Fiti ewe Manamanen Kot non Ning mi Napanap
Asufonu pwon mi pin a afouta kich ren wenechar me ren ewe manamanen Kot non ning mi napanap.
Ua iotek pwe ewe Ngun mi Fel epwe asarama me emwirinono kich meinisin nupwen sipwe ekieki fengeni ewe murinon angangen amanaua me manau mi tekia non ewe kinikinin fansoun mi unus.
An Moronai Aewin Churi Joseph Smith
Arapakan unungat ier mwirin ewe Aewin Nemesepwi, non ewe pwinin September 21, 1823, ewe onuon Joseph Smith a iotek ren an epwe angei ew omusomusen an kewe tipis me an epwe sinei nonnomun me mwen mesen Kot.1 Emon auchean aramas a pwato nepekin an we pet, a kokori Joseph ren itan, me afata pwe “i emon chon kuno a feito seni Kot … o itan Moronai.” A awewei “pwe a wor an Kot angang [Joseph] epwe fori”2 me a aiti ussun feitton ewe Puken Mormon. Auchean, ewe Puken Mormon ina ew me nein ekkewe aewin itenap a affat non an Moronai porous.
Ewe Puken Mormon pwan ew testamenin Jises Kraist me ewe wachimuken pisekin siwin non fansoun soponon. Popun ach aporousa ewe kapas allim pwe sipwe kori meinisin ar repwe feitto ren Jises Kraist,3 angei ekkewe feiochun ewe kapas allim a niwinsefanito, me nikitu tori soponon seni nuku non ewe Chon Amanau.4 Anisi ekkewe aramas ar repwe sinei ewe auchean ekesiwinin netip5 me fofo ngeni ewe Samon ren kewe pwon mi pin me angangepin ir kewe nongonongen popunapen afanafanen ewe kapas allim.
An Moronai kapasen esinesin ren ewe Puken Mormon ngeni Joseph Smith a poputani ewe angangen amanaua me manau mi tekia ren aramas won ei epek ren ewe eppet non ewe unusochun kinikinin fansoun.
Sopweno an ewe kapasen ourour ngeni Joseph, mwirin Moronai a eniwini ewe kapas seni puken Malachi non ewe Testamenin Noom, fiti ekis ekesiwin non ewe kapas a nounou non ewe King James Bible:
“Nengeni, upwe pwar ngonuk ewe Pristut, seni poun Elijah ewe soufos, me mwen feiton ewe auchean me anoninenin ranin ewe Samon.
“… Me i epwe fotuki non netipen ekkewe semirit ekkewe pwon a fori ngeni ekkewe sam, me netipen ekkewe semirit repwe kun ngeni semer. O ika esap iei usun, unusan ewe fonufan epwe tatakis nupwen a war.”6
Popun ach oueta kewe tempel an epwe wor ekkewe neni mi pin ikewe ekkewe pwon mi pin me angangepin a auchea ngeni ewe amanau me manau mi tekia ren ewe faminien aramas epwe tongeni kawor, fan iten ekkewe mi manau me mi mano. An Moronai kapasen ourour ngeni Joseph Smith ussun auchean wisen Elijah me pochokunen pristut a achouano ewe angangen amanau me manau mi tekia won epek ei eppet me poputani non ach kinikinin fansoun ewe angang ren kewe mi mano won pwan epek ewe eppet.
Non menapan, an Moronai afanafan non September 1823 ussun ewe Puken Mormon me ewe misin an Elijah a forata ewe annukun nongonongun ewe angangen amanau me manau mi tekia won ir me ruepek ewe eppet.
Afanafan an ewe Soufos Joseph Smith
Ekkewe nesen Joseph Smith a kaeo seni Moronai a aninis ne amurinono meinisin napanapen an angangen afanafan. Awewe, ren ew mwich a fis non ewe Kirtland Tempel non April 6, 1837, ewe Soufos a apasa: “ Mwirin mettoch meinisin a fen apasa, ewe wis a kon auchea ina an epwe afanafana ewe Kapas Allim.”7
Arapakan fisu ier mwirin, non April 7, 1844, Joseph Smith a awora ew afanafan a pwano ikenai ussun ewe King Follett Discourse. Ewe Soufos Joseph Smith a aiti ngenikich, “Wisach we mi napanap Kot a ewisa ngenikich pwe sipwe achocho ne anisi ekkewe ra fen mano.”8
Nge ifa ussun afanafanan ewe kapas allim me anisi kewe ra fen mano epwe ew angang me wis mi napanap Kot a ewisa ngenikich? Ua nuku ewe Soufos Joseph Smith a aucheani non ir me ruu porousen ewe nongonongen ennet pwe pwon, a tonong non seni ach nongonong won kewe angangepin an pristut, ra tongeni ri fengenikich me ewe Samon Jises Kraist me ir auchean nukanap chochon ewe angangen amanau me manau mi tekia won ir me ruepek ewe eppet.
Angangen misineri me tempel me uruon famini ra kapach fengen auchean nonomur non ew murinon angang a ouonam won ekkewe pwon me angangepin a ngeni kich ewe tufich ach sipwe angei ewe manamanen kot non manauach, pun nesoponon sipwe niwino ren Samach Kot won Nang. Iwe, ekkei ruu porous seni ewe Soufos me mwan meni epwe pwa tipefesenin, non ennetin, a pwano ewe ouonamen ei murinon angang non fansoun soponon.
Riri ngeni ewe Chon Amanau ren kewe Pwon mi pin me Angangepin
Ewe Chon Amanau a apasa:
“Oupwe angei osei o oupwe mwarei o oupwe kaeo seni ei, pun ngang mi mosonoson o tipetekison, iwe oupwe kuna ami ngaseno.
“Pun osei we upwe ngeni kemi mi mecheres, o upwe ngeni kemi osemi mi pan.”9
Sia wata woch osen ewe Chon Amanau ewe mi pan nupwen sia kaeo ussun, amwararen ach angei, me afona kewe pwon mi pin me angangepin. Sia nukuchar ne fiti ewe Chon Amanau nupwen sia chechemeni non nuku me achocho ngeni ne aponueta ekkewe angang sia etiwa. Me ena akoko ngeni I ina ewe nenien pochokun non pekin ngun non unusen manauach.
Ekkewe Aramas Pon noun ewe Samon
Ua tingor oupwe ekieki ekkewe feioch mi pwon ngeni chon aponueta-kewe pwon mi pin noun Jises Kraist chon kuno. Awewe ren, Nifai a “kuna ewe mwichefen an ewe Namen Kot [non fansoun soponon], me chochon mi chokukun, … ekkewe aramas mi pin noun Kot, ra pwan nom won unusen fonufan; me ar nemenem … ra kukkun.”10
I a pwan “kuna ewe manamanen ewe Namen Kot, pwe a feittiw won ekkewe sounengin ewe mwichefenin ewe Nam, me won ekkewe aramas pwon noun ewe Samon, … me ra fouteni wenechar o fiti ewe manamanen Kot non ning mi napanap.”11
Ewe sengen kapas “fouteni wenechar me fiti ewe manamanen Kot non ning mi napanap” esap chok ew ekiek mi murinno ika ew awewe ren murinon kapasen non pukefel. Nge, ekkei feioch ra moneta ne pwano non manauen kewe chon kuno noun ewe Samon non fansoun-soponon.
Ai kewe angang ren emon chon ewe Engon me Ruemon a uwei fetaneiei non unusen fonufan. Me uwa fen feioch ren ai churi me kaeo nesen seni chommong me neimi upwe chok chemeni . Ua pwarata pwe kewe aramas pwon noun ewe Samon ikenai ra fouteni wenechar me ren ewe manamanen Kot non ning mi napanap. Ua fen kuna nuku, poracho, nipwakoch, ese or pireir, me pwapwa minne a nununo seni tufichin aramas—me ewe chok Kot a tongeni awora.
Ua kuna nikitu me manamanen Kot non ning mi napanap, a kawor seni nukuchar ngeni kewe pwon mi pin me angangepin, non manauen emon sarafo chon Mwichefen ewe a peno inisin ren ew aksetenin taraku. Mwirin an ei aramas ekkoch maramen weiresin chikar sefan me kaeo ngeni ew minefon nonomun manau fiti koukun mokutukutun fetan, ua churi me kapas ngeni ei nikitun aramas. Non am kapas fengen ua eisini, “Met ei mi fis ngonuk a anisi ngonuk om kopwe kaeo?” A muttir ponueni ne ura, “Use netipengaw. Use song. Me mettoch meinisin epwe Murinno.”
Ua kuna ewe nikitu me manamanen Kot non ning mi napanap, a wor seni nukuchar ngeni kewe pwon mi pin me angangepin, non manauen kewe re karan papatais me kopunguno pwe ra chon ewe Mwichefen. Ekkei minefon chon Mwichefen ra mwasangen kaeo me angang, mochen nge rese fateoch ifa ussun ar repwe mo nikitatiw nonnomur me nom me pochokunen oreni, me iei ra pwapwa ar ra winiti “chiechien kewe souneng, me seni ewe faminien Kot.”12
Ua kuna ewe nikitu me manamanen Kot non ning mi napanap, a wor seni nukuchar ngeni kewe pwon mi pin me angangepin, non manauen ew famini a tumunochu punuan me inan ika saman mi wor ar samau rese tongeni chikar. Ekkei chon kuno mi pwaracho ra awewei ekkewe fansoun ar famini ra mefi anamon—me kewe fansoun ra sinei pwe poun ewe Samon a oureta me apochokuner. Ei famini a pwarano ar ennetin kinisou ren kewe manau riaffou ra mefi a mut ngeni kich ach sipwe marita me winiti ussun Samach non Nang me ach ewe Chon Angasano, Jises Kraist. Kot a anisi me efeiochu ngeni ei famini ewe Ngun mi Fel an epwe chiechier me fori imwer ewe epwe ew neni mi pin ussun ewe tempel.
Ua kuna ewe nikitu me manamanen Kot non ning mi napanap, a wor seni nukuchar ngeni ekkewe pwon mi pin me angangepin, non manauen emon chon Mwichefen ewe a mefi ewe netipeta ren keimufesen me punuan. Osukosuken ewe fefin non pekin ngun me memef a napano seni memefin pungungaw a efitifit ngeni an punuwan atai ekkewe annuk mi pin me tanon ar ewe pupunu. Neminewe a mochen punguoch me pungun memmef.
Nupwen ei fefin mi nikitu a aani tinisukun met kewe a fen fisingeni a kaeo me a anapano an ekipwichi an ewe Chon Amanau ewe Achasefan non manauan nap seni me mwan. Ekis me ekis, ew anononun weweiti an Kraist ewe angangen amanawa aramas a enimenimochuono ngunun—An ewe riaffou ren ach kewe tipis me pwan ach kewe metek, apwangapwang, netipengaw, me riaffou. Me a pesepes an epwe eisini pusin ew kapas eis: pokiten ewe niwin a fen kamo fan iten ekkana tipis, ke mochen ewe niwin epwe kamo fann ruu? A weweiti pwe ena mettoch e mochen esap ew nein epwe pungoch ika umoumoch.
Ei fefin a sinei pwe an ochufengeni inisin ngeni ewe Chon Amanau ren kewe pwon mi pin me angangepin ra tongeni echikara ekkewe feiengaw seni pwan an emon aramas ese wenechar a omokutu pungun finata me fori an epwe kuna ewe tufich an epwe omusano me angei kinamwe, umoumoch, me tong.
Pwon me Kapasen Pwarata
Kewe pwon mi pin me feioch ra tufich pokiten chok ach ewe Chon Amanau, Jises Kraist. I a tingorekich pwe sipwe nenengeni I,13 feitto ren I,14 kaeo ussun I,15 me rifengenikich ngeni I16 ren kewe pwon mi pin me angangepin ren An ewe kapas allim mi niwinsefanito. Ua pwarata me pwon pwe ach asamonu kewe pwon mi pin ra anisikich ren wenechar me ren ewe manamanen Kot non ning mi napanap. Me uwa pwarata pwe ewe Samon Jises Kraist mi manau i ach Chon Amanau. Ren ekkei ennet ua pwapwa ne pwarata non iten ewe mi pin Jises Kraist, amen.