me engon me ren pwisin mwokutukutun manauemi.
Aewin, tongei Kot ewe Sam me Jises Kraist, ach Chon Amanau.
Jises a wau ewe aewin annuk mi napanap: “Kopwe tongei ewe Samol om God ren unusen nenukom, ren unusen ngunum o ren nunusen om ekiek.”7
Preseten Nelson a pwarata an nukunuk ngeni Kot, Semach ese Much, me Noun we, Jises Kraist, nupwen a kefinita epwe emweni an ewe Samon Mwichifen o apasa, “Ua sinei Ir, tongeir, me pwarata pwe upwe angang ngenir-me ami-ren unusan ngasangasen manauei.”8
Iwe akkom, tongei ewe Sam me ewe Nau.
Oruan, “Tongei chon orum.”9
Esap chok eu ekiek murinno; ina ewe oruan annuk mi napanap. Chon oruch ina punuach me chon ach famili, memperin wart, chienach chon angang, chon nom non imwach, ekkewe rese fiti ach namanam, ekkewe ra mochen aninisin pouch, me ennet, aramas meinisin. Ennetin ekkewe kapas “Tongei chon oruch” a nom non ewe konupin “Tong Fengen.”10
Preseten Nelson a achema kich, “Ika sia tongei Kot ren unusan netipach, I a akunu netipach ngeni met mi namwot ngeni pwan ekkoch aramas.”11
Aunungatin, tongei pwisin en.
Iei eu napanap mi weires ngeni chommong. Pwata mi tongeni weires ach tongei pwisin kich nap seni ach tongei aramas? Nge ewe Samon a apasa, “Tongei chon oruch usun ka pwisin tongeok.”12 I a aucheani ewe manaman a nom non kich, sipwe pwan usun. Nupwe sia chou ren ach mwan, netipechou, nipwakingau, netipengau, song, ika tipis, ewe manamanen an ewe Samon Affor fan itach, ina popun, pwe epwe ekieta ngunuch.
Uruanun, anneasochisi ekkewe annuk.
Ewe Samon a afata ngeni kich: “Ika oua tongeiei, anneasochisi ai kewe annuk.”13 Achocho iteiten ran oupwe ekis forochu me nikiitu non pungoch.
Enimuan, fansoun meinisin oupwe nimenimoch pwe oupwe tongeni fiti ewe tempel.
Ngang ua era pwe sia itoch ren ewe Samon. Ika mo ewe tempel a kan, ach nimenimoch me monnota ren angangen ewe tempel a awenewenakich won ekkewe mettoch mi ennetin auchea, ewe aanen pwon mi pin.
Awonuwan, oupwe pwapwa me epinukunuk.
“Oupwe epinukunuk, ousap nuokus,”14 ewe Samon a apasa. Pwata? Ifa usun, nupwe weires a kuu kich iteiten? Pokiten ewe pwon seni Jises Kraist: Ngang ewe Samon ua nom reom, me upwe uta unukum.15
President Nelson a awewei ewe kapas allim mi niwinsefanito usun“ew afanafanen renpwapwa!”16 Me i a awewei, “Ewe pwapwa kich me mefi esap kon ren met kich mi fori ren met mi fis ngeni manawach me epwe ren meinisin ren ach tumunochu non manawach.”17
Efisuan, tapweno mwirin noun Kot soufos mi manau.
Meni ei nom nesoponon ei poraus, nge me rei a nom nepoputan non auchean non ach ei ran ikenai.
Mi wor nouch soufosun Kot won fonufan ikenai! Ousap monukano met wewen fan itemi. Chechemeni ewe fopun ua poraus usun nepoputan ai poraus. I a mochen epwe sinei menni mettoch mi kon auchea. “Tapweno ewe soufos mi manau,” ua era me ua pwan apochokkuna ikenai.
Sia sokono non ach Mwichefen ikenai pun mi wor emwen seni soufos, chon osini, me chon pwarata ra kefinita seni Kot fan iten ei fansoun. Ua pwon pwe ika oupwe ausening me anneasochisi ar fonoukich, ousap rikino seni ewe aan. Esap Fis!
Sia manau non eu fansoun sia “nuwet fetan,”18 nupwen pochokkunen ngun, fofforoch, me sufon ra nom non koput. Mi namwot sipwe finioch. Sia tongeni rong mongungun ewe Samon ren Noun soufos epwe akinamwe ach niuokus me ekieta ach neneno, iwe nupwen Preseten Nelson a kapas, a kapas fan iten ewe Samon.
Sia feioch ren pukefel me afanafan mi achemakich, “Ai ekieki esap ami ekiek, ina mo ami kewe mwokutukut esap ai mwokutukut, anon ewe Samon.”19
Pwan ina usun ren Naaman, emon sou emwenin sounfiu non Syria, nge emon mi semwenin keinapan, me a kaeo pwe ewe soufos Elisha epwe echikara. Elisha a tinano emon chon angang epwe ereni Naaman pwe epwe tutu non ewe Chonupupu Jordan fan fisu me epwe nimoch. Naaman a nukumang. Ennet a wor chonupupu mi watte seni ewe Jordan, me pwata a tinano emon chon angang nupwen a witi Elisah, ewe soufos, epwe pwisin echikara i? Naaman a feino seni nge a weweno pokiten seni noun kewe chon angang: “Ika ewe soufos a annuku kopwe fori mettoch mi amwarar, met ren ei mo ngo kosap fori?”20 Naaman a tutu fan fisu non ewe Jordan me a chikar.
Ewe porausen Naaman a achema ngeni kich ren efeiengawen ach fini me angei ekkochuchok annuk seni ewe soufos minne met kich sa finata epwe fich ngeni non ach ekiek, met kich me mochen epwe fis, ika non orenien ach kei ran. Nouch soufos a sopweno ne ewmeni kich non ach pwisin Chonupupu Jordan pwe sipwe chikar.
Ekkewe kapas mi wesen auchea sipwe rong, ekiekifichi, me anneasochir repwe feito seni nouch soufos mi manau. Ua pwarata pwe ngang mi nom ren Preseten Nelson pwe aupwe poraus usun mettoch mi wesen auchea ren ewe Mwichefen me ewe fonufan, me ua fen kuna ewe pwarata a tonong non i. I mi sinei ewe Samon, a sinei napanapan, me a mochen pwe meinisin noun Kot repwe rongorong I, ewe Samon Jises Kraist.
Non chommong ier sia rong seni ewe soufos fan ru iteiten ier non mwichenapen mwichefen. Nge ren watten weiresen ach kei ran, Preseten Nelson a afanafan fan chommong non sokkopaten neni,21 social media,22 mwichen fan,23 me poraus ren news.24 Ngang mi kuna an ammonata me afanafana porausne pwarata me ra porausen anapano ach kinisou, korifengeni pwich me fefinach meinisin, me anapano kinamwe, epinukunuk, pochokkun me chikar non pwisin manauach.
Preseten Nelson a men emon mi angoch non pekin afanafan, nge auchean, i emon soufosun Kot. Mi amwarar ach sipwe ekieki, nge mi namwot sipwe weweiti pwe an emwen epwe epet senikich ekkewe angangen chofona, nikotupotup me fofforun fonufan mi pochokun non fonufan ikenai.25
Ewe wisen soufos a anongonong won pwarata. “Ewe Niwinsefaniton ewe Unusochun ewe Kapas Allimen Jises Kraist: Esinesinen Eu Achechemen Ruepuku Ier ngeni ewe Fonufan,” a katou me non April 2020 non mwichenapen mwichifen, a apochokkuna pwe ewe Samon a emweni ei angang. Non ei esinesin, ewe Aewin Presetensi me ewe Mwichen Engon me Ruemon Aposel ra apasa: “Sia pwapwa ne pwarata pwe ewe Niwinsefan a sopweno ren soposopen pwarata. Ewe fonufan esap chiwen ususun we, pun Kot epwe soposopono ne ‘ochufengeni forian kewe meinisin … fan nemenien Kraist’ (Ephesus 1:10).”26
“Mettoch meinisin non Kraist”27 me “ekkewe mettochun nguni”28 ina met popun ei Mwichifen, ei kapas allim, me ei mwichen aramas.
Ua asopwano ren ai pesei kemi oupwe ekieki ekkei fisu “mettochun nguni” ua erenikemi ikenai: tongei Kot ewe Sam me Jises Kraist, ach Chon Amanau; tongei chon oruch; tongei pwisin ami; anneasochisi ekkewe annuk; oupwe nimenimoch me monnota ren ewe tempel; oupwe pwapwa me epinukunuk; me tapweno noun Kot soufos mi manau. Ua pesei kemi oupwe pwisin ekieki ren nampa wanu, tiw me engon. Ekkieki ifa usun oupwe awewei “mettochun” ngunumi ren aramas me pesei are repwe iotek, ekiekiochu, me kutta emwen seni ewe Samon.
Ekkewe mettochun nguni mi auchea ngeniei usun chok mettochun ngunumi mi auchea ngeni kemi. Ekkei mettoch mi apochokkuna ach angang non Mwichefen me non napanapan manauach. Ra ri kich ngeni Jises Kraist, me achema ngeni kich ach pwonepin, me ra amefa ach kinamwe non poun ewe Samon. Ua pwarata pwe I a mochen ngunuch “resap chiwen echik are kaka, nge repwe ur”29 ren An tong non ach kutta ach sipwe ennetin chon kuno, pwe sipwe eu chok ren I me Semach. Non iten Jises Kraist, amen.