“Ke Tongei Ei Nap Seni Ekkei?”
Met mettoch ka tongeni fori non manauomw omw kopwe pwarano pwe ka tongei ewe Samol akomw?
Non November 2019, ngang me chienei kewe auwa chuno ren ewe Fonu mi Pin. Nupwen am nomw ikewe, auwa anea me kaeo kewe pukfel fan iten manauen Jises Kraist. Ew sosoran, auwa uta ennefenin neppien ewe Setin Galilee ren ew neni ikewe Jises a churi Neun kewe chon Kaeo mwirin An Manau Sefan.
Mwirin an Jises Manau Safan, usun sia aneani non John sopwun 21, Peter me ekewe ekoch chon kaeo ra attaw unusen ewe pwiin nge rese niap.1 Non ewe sosoran, ra kuna ewe mwan a uta neppi ewe a urenir repwe oturatiwmota neur ewe epino nepekin ewe mwota me ewe epek. Ren ar ra ingeno, ewe epino a urono non amwararan.2
Ra mwitir me esina pwe ewe mwan i ewe Samol, me ra mwutir me etiwa I.
Ar ra uranong ewe epino ngeni neppi, mi uur ren iik, Jises a apasa, “Feito o mwongo.”3 John a repotei pwe “nupwen ra fen mwongo, Jises a apasa ngeni Simon Peter, Simon, neun Jonas aat, ka tongei ei nap seni ekkei?”4
Ren ai uwa uta won chok pwan ewe pi, uwa weweiti pwe an ewe Chon Amanau kapas eis ina ew me nein kewe euchean kapas eis meni ew ran epwe eisiniei. Arapakan upwe tongeni rong Nouwan an epwe eis, “Russell, ka tongei ei nap seni ekkei?”
En mi ekekieki met Jises a awewei ngeni nupwen A eisini Peter, “Ke Tongei ei nap seni ekkei?”
Anonga ei kapas eis ngeni manawach non ranich, ewe Samol meni epwe eisini kich ika ifa ukukun ach osukosuk me usun chommong echun me ngawen fofor ra fiu ar repwe angei ach rongorong me ach fansoun. Ii epwe eisini emon me emon kich ika kich mi tongei Ii nap seni ekewe metochun ei fonufan. Meni ei epwe ew kapas eis ussun met sia fokkun eucheani non manauach, ion sia tapweno mwirin, me ifa usun ach kuna nefinach ngeni chon ach famini me chon oruch kewe. Ika meni ii apwan eisini kich met a unusen uweato ach meseik me pwapwa.
Met ekkewe mettoch non ei fonufan a wato meseik ngeni kich, pwapwa, me kinamwe ewe Chon Amanau a fang ngeni Neun kewe chon kaeo me ii a pwan fang ngeni kich? I chok a tongeni ngeni kich meseik ennet, pwapwa, me kinamwe non ach tongei me fori An kewe annuk.
Ifa usun ach sipwe penueni ewe kapas eis “Ka tongei ei nap seni ekkei?”
Nupwen sia kuna unusechun wewen ei kapas eis, kich sipwe tongeni winiti chon famini mi echuno, chon oruch, aramas, chon ewe Mwichefen, me neun Kot at me nengin.
Non ieri ei, Ngang uwa fiti chomong peiasen ekkewe mi mano. Ngang uwa sinei pwe chomong neimi ouwa kuna met uwa fen kuna. Nupwen apwapwan manawen ewe a mano chon famini ika emon chiechiach, mi weires an ewe chon afanafan epwe pworous usun saisin imwan, fite wan taraku, ika masowen non an nenien isoisen mwoni. Rese pwan kon pworous ren masowen an soson media. Ren chomong minen mano, ra anonga won ar tong, angang ngeni ekoch, kaeo non manawer, ar tong fan iten Jises Kraist.
Ousapw wewengaweitiei. Ngang use era pwe anwor imwomw mi ech me womw taraku mi ech ra mwan ika omw aea soson media mi ngaw. Met nganguwa apasa pwe non ewe sopwonon, ekena metoch rese kon euchea ach anenew ngeni an ewe Chon Amanau tong.
Nupwen sia tongei me tapweno Mwirin I, mi wor ach nuku non I. Kich sia aier. Kich sia apiru An minen apiru me sia papatais me angei ewe Ngun mi Fel. Kich sia achocho ngeni nesopwonon me sia nomw won ewe anen pwon. Kich sia owmusano chon ach famini me oruch ren ach peutano ach song kich mi ekemwechu. Kich sia achocho ngeni ach sipwe aponueta an Kot kewe annuk. Kich sia achocho ngeni ach sipwe anneasosich. Kich sia fori me apwonueta kewe pwon mi pin. Kich sia asamwonu samach me inach. Kich sia peutano foforun fonufan mi ngaw. Kich sia amonata netipach ren An ewe Oruwen Niwinsefanito.
Non “Ewe Kraist mi Manau: Ewe Kapasen Pwarata an kewe Aposel,” kich sia aneani: “[Jises] non ekkoch ran epwe niwin ngeni fonufan. … I epwe nemenem usun Kingen King me kefinita epwe chon emwen ussun Samonun Samon me meinisin pwasuk repwe fotopukutiw me meinisin chen aw repwe kapas non ar fen ngeni I. Emon me emon kich sipwe uta me I epwe apwungu kich anongonong won ach kewe angang me mwochenin netipach.”5
Ren emon nein kewe Aposel a sainei taropwen “Ewe Kraist mi Manau” uwa tongeni apasa pwe ai sinei pwe Jises “i ewe saram, ewe manau, me ewe epinukunuk ren fonufan”6 a ngeniei ew watten mwochen anapano ai upwe tongei I iteiten ran.
Uwa pwarata pwe Samach won Nang me Jises Kraist ir mi manau. Ngang uwa pwarata pwe Ir mei tongei kich. Ekkewe Pukfel ra osukunna pwe “Kot a fokkun tongei fonufan, ina minne a fangono Noun we anamon, pwun iteiten aramas mi nuku i resapw mano, nge repwe kuna manau ese mwuch.”7 Ekkewe Pukfel a pwan aitikich pwe Jises “a tongei fonufan a fangono manauan, pwe chomong mi nuku repwe winiti neun Kot.”8
Samach won Nang a unusen tongei kich I a amonata An ewe kokotun amanaua fiti ewe Chon Amanau epwe nom nukanapan. Me Jises a fokkun tongei kich ina minne non fansoun ewe Mwich non Nang, nupwen Samach won Nang a eis, “Ien upwe tinano?” Jises, ewe a noun ewe Sam mwanichi me nein meinisin noun kewe non pekin ngun, a ponueni, “Ngang iei, tinieino.”9 A apasa ngeni ewe Sam, “Semei, netipom epwe ponueta, me ewe pwapwa epwe nomw feinfeino.”10 Jises a finata an epwe neuch Chon Amanau me Chon Angasano pwe sipwe tongeni winiti usun Ir me niwiniti Fan Meser.
Ekkei ruu wokisin ra aitikich usun ach sipwe niwin safan ngeni Fan Meser mi auchea epwe wor ach nuku. Kich sipwe nuku non Jises me non an Kot kokotun pwapwa. Ren nuku sipwe tong me tapweno mwirin ach Chon Amanau me aponueta an kewe annuk, ika mwo kich mi nomw nukanapen sossot me osukosuk.
Fonufan ikanai ese posono. Mei wor netipengaw, tipefesen, riaffou, me tumunungaw.
Preseten Dallin H. Oaks, a pworous non 2017, a makei ekkei: “Ikkei ekkei fansoun sossot, a uur ren watten ourek: maun me pworousen maun, pandemic epwe fis ren semwenin paiking, pwas, pwun fonu me osukosuken fonufan.”11
Kich sisapw tongeni peutano ach tong me epinukunuk non Jises, ika mwo sia kuna chomong osukosuk. Samach won Nang me Jises resapw tongeni menukikicheno. Ra tongei kich.
Ewe October a no, Preseten Russell M. Nelson a aitikich ewe euchean ach sipwe anomwu Samach won nang me Jises Kraist repwe akomw non manauach. Preseten Nelson a aitikich wewen ew kapas Israelmwut ngeni “Kot epwe nemenem.”12
A eisini emon me emon kich ekkei kapas eis: “Met en ka mwochen mut ngeni Kot epwe nomw non manauomw? En mi chengen ne mut ngeni Kot epwe emwenuk non manauom? Kopwe mut ngeni An kapas, An annuk, me An pwon mi pin repwe emweni met ka fori iteiten ran? Kopwe mut ngeni Mongungun epwe auchea me mwen ekkoch? En ka chengen ne mut ngeni met chok A mochen kopwe akkomwa nap seni ekkoch mochen? Met En ka chengenan epwe nemenano om mochen non An?”13
Kich sipwe chechemeni iteitan pwe ach enetin pwapwa a anongonong won nefinach me Kot, fiti Jises Kraist, me pwan emon me emon kich.
Ew anen sipwe pwarano ach tong ren ach sipwe fiti famini, chiechiach, me chon oruch me fori ekkoch kukun mettoch an epwe emwirinono ach anisi emon me emon kich. Fori ekkewe mettoch epwe fori ei fonufan epwe en neni mi murinno.
Met mettoch ka tongeni fori non manauomw omw kopwe pwarano pwe ka tongei ewe Samol akomw?
Nupwen sia anonga ach tongei chon oruch ussun A tonger, sia tongeni pwoputa ne ennetin tongei ekkewe mi nomw unukuch.14
Uwa eis safan, ifa ussun omw kopwe penueni an ewe Chon Amanau kapas eis “Ke tongei ei nap seni ekkei?”
Omw ka ekieki ei kapas eis usun uwa fen fori, uwa iotek pwe kopwe penueni usun Peter a fori non nakatamen fansoun a no, “Ewer, Samol; en mi sinei pwe ngang mi tongek”15iwe mwirin pwarano ren tong me angang fan iten Kot me meinisin ekkana unukumw.
Uwa pwarata pwe kich sia feioch ren a nomw rech ewe kapas alliim an Jises Kraist an epwe emweni kich non ewe napanap sia manau me foforuch ngeni emon me emon kich. Ren I, sia kaeo pwe emon me emon noun Kot at me neingen mi auchea ngeni I.
Ngang uwa pwarata pwe Jises Kraist I ach Chon Amanau mi achengicheng. I ewe Noun Kot we Anaemon. Me ua apasata ai tekisosonun kapasen pwarata non iten Jises Kraist, amen.