Nuku Sefan

Seni Elter Gerrit W. Gong

Seni ewe Mwichen Engon me Ruemon Aposel

Nuku non Kot me emon me emon a wato ekkewe feiochun nang.

Fan ew, nupwen ngang mi chok kukkun, a wor ekis chok fansoun ua ekiekin ai upwe su seni neimw. Non nonomwun emon kukkun-at, ua mefi pwe ese wor emon afen tongeiei.

Inei we mi sineochu mettoch a ausening me pwonei pwe mi tongeiei. Ua tumun me neimw.

Ami mi mwo mefi pwe usun nge oua su seni imwemi? Fan chommong, su seni imwach wewen pwe nuku a finengaw ika tatakis—nuku non winikapach, ren emon me emon kich, non Kot. Nupwen ach nuku a osukosuk, sia eureki ifa usun sipwe nuku sefan.

Ai porous ikenai pwe, ika sia feito neimw ika feinno neimw, Kot a feito churikich.¹ Non I sia tongeni kuna achifoua me pwaracho, mirit me sineiochu ach sipwe nuku sefan. Usun chok, I a tingor sipwe annomufengeni ewe saram ren emon me emon kich, sipwe umoumoch me epwe kis ach esita winikapach me ekkoch, pwe An Mwichefen epwe tongeni ew neni sipwe mefi pwe sia nom non imwach, ika sia aewin feito ika niwinto.

Nuku ew fofforun achifoua. Kot a annomu achifoua rech. Nge, an aramas nuku mi tongeni apwangapwangeno ika tatakis nupwen:

Emon chiechiach, chon ach angang, ika emon kich mi nuku ese ennet, a ameteki kich, ika nounoungawa kich.²
Emon punuwach ese nukuchar.
Meni weiweita, emon kich mi tongei a weri mano, feiengaw, ika samaw.
Sia weri ew kapaseisen ewe kapas allim sise esuku, meni och mettoch usun uruon Mwichefen ika annukun Mwichefen, me emon a apasa pwe ach mwichefen a opano ika ese kapas ennet.

Ekkoch nikinik meni resap kon tichik nge ourekir ra chok nonno.

Meni sise mefi pwe ewe Mwichefen epwe ew neni fan itach, sise mefi pwe kich mi masenong, sia mefi ekkoch ra apungu kich.

Are, inamo sia fen fori ururun mettoch meinisin, mettoch sia mochen rese mwo fisino. Inamo mi pwisin wor nefinach fengen me ewe Ngun mi Fel, meni sisap mwo mefi pwe kich mi sinei Kot mi manau ika ewe kapas allim mi ennet.

Chommong ikenai mi mefi auchean eniwinsefanin nuku nefinen aramas me mwicheich.³

Nupwen sia ekiek won nuku, sia sinei Kot i emon Koten ennet me “ese tongeni chofona.”⁴ Kich mi sinei ennet wewen miriten mettochun iei, mettochun nom me mettoch rese mo feito.⁵ Kich mi sinei pwarata mi soposopono me memmef mi fich ngeni ennet ese siwin ngeni nonnomuch mi siwin.

Kich mi sinei pwe pwon mi pin mi tano a atai netip. “Ngang uwa fen fori mettoch mi tiparoch,” a apasa. “En mi tongeni kopwe omwusano tipisi?” Ekkewe pupunu mwan me fefin mi tongeni komwochupau, me anean repwe nuku sefan. Non ew neni mi sokkono, emon chon konopus epwe ekieki, “Ika chok pwe u apwoneta ewe Kapasen Emirit, usap nom ikei ikanai.”

Kich mi sinei pwe pwapwa won an ewe Samon we aanen pwon me wis non An Mwichefen ir tingoren etiwetiw ach sipwe mefi an Kot nuku me tong fan itach me emon me emon kich. Chon Mwichefen, mi pachenong ekkewe mi nipich, ra soun angang non ewe Mwichefen me non neniach kewe.

Seni ourouren nang, emon pisop a kori ew kukkun pea pupunu ar repwe angang non an we wart nenien semirit. Akkom, ewe mwan a chok mwot non ewe pokuku, a imuno me fanananeno. Ekis me ekis, a poputa ne amenimen fengen me ekkewe semirit. Mwirinon, kewe pwupwunu ra apwari ar kinisou. Me mwan, ra apasa, ewe fefin a mochen semirit; ewe mwan ese mochen. Iei, wiser we a siwini me achufengenir. A pwan wato ewe pwapwan semirit non ar pupunu me imwer we.

Non pwan ew sopw, emon kukkun iin fiti noun kewe kukkun semirit me punuwan we ra mairu me sach nge ra etiwa nupwen a kokko ngeni an epwe emon Presetenin Fin Anisi. Ekis chok mwirin, ew monumon fiti foun ais a atai fifi, a efisi ekkewe sitowa repwene ponnuno me imw ra patekich usun aispoks. Pokiten mi wor ar fifi me minen epwichipwich, ei kukkun famini ra kisasew ne suki imwer ngeni ekkoch famini me aramas ar repwe ewitiwiti ewe monumon.

Nuku ra winiti ennet nupwen sia fori mettoch mi weires ren achifoua. Angang me fangeno ra anapano tufich me enimochu netip. Nuku non Kot me emon me emon a wato ekkewe feiochun nang.

Mwirin an awesi cancer, emon brother mi tupwon a puri taraku. Ren an ese fen mefi atong a iotek me eis, “Met ua tongeni kaeo seni ei mettoch?” Non ewe rumwen tumunun mi efeiengaw, a mefi an epwe epereni emon kangof a noninen fan iten punuwan me noun semirit. Emon chon semwen mi metek a kuna ponuwan an iotek non an nuku Kot me anisi ekkoch.

Nupwen emon pwin mi wor an osukosuken sasingin aramas mi seneno a witiwit nukun an noun we presetenin steik we ofes, ewe presetenin steik a iotek an epwe sinei ifa usun epwe anisi. Ew ekiek mi fatatatoch a feito, “Suki ewe asam me mut ngeni pwim epwe tonong.” Ren achifoua me nuku Kot epwe aninis, ewe souemwenin pristut a suki ewe asam me turufano ewe brother. Emon me emon ir a mefi siwinin tong me nuku fan iten Kot me emon me emon ir. Ren pochokun, ewe brother a tongeni poputa ne aier me siwin.

Nupwen nonnomuch ir mettochun winikapach, nongonongen kapas allim me ewe Ngun mi Fel ra tongeni anisi kich sipwe sinei ika, ifa usun, me inet sipwe nuku non ekkoch sefan. Nupwen nuku a tano ika ngaweno, tipengaw me enichipung ir mi ennet; iwe pwan ewe auchean tufichin sinei nupwen achifoua me pwaracho ra fich ngeni nuku sefan me nefinen aramas.

Nge, ren sufon ngeni Kot me ach pwisin pwarata, Preseten Russell M. Nelson a pwonei, “Ousap aureki non ion oua tongeni nuku.”⁶ Sia tongeni nuku Kot fansoun meinisin. Ewe Samon a sineiochu kich me tongei kich nap seni kich sia sinei ika tongei pwisin kich. An tong esemuch me unusochun sinei usun me nom, iei, me fansoun mwach a efisi An pwon me pwon mi pin repwe soposopono me ennet.

Nuku met ekkewe pukefel ra eita ngeni “non ewe fofforun fansoun.”⁷ Ren an Kot feioch, fofforun fansoun, me soposoponon achifoua me anneasochis, sia tongeni kuna tiniken me kinamwe.

Ewe Samon a echipa:

“Ina mo ika emon epwe kechiw nepwin, nge epwe pwapwa nesossor.“⁸

“Wato om netipechou [won] ewe Samon me nuku an tumun mi soposopono.”⁹

“Fonufan ese wor riaffou nang ese tongeni echikara.”¹⁰

Nuku Kot¹¹ me An manaman. Kich me nefinach fengen mi tongeni siwin. Seni ewe Achasefan an Kraist ewe Samon, sia tongeni poutano pwisin inisich mi mochenia me winiti noun Kot, mosonoson, tekison,¹² uren achifoua me nuku mi pung. Nupwen sia aier, nupwen sia pwarata me nikitano ach tipis, ewe Samon a apasa pwe esap chiwen chechemenir.¹³ Esap ren an monnuki, nge, non ew aan amwarar, usun ita I a finata esa chiwen chemenir, iwe sisap pwan chemenir.

Nuku an Kot ourour om kopwe esinna ochu. Sia tongeni omusano ekkoch non ewe fansoun me napanap mi pung usun ewe Samon a apasa sipwe fori,¹⁴ nupwen sipwe “miit usun serepenit, me tipetekison ussun chok ekkewe muro.”¹⁵

Fan ekkoch nupwen netipach ra unusen netipechou me netip niemam, sia unusen etiwa umoumochun me emwenin ewe Ngun mi Fel.¹⁶ Opungu emon ika omusomus ra poputa ren ar esinna ew muan. Napengeni opungu emon a anongonong won mettochun nom. Omusomus a nenengeni ngaseno ngeni fansoun mwach. “Pun Kot ese tinatiw Noun we won fonufan pwe epwe apungu fonufan, nge epwe chon amanaua.”¹⁷

Ewe Apostel Paul a eis, “Io epwe tongeni aimufesenikich seni ewe tongen Christ?” A ponuweni, “Esap mano are manau, … esap ekkewe mettoch asan ika fan fonufan … epwe tongeni aimufesenikich seni ewe tongen God, iei ach tong non Christ Jesus ach Samol.”¹⁸ Nge, mi wor emon a tongeni aimufesenikich seni Kot me Jises Kraist—me ena emon ina kich, pwisin. Usun Isaiah a apasa, ami tipis ra opano mesan seni kemi.¹⁹

Ren tong me annuk seni nang, sia pwisin nikinik won finiach kewe me pungur kewe. Nge an ach Chon Amanau tongen achasefan mi “feinfeino chok me esemuch.”²⁰ Nupwen sia mwonneta ne feito ngeni imwach, pwan nupwen kich mi “chiwen towaweno,”²¹ Kot a mwonneta ren umoumoch an epwe etiwa kich, a pwapwa ne fangeno met mi murino a wor ren.²²

Preseten J Reuben Clark a apasa, “Ua nuku pwe Samach non Nang a mochen epwe angasa meinisin noun semirit, … pwe non an pungoch me umoumoch i epwe ngenikich unsenapen niwinin ach foffor, epwe ngenikich meinisin a tongeni epwe fang, me enniwinin, ua nuku pwe i epwe echimwata woch kukkunun niwinin tipis minne mi tufich an epwe echimwa.”²³

Won ewe irapenges, pwan mwo an ach we Chon Amanau umoumochun sio ngeni Saman we ese anongonong won “Semei, kopwe omusereno” nge fen “Semei, kopwe omusereno! Rese sinei met ra fori.”²⁴ Ach pungun finata me ngaseno a wor wewer pokiten sipwe pwisin ponuweni mettoch me mwen Kot me pwisin kich usun ion kich, ren met kich mi sinei me fori. Kinisou chok, sia tongeni nuku an Kot unusochun pungoch me unusochun umoumoch ne apungu ach mochen me foffor.

Sia asopwano usun ach poputani—fiti an Kot umoumoch nupwen sia feito neimw ngeni I me emon me emon kich.

En mi chemeni an Jises Kraist we kapas monomon usun emon mwan mi wor ruemon noun at?²⁵ Emon at a suseni imwan me anussano pisek an neuo. Nupwen a apareni an tipis, ei at a kutta an epwe feino ngeni imwan. Ewe emon at, a mefi pwe a apwonueta ekkewe annuk “nengeni, ekkei chomong ier,”²⁶ ese mochen etiwa pwin we non imwer.

Pwi me fefinei, ouse mochen ekieki pwe Jises a tingorei kich sipwe suki netipach, ach wewe, umoumoch, me tekison, me kuna winikapach non ir me ru awewe?

Usun ewe akkomwen at ika nengin, sipwe tanechfetan me mwirin kutta ach sipwe niwino non imwach. Kot a awitiwiti kich.

Me usun ewe pwan emon at ika nengin, kich sia emwirimwir me ren Kot ach sipwe pwapwa fengen nupwen emon me emon kich sia feito neimw ngeni I. A etiwa kich ach sipwe fori ach mwicheich, quorom, klas, me urumot repwe suk, ennet, tumun—imwen ekkoch. Fiti kirekiroch, weweoch, me sufon, emon me emon kich sia tekison ne kutta ewe Samon me iotek me etiwa feiochun An kapas allim mi niwinsefan ngeni meinisin.

Ach sai non manau pwisin ach won winikapach, nge sia tongeni feito sefan ren Kot Samach me Noun ewe Achengicheng ren ach nuku non Kot, ekkoch, me non kich.²⁷ Jises a akkanipo, “Kosap nuokus, kopwe chok nuku.”²⁸ Usun ewe Soufos Joseph mi fori, non pwaracho sipwe nuku non an Samach won Nang tumun.²⁹ Pwii euchea, fefinei euchea, chiechie euchea, kose mwochen katon safan ren nukunuk me nuku—ew feiech A pwon ngonuk ikanai. Non iten Jises Kraist mi monomon me pin, amen.